 ຊາວກະສິກອນ ເກັບຜັກສະຫຼາດທີ່ໄດ້ປູກໃນເຮືອນຮົ່ມ (ພາບ: VOV) |
ຢູ່ຕາແສງ ເດີນເຢືອງ, ແຂວງ ເລີມດົ່ງ, ຮູບພາບຊາວກະສິກອນເກັບກ່ຽວ, ປຸງແຕ່ງຜັກສະອາດໃນຂັ້ນຕົ້ນຢູ່ບັນດາເນື້ອທີ່ປູກຜັກໃນຮົ່ມໄດ້ກາຍເປັນຄວາມຄຸ້ນເຄີຍທີ່ສຸດແລ້ວ.
ໂດຍເປັນຜູ້ທີ່ມີການຜູກພັນກັບການຜະລິດກະສິກຳຢູ່ທ້ອງຖິ່ນມາຫຼາຍປີ, ລຸງ ຄັກບິ່ງ, ປະຊາຊົນຢູ່ຕາແສງ ເດີຣານ(D’ran), ແຂວງ ເລິມດົ່ງ, ໃຫ້ຮູ້ວ່າ ຊາວກະສິກອນໄດ້ຮັບການສົ່ງເສີມຫັນປ່ຽນໃນການຜະລິດ, ລັດຍູ້ແຮງການສ້າງພື້ນຖານໂຄງລ່າງກະສິກຳຊົນນະບົດ ແລະ ສະໜອງສິນເຊື່ອ, ໜູນຊ່ວຍການຖ່າຍທອດວິທະຍາສາດເຕັກນິກ, ຫັນປ່ຽນໂຄງປະກອບແນວປູກ ແລະ ສັດລ້ຽງ. ຜັກ, ດອກໄມ້ທີ່ມີຄຸນນະພາບສູງ, ລ້ຽງສັດທີ່ໝູນໃຊ້ເຕັກໂນໂລຢີສູງຄ່ອຍໆໄດ້ຮັບຄວາມນິຍົມແຜ່ຫຼາຍທົ່ວໄປ. ທ່ານ ຄັກບິ່ງ, ໃຫ້ຮູ້ວ່າ:
“ພໍ່ແມ່ປະຊາຊົນພັດທະນາເສດຖະກິດໄດ້ດີຫຼາຍ. ຍ້ອນມີຄວາມສົນໃຈ, ມີການໜູນຊ່ວຍຈາກລັດສະນັ້ນ ພື້ນຖານເສດຖະກິດມີການພັດທະນາທີ່ດີກວ່າເກົ່າ. ການປູກຕົ້ນໝາກເລັ່ນ, ຜັກຊະນິດຕ່າງໆ, ໝາກເຜັດ… ໄດ້ຮັບການຜະລິດຕາມທິດກະສິກຳທີ່ໝູນໃຊ້ເຕັກໂນໂລຢີສູງ. ປັດຈຸບັນນີ້ເລີ່ມປູກດອກໄມ້ຕື່ມອີກ. ຊີວິດໃນປັດຈຸບັນພັດທະນາກວ່າເມື່ອກ່ອນ, ການດຳລົງຊີວິດຂອງພໍ່ແມ່ປະຊາຊົນກໍມີການປ່ຽນແປງຢ່າງເຫັນໄດ້ຊັດ, ເມື່ອກ່ອນແມ່ນລຳບາກຫຼາຍ”.
 ການຫຸ້ມຫໍ່ຜັກສະຫຼາດທີ່ໄດ້ປູກຕາມເຕັກນິກທັນສະໄໝ |
ການສ້າງຊົນນະບົດໃໝ່ຢູ່ເຂດປູກຜັກ ເດີນເຢືອງ ລວມມີ 4 ຕາແສງ ເດີນເຢືອງ, ກາໂດ, ກວາງເລິບ ແລະ ເດີຣານ ຂອງແຂວງ ເລິມດົ່ງ ພວມຕິດພັນກັບການຜະລິດອັດສະລິຍະ. ຮອດທ້າຍປີ 2025, ການປູກຜັກ ແລະ ດອກໄມ້ເຕັກໂນໂລຢີສູງກວມເອົາປະມານ 95% ເນື້ອທີ່ປູກຝັງທັງໝົດ, ມູນຄ່າການຜະລິດກະສິກຳສະເລ່ຍບັນລຸກວ່າ 220 ລ້ານດົ່ງຕໍ່ເຮັກຕາຕໍ່ປີ (ປະມານ 9.000 USD ຕໍ່ເຮັກຕາຕໍ່ປີ); ລາຍຮັບສະເລ່ຍຕໍ່ຫົວຄົນບັນລຸປະມານ 75 ລ້ານດົ່ງຕໍ່ປີ (ປະມານ 3.100 USD ຕໍ່ປີ). ບັນດາຕາແສງດັ່ງກ່າວລ້ວນແຕ່ບັນລຸມາດຕະຖານຊົນນະບົດໃໝ່ ເປັນຕົວແບບ. ທ່ານ K’Bril, ນາຍບ້ານ ກາມບູເຕ, ຕາແສງ ເດີນເຢືອງ, ແຂວງ ເລິມດົ່ງ ໃຫ້ຮູ້ວ່າ:
“ປັດຈຸບັນນີ້ ພໍ່ແມ່ຊາວກະສິກອນໄດ້ໝູນໃຊ້ຈັກໄຖໃຫຍ່, ລົງທຶນລະບົບຫົດນ້ຳອັດສະລິຍະ, ເຕັກນິກການປູກຝັງນັບມື້ນັບໄດ້ຮັບການຍົກສູງຂຶ້ນ. ຈາກນັ້ນ, ກໍປົວແປງການຫາເງິນລ້ຽງຊີບ ກໍຄືລາຍຮັບ, ຊີວິດການເປັນຢູ່ໃຫ້ນັບມື້ນັບດີຂຶ້ນ. ຈາກນັ້ນ, ໂສມໜ້າຂອງໝູ່ບ້ານເວົ້າສະເພາະ ແລະ ຕາແສງ ເວົ້າລວມກໍມີການປ່ຽນແປງຢ່າງໃຫຍ່ຫຼວງ”.
