ໃນອາທິດຜ່ານມາ, ພະແນກກະຈາຍສຽງບັນດາລາຍການພາກພາສາຕ່າງປະເທດ, ວິທະຍຸກະຈາຍສຽງຫວຽດນາມ ໄດ້ຮັບຈົດໝາຍ, ອີເມວ 331 ສະບັບ ແລະ ໂທລະສັບຫຼາຍສາຍ ຈາກທ່ານຜູ້ຟັງທີ່ມາຈາກ 34 ປະເທດ ແລະ ເຂດແຄ້ວນ. ໃນນັ້ນ, ລາຍການພາກພາສາລາວ ໄດ້ຮັບຈົດໝາຍ, ອີເມວ 21 ສະບັບຈາກທ່ານຜູ້ຟັງລາວ.
ເພື່ອນ ດາວວົງ, ຢູ່ນະຄອນຫຼວງ ວຽງຈັນ ໄດ້ສົ່ງຂໍ້ຄວາມມາຫາລາຍການ ໂດຍແບ່ງປັນວ່າ: VOV ປະສົບຜົນສຳເລັດທີ່ສຸດໃນເລື່ອງສົມທົບບັນດາລາຍການກະຈາຍສຽງກັບເວັບໄຊ ແລະ ສະໜອງຂໍ້ມູນຂ່າວສານຢ່າງຄົບຖ້ວນໃນຄື້ນວິທະຍຸ ແລະ ອິນເຕີເນັດ. ຂ້າພະເຈົ້າເອງເຫັນວ່າ ນີ້ແມ່ນວິທີສົ່ງຂໍ້ມູນຂ່າວສານໃຫ້ທ່ານຜູ້ຟັງຢ່າງມີປະສິດທິຜົນທີ່ສຸດ.
 ວັນຄູ ຫວຽດນາມ ທີ 20 ພະຈິກ(ພາບປະກອບ)
|
ເພື່ອນ ທິບພະຈັນ ໄດ້ສົ່ງຂໍ້ຄວາມມາຫາລາຍການ ດ້ວຍເນື້ອໃນທີ່ວ່າ: ຂ້າພະເຂົ້າເຄີຍຮຽນຢູ່ມະຫາວິທະຍາໄລວັດທະນະທຳ ຮ່າໂນ້ຍ, ເນື່ອງໃນໂອກາດວັນຄູ ຫວຽດນາມ ທີ 20 ພະຈິກ ຈະມາເຖິງນີ້, ຜ່ານລາຍການ ຂ້າພະເຈົ້າຂໍສົ່ງຄຳອວຍພອນອັນດີງາມທີ່ສຸດເຖິງບັນດາຄູອາຈານ ແທນຄຳຂອບໃຈ, ສະແດງຄວາມຮູ້ບຸນຄຸນຢ່າງເລິກເຊິ່ງ ຕໍ່ຄູອາຈານທີ່ໄດ້ສິດສອນນັກສຶກສາມາຫຼາຍລຸ້ນຄົນ, ໂດຍສະເພາະແມ່ນນັກສຶກສາທີ່ເປັນຊາວຕ່າງປະເທດ ຄືຂ້າພະເຈົ້າ. ຂ້າພະເຈົ້າຂໍອວຍພອນໃຫ້ບັນດາຄູອາຈານ ຈົ່ງມີສຸຂະພາບເຂັ້ມແຂງ ເພື່ອສືບຕໍ່ພາລະກິດແຫ່ງການສຶກສາ ບຳລຸງສ້າງ, ເຍືອງທາງໃຫ້ນັກສຶກສາລຸ້ນຕ່າງໆ ເພື່ອໃຫ້ເຂົາເຈົ້າມຸ່ງໄປສູ່ອະນາຄົດທີ່ສົດໄສ.
ເພື່ອນ ພອນແສງ ຢູ່ແຂວງ ບໍລິຄຳໄຊ ສົ່ງຄຳຂໍຜ່ານສື່ Facebook ມາຫາລາຍການ ໂດຍຢາກຊອກຮູ້ເນື້ອໃນກອງປະຊຸມຂອງສະມາຄົມມິດຕະພາບ ຫວຽດນາມ - ລາວ ນະຄອນ ໂຮ່ຈີມິນ, ອາຍຸການ 2022-2027 ແລະ ຂໍ້ມູນຂອງຜູ້ທີ່ໄດ້ຮັບເລືອກຕັ້ງດຳລົງຕຳແໜ່ງປະທານສະມາຄົມມິດຕະພາບ ຫວຽດນາມ - ລາວ ນະຄອນ ໂຮ່ຈີມິນ.
