 ໂຕ ໝີແມວ ກຽມພ້ອມຕ້ອນຮັບແຂກທ່ອງທ່ຽວ (ພາບ: VOV) |
10 ໂມງປາຍຕອນກາງຄືນ, ພາຍຫຼັງສິ້ນສຸດລາຍການທ່ອງທ່ຽວຕອນກາງຄືນຢູ່ສວນສັດ, ຍັງມີເດັກນ້ອຍຫຼາຍຄຄົນຂີ່ລົດເຂົ້າບໍລິເວນສວນສັດ ຖາວເກີ່ມວຽນ ເພື່ອຈົດຊື່ເຂົ້າຮ່ວມລາຍການ “ຍາມຕາເວັນຕົກດິນ”, ເຊິ່ງຊີ້ໃຫ້ເຫັນຄວາມດູດດື່ມເປັນພິເສດຂອງລາຍການຢ້ຽມຊົມ, ທັດສະນະສຶກສາຊີວິດຕອນກາງຄືນຂອງສັດປ່າປະເພດຕ່າງໆສຳລັບປະຊາຊົນຫຼາຍຄົນຢູ່ ໄຊງ່ອນ. ສຳລັບເອື້ອຍ ບຸ່ຍທິຖຸຍ, ຢູ່ເມືອງ ເຕິນບິ່ງ ແລ້ວ, ການຢ້ຽມຊົມລາຍການດັ່ງກ່າວພ້ອມກັບລູກສາວເປັນການລົງຕົວຈິງທີ່ຈັບອົກຈັບໃຈ.
“ພາຍຫຼັງຊອກຮູ້ໃນເຟດບຸກຂອງ ຖາວເກີມວຽນ, ຂ້າພະເຈົ້າໄດ້ຕົກລົງພາລູກໄປທ່ຽວຊົມ ເພາະແນ່ນອນວ່າຈະມີຄວາມຮູ້ສຶກຕ່າງກັບຕອນກາງເວັນ. ແຂກທ່ອງທ່ຽວໄດ້ຊຶມຊັບເຂົ້າຊີວິດຫາກິນຍາມກາງຄືນຂອງສັດປ່າ, ກໍຢາກຢ້ານໜ້ອຍໜຶ່ງ ແຕ່ຈັບອົກຈັບໃຈຫຼາຍ, ເຮົາກໍມີຄວາມເຂົ້າໃຈກ່ຽວກັບບັນດາຄຸນລັກສະນະພິເສດອື່ນຂອງສັດຫາກິນເອງ ແລະ ສັດກິນຫຍ້າຍາມກາງຄືນ”.
 ແຂກທ່ອງທ່ຽວຈຳນວນຫຼາຍເຂົ້າຮ່ວມລາຍການທ່ອງທ່ຽວ(ພາບ: VOV) |
“ນ້ອງມີຄວາມປະທັບໃຈກັບໂຕໝາໄນ ເພາະວ່າມັນເປັນສັດປ່າ ແລະ ມີສຽງຫົວທີ່ເຮັດໃຫ້ເຮົາຮູ້ສຶກຢ້ານ. ນ້ອງຢາກເຫັນໂຕໝີແມວ ແລະ ໂຕເສືອຂາວ ເພາະວ່າມັນມີເລື່ອງລາວທີ່ຈັບໃຈ ສະນັ້ນນ້ອງຢາກຊອກຮູ້ຕື່ມອີກ”.
“ມີສັດຫຼາຍປະເພດນອນຕອນກາງເວັນ, ສ່ວນຕອນກາງຄືນພັດຕື່ນ ແລະ ເຄື່ອນໄຫວຢ່າງແຮງກວ່າ, ໄປເລາະໄປລ່ອງ. ນ້ອງມັກທີ່ສຸດແມ່ນໂຕເສືອ ເພາະວ່າມັນງາມ ແລະ ເປັນສັດຮ້າຍ. ລາຍການທ່ອງທ່ຽວນີ້ນ້ອງເຫັນວ່າຄັກ ແລະ ຈັບໃຈຫຼາຍ”.
ບັນດາຜູ້ນຳທ່ຽວລ້ວນແຕ່ເປັນພະນັກງານຜູ້ມີຄວາມຊຳນານ ແລະ ມີປະສົບການຫຼາຍຂອງ ສວນສັດ ຖາວເກີ່ມວຽນ, ໃນຕະຫຼອດລາຍການຍັງໄດ້ແນະນຳໃຫ້ແຂກທ່ອງທ່ຽວມີຄວາມເຂົ້າໃຈແຈ້ງກວ່າກ່ຽວກັບວິຖີຊີວິດ ແລະ ປະຕິກິລິຍາຂອງສັດແຕ່ລະປະເພດ, ພ້ອມດ້ວຍບັນດາເລື່ອງລາວກ່ຽວກັບທີ່ມາຂອງຊື່ເອີ້ນ, ຊື່ຫຼີ້ນຂອງແຕ່ລະໂຕເມື່ອໄດ້ຮັບລ້ຽງ ແລະ ການເບິ່ງແຍງຢູ່ທີ່ນີ້ເປັນຄືແນວໃດ. ຮວ່າງຖຸ່ຍຢວຽນ, ຍິງສາວ ອາຍຸ 22 ປີ ຈາກ ຮ່າໂນ້ຍ ເຂົ້າໄປນະຄອນ ໂຮ່ຈີມີນ ເພື່ອເຂົ້າຮ່ວມລາຍການທ່ອງທ່ຽວຕອນກາງຄືນ ສວນສັດ ຖາວເກີ່ມວຽນ ນີ້ ໄດ້ແບ່ງປັນວ່າ:
“ໂດຍໄດ້ເຂົ້າຮ່ວມລາຍການທ່ອງທ່ຽວຍາມກາງຄືນຢູ່ສວນສັດ ຖາວເກີ່ມວຽນ ນ້ອງເຫັນວ່າມ່ວນ ແລະ ຈັບໃຈພໍສົມຄວນ, ໄດ້ຮັບຟັງການແນະນໍາກ່ຽວກັບວິຖີຊີວິດ, ຄວາມຊິນເຄີຍຂອງສັດແຕ່ລະປະເພດ ເຊິ່ງກ່ອນໜ້ານັ້ນນ້ອງຍັງບໍ່ທັນມີໂອກາດໄດ້ເຫັນປະຈັກຕາ. ນ້ອງມັກໝີແມວ ແລະ ຄອບຄົວຂອງມັນເປັນຕາແພງຫຼາຍ”.