 ການປູກດອກໄມ້ກໍໄດ້ໝູນໃຊ້ເຕັກໂນໂລຢີສູງເຊັ່ນດຽວກັນ |
ໃນສະພາບການສັບຊ້ອນຫົວໜ່ວຍບໍລິຫານ ແລະ ເຄື່ອນໄຫວຮູບແບບອຳນາດການປົກຄອງທ້ອງຖິ່ນສອງຂັ້ນ, ການສຳຫຼວດ, ສ້າງເປົ້າໝາຍຊົນນະບົດໃໝ່ຄືນໃໝ່ຢູ່ບັນດາຕາແສງເຂດ ເດີນເຢືອງ ໄດ້ຮັບຖືວ່າແມ່ນໜ້າທີ່ຈຸດສຸມ. ທ່ານ ເຈິ່ນຮຸ່ງຢຸງ, ປະທານຄະນະກຳມະການປະຊາຊົນ ຕາແສງ ເດີນເຢືອງ, ແຂວງ ເລິມດົ່ງ ໃຫ້ຮູ້ວ່າ:
“ຕາມການຕີລາຄາບັນດາມາດຕະຖານໃນເມື່ອກ່ອນ, ບົນພື້ນຖານບັນດາມາດຖານທີ່ໄດ້ຮັບຮອງແລ້ວນັ້ນ ທາງຕາແສງພວມສຳຫຼວດກວດຄືນ, ຄາດໝາຍໃດບັນດລຸໄດ້ແລ້ວກໍສືບຕໍ່ຍົກສູງຂຶ້ນ, ສ່ວນຄາດໝາຍໃດຍັງບໍ່ທັນບັນລຸໄດ້ແມ່ນຈະສືບຕໍ່ລົງທຶນ. ພິເສດ, ພາຍຫຼັງປະກາດປະມວນມາດຖານການສ້າງຊົນນະບົດໃໝ່ໄລຍະ 2026 – 2030 ນັ້ນ, ທາງຕາແສງມີແຜນການລະອຽດ ເພື່ອສືບຕໍ່ຍົກສູງລາຍຮັບ, ຄ່າຄອງຊີບ, ທັດສະນີຍະພາບສິ່ງແວດລ້ອມ, ຮັກສາ ແລະ ຍົກສູງຄຸນນະພາບພື້ນຖານໂຄງລ່າງ, ການຜະລິດ, ຊີວິດການເປັນຢູ່ຂຶ້ນ… ເພື່ອບັນລຸໄດ້ເປົ້າໝາຍ ສ້າງຕາແສງຊົນນະບົດໃໝ່ທັນສະໄໝ”.
 ໂສມໜ້າໃໝ່ຂອງຕາແສງ ເດີນເຢືອງ, ແຂວງ ເລິມດົ່ງ |
ໂຄງການສ້າງຊົນນະບົດໃໝ່ຢູ່ ເດີນເຢືອງ, ແຂວງ ເລິມດົ່ງ ພວມກ້າວເຂົ້າສູ່ໄລຍະ “ຍົກສູງຄຸນນະພາບ”, ມຸ່ງໄປເຖິງຊົນນະບົດທັນສະໄໝ, ອັດສະລິຍະ, ການຜະລິດຕິດພັນກັບຕະຫຼາດ ແລະ ລະບົບມູນຄ່າ. ບັນດາການຫັນປ່ຽນຢ່າງຕັ້ງໜ້ານັ້ນ ບໍ່ພຽງແຕ່ປ່ຽນແປງໂສມໜ້າຊົນນະບົດ, ຍົກສູງຊີວິດການເປັນຢູ່ຂອງປະຊາຊົນເທົ່ານັ້ນ, ຫາກຍັງປະກອບສ່ວນຫັນບັນດາເປົ້າໝາຍພັດທະນາແບບຍືນຍົງເຊິ່ງພັກໄດ້ກຳນົດໃຫ້ປະກົດຜົນເປັນຈິງອີກດ້ວຍ./.