ເພື່ອນ ພອນແສງ ທີ່ຮັກແພງ, ວັນທີ 11 ພະຈິກ ຜ່ານມາ, ສະມາຄົມມິດຕະພາບ ຫວຽດນາມ - ລາວ ນະຄອນ ໂຮ່ຈີມິນ ໄດ້ຈັດກອງປະຊຸມໃຫຍ່ຜູ້ແທນຄັ້ງທີ 3, ອາຍຸການ 2022 – 2027. ເຂົ້າຮ່ວມກອງປະຊຸມມີຜູ້ແທນທາງການ 51 ຄົນ ທີ່ຕາງໜ້າໃຫ້ບັນດາຄະນະຕິດຕໍ່, ສາຂາສະມາຄົມມິດຕະພາບ ຫວຽດນາມ - ລາວ ຢູ່ນະຄອນ ໂຮ່ຈີມິນ. ບົດລາຍງານຂອງຄະນະບໍລິຫານສະມາຄົມມິດຕະພາບ ຫວຽດນາມ - ລາວ ນະຄອນ ໂຮ່ຈີມິນ ອາຍຸການຜ່ານມາ ໄດ້ຍົກໃຫ້ເຫັນຜົນງານພົ້ນເດັ່ນທີ່ສຳຄັນໃນການເຄື່ອນໄຫວການທູດປະຊາຊົນ, ຮ່ວມມືມິດຕະພາບຢ່າງຮອບດ້ານລະຫວ່າງນະຄອນ ໂຮ່ຈີມິນ ກັບ ນະຄອນຫຼວງວຽງຈັນ, ແຂວງ ຈຳປາສັກ ແລະ ແຂວງ ສະຫວັນນະເຂດ, ປະເທດ ລາວ ໃນຫຼາຍຂົງເຂດ. ໃນນັ້ນມີວຽກງານໂຄສະນາ, ສຶກສາກ່ຽວກັບມູນເຊື້ອມິດຕະພາບ, ຄວາມສາມັກຄີແບບພິເສດ, ການຮ່ວມມືຮອບດ້ານລະຫວ່າງ ຫວຽດນາມ - ລາວ ແລະ ບັນດາການເຄື່ອນໄຫວຕອບບຸນແທນຄຸນ, ຊ່ວຍເຫຼືອປະຊາຊົນ ລາວ.
 ຄະນະບໍລິຫານງານສະມາຄົມມິດຕະພາບ ຫວຽດນາມ - ລາວ ນະຄອນ ໂຮ່ຈີມິນ, ອາຍຸການ 2022 – 2027(ພາບ: hcmcpv.org.vn)
|
ກອງປະຊຸມໃຫຍ່ໄດ້ເລືອກຕັ້ງຄະນະບໍລິຫານງານສະມາຄົມມິດຕະພາບ ຫວຽດນາມ - ລາວ ນະຄອນ ໂຮ່ຈີມິນ, ອາຍຸການ 2022 – 2027 ລວມມີສະມາຊິກ 31 ທ່ານ. ໃນນັ້ນ, ທ່ານ ໂງມິນເຈົາ, ເກີດປີ 1964, ຢູ່ຕາແສງ ບິ່ງແຈັງ, ເມືອງ ບິ່ງແຈັງ, ນະຄອນ ໂຮ່ຈີມິນ, ຮຽນຈົບປະລິນຍາໂທຂະແໜງກົດໝາຍ, ມະຫາວິທະຍາໄລຄວາມສະຫງົບປະຊາຊົນ, ມະຫາວິທະຍາໄລເສດຖະກິດ. ປະຈຸບັນມີຍົດເປັນພົນຈັດຕະວາ,ດຳລົງຕຳແໜ່ງເປັນຮອງປະທານຄະນະກຳມະການປະຊາຊົນນະຄອນ ໂຮ່ຈີມິນ, ເປັນກຳມະການຂອງກຳມາທິການປ້ອງກັນຊາດ ແລະ ປ້ອງກັນຄວາມສະຫງົບຂອງສະພາແຫ່ງຊາດ ໄດ້ຮັບເລືອກຕັ້ງ ເປັນປະທານສະມາຄົມມິດຕະພາບ ຫວຽດນາມ - ລາວ ນະຄອນ ໂຮ່ຈີມິນ ຕື່ມອີກອາຍຸການໜຶ່ງ, ອາຍຸການ 2022 – 2027.
ເພື່ອນ ບຸນທັດ ຢູ່ແຂວງ ວຽງຈັນໄດ້ສົ່ງອີເມວມາຫາລາຍການ ດ້ວຍເນື້ອໃນຢາກຊອກຮູ້ຂໍ້ມູນກ່ຽວກັບ “ສັບປະດາມະຫາສາມັກຄີທົ່ວປວງຊົນທັງຊາດ - ມໍລະດົກວັດທະນະທຳ ຫວຽດນາມ ປີ 2022” ຈະໄດ້ຈັດຂຶ້ນໃນເວລາໃດ, ຢູ່ໃສ ແລະ ມີການເຄື່ອນໄຫວຕົ້ນຕໍໃດແດ່.