ປັດຈຸບັນ, ລາຍການທ່ຽວຊົມຕອນກາງຄືນຢູ່ສວນສັດ ຖາວເກີ່ມວຽນ ພຽງແຕ່ໄດ້ຈັດຂຶ້ນໃນຕອນຄ່ຳວັນເສົາຂອງທຸກອາທິດເທົ່ານັ້ນ. ທ່ານ ຫງວຽນແທັງຍືດ, ຮອງຜູ້ອຳນວຍການສວນສັດ ຖາມເກີ່ມວຽນ, ໃຫ້ຮູ້ວ່າ: ຖາວເກີ່ມວຽນ ປັດຈຸບັນແມ່ນສະມາຊິກຂອງສະຫະສະມາຄົມ ສວນສັດໂລກ, ອາຊີຕາເວັນອອກສ່ຽງໃຕ້ ແລະ ຫວຽດນາມ, ໂດຍມີມາດຖານກ່ຽວກັບສະພາບຮ່າງກາຍ ແລະ ຈິດໃຈຂອງສັດ, ແນໃສ່ນຳມາເຊິ່ງເງື່ອນໄຂດີທີ່ສຸດກ່ຽວກັບສຸຂະພາບທາງກາຍ ແລະ ຈິດໃຫ້ແກ່ສັດ. ດັ່ງນັ້ນ, ເມື່ອສ້າງລາຍການທ່ອງທ່ຽວນີ້ກໍ່ຕ້ອງອີງໃສ່ບັນດາມາດຖານນີ້ ແລະ ມາດຖານອື່ນໆຂອງຂະແໜງສັດລ້ຽງ, ກະສິກຳ ແລະ ປ່າໄມ້; ສຸມໃສ່ຂົງເຂດສັດເຄື່ອນໄຫວຕອນກາງຄືນ, ຮັບປະກັນກ່ຽວກັບດ້ານສຽງ, ແສງ, ການກະທົບຕອບ ເພື່ອບໍ່ສົ່ງຜົນກະທົບຕໍ່ບັນດາສັດປະເພດຕ່າງໆ. ທ່ານ ຫງວຽນແທັງຍືດ ແບ່ງປັນວ່າ:
“ເລື່ອງເປີດກວ້າງລາຍການທ່ອງທ່ຽວເພື່ອໃຫ້ແຂກທ່ອງທ່ຽວມີຄວາມເຂົ້າໃຈກ່ຽວກັບການເຄື່ອນໄຫວອື່ນຂອງ ຖາວເກີ່ມວຽນ ກໍເປັນການດີ, ແຕ່ການຈັດຕາມລະດັບໃດ ກໍຕ້ອງອີງໃສ່ມາດຖານກ່ຽວກັບສະພາບຮ່າງກາຍ ແລະ ຈິດໃຈຂອງສັດ, ໝາຍຄວາມວ່າ ຕ້ອງເຮັດແນວໃດໃຫ້ສັດແຕ່ລະປະເພດຢູ່ທີ່ນີ້, ທັງສັດເຄື່ອນໄຫວຕອນກາງຄືນ ແລະ ຕອນກາງເວັນມີເວລາພັກຜ່ອນ, ຮັບປະກັນບັນດາການເຄື່ອນໄຫວຊິນເຄີຍ ແລະ ບໍ່ສົ່ງຜົນກະທົບຕໍ່ລາຍການຂອງຕົນ, ສະນັ້ນ ປັດຈຸບັນພວກຂ້າພະເຈົ້າກໍພວມພິຈາລະນາຢ່າງລະມັດລະວັງ”.
ເມື່ອເຄື່ອນຍ້າຍອອກຈາກບັນຍາກາດທີ່ຄຶກຄື້ນເນື່ອງນັນ, ເພື່ອເຂົ້າຮ່ວມລາຍການ “ຍາມຕາເວັນຕົກດິນ" ແຂກທ່ອງທ່ຽວຈະໄດ້ເຊື່ອມຕົວໃນບັນຍາກາດທີ່ມິດງຽບ, ຮັບຟັງສຽງຂອງທຳມະຊາດ ແລະ ສຳຜັດກັບຄວາມງາມແບບລຶກລັບມະຫັດສະຈັນຂອງຕອນກາງຄືນ, ອັນໄດ້ນຳມາເຊິ່ງຄວາມສະຫວາດສະເຫວີຍທີ່ໜ້າຈັບໃຈ./.