 “ສັບປະດາມະຫາສາມັກຄີທົ່ວປວງຊົນທັງຊາດ - ມໍລະດົກວັດທະນະທຳ ຫວຽດນາມ” ປີ 2022 ດຳເນີນແຕ່ວັນທີ 18 – 23(ພາບ: dangcongsan.vn)
|
ເພື່ອນ ບຸນທັດ ທີ່ຮັກແພງ, ຕອນເຊົ້າວັນທີ 11 ພະຈິກ, ຢູ່ ຮ່າໂນ້ຍ, ກະຊວງວັດທະນະທຳ, ກິລາ ແລະ ທ່ອງທ່ຽວ ຫວຽດນາມ ໄດ້ຈັດກອງປະຊຸມຖະແຫຼງຂ່າວກ່ຽວກັບ “ສັບປະດາມະຫາສາມັກຄີທົ່ວປວງຊົນທັງຊາດ - ມໍລະດົກວັດທະນະທຳ ຫວຽດນາມ” ປີ 2022. ຕາມນັ້ນແລ້ວ, ເຫດການຈະດຳເນີນແຕ່ວັນທີ 18 – 23, ຢູ່ບ້ານວັດທະນະທຳ - ທ່ອງທ່ຽວບັນດາເຜົ່າ ຫວຽດນາມ (ຮ່າໂນ້ຍ).
ສັບປະດາດັ່ງກ່າວລວມມີບັນດາການເຄື່ອນໄຫວຕົ້ນຕໍຄື: ຈັດງານບຸນ, ຮີດຄອງປະເພນີຂອງບັນດາເຜົ່າຄືນໃໝ່; ກອງປະຊຸມພົບປະນັກສິລະປະການ ແລະ ຜູ້ມີການປະກອບສ່ວນຫຼາຍຢ່າງໃນວຽກງານອະນຸລັກຮັກສາ, ເສີມຂະຫຍາຍວັດທະນະທຳບັນດາເຜົ່າສ່ວນໜ້ອຍເຂດພາກເໜືອ; ວາງສະແດງໂຄສະນາບັນດາຜະລິດຕະພັນວັດທະນະທຳທີ່ເປັນເອກະລັກສະເພາະ; ງານວາງສະແດງຊຸດອາພອນບັນດາເຜົ່າສ່ວນໜ້ອຍ ຫວຽດນາມ… ໃນນັ້ນ, ງານມະໂຫລານສະແດງຊຸດອາພອນບັນດາເຜົ່າສ່ວນໜ້ອຍ ຫວຽດນາມ ເຂດພາກເໜືອ ຄັ້ງທີ 1, ປີ 2022 ຈະດຳເນີນແຕ່ວັນທີ 18 – 20 ພະຈິກ, ດ້ວຍການເຂົ້າຮ່ວມຂອງບັນດານັກສິລະປະການ, ນັກສະແດງບັນດາເຜົ່າທີ່ພວມດຳລົງຊີວິດ, ຮ່ຳຮຽນ ແລະ ເຮັດວຽກຢູ່ແຂວງຕ່າງໆທາງພາກເໜືອ. ງານມະໂຫລານແມ່ນໂອກາດເພື່ອໂຄສະນາ, ແນະນຳບັນດາຄຸນຄ່າຂອງຊຸດອາພອນ ແລະ ວັດທະນະທຳທີ່ເປັນມູນເຊື້ອຂອງບັນດາເຜົ່າສ່ວນໜ້ອຍ ຫວຽດນາມ ໃຫ້ເພື່ອນມິດຢູ່ພາຍໃນ ແລະ ຕ່າງປະເທດ.
ເພື່ອນ ມະນີວົງ, ຢູ່ແຂວງ ບໍ່ແກ້ວ ໄດ້ສົ່ງຂໍ້ຄວາມມາຫາລາຍການ ໂດຍໃຫ້ຮູ້ວ່າ: ຂ້າພະເຈົ້າໄດ້ຮູ້ມາວ່າ ມີຫຼາຍວັນໃນປີແມ່ນວັນເຊີດຊູແມ່ຍິງ ແລະ ວັນທີ 19 ພະຈິກ ແຕ່ລະປີແມ່ນວັນຜູ້ຊາຍສາກົນ. ຂ້າພະເຈົ້າຢາກຊອກຮູ້ກ່ຽວກັບປະຫວັດຄວາມເປັນມາຂອງວັນນີ້?
ເພື່ອນ ມະນີວົງ ທີ່ຮັກແພງ, ວັນຜູ້ຊາຍສາກົນ ແມ່ນເຫດການສາກົນ ໄດ້ຈັດຂຶ້ນໃນວັນທີ 19 ພະຈິກ ຂອງທຸກໆປີ. ວັນນີ້ໄດ້ເລີ່ມປະຕິບັດມາແຕ່ປີ 1999 ຢູ່ປະເທດ Trinidad ແລະ Tobago ແລະ ໄດ້ໃຫ້ການສະໜັບສະໜູນຈາກສະຫະປະຊາຊາດ, ບັນດາກຸ່ມຜູ້ຊາຍຢູ່ ອາເມລິກາ, ເອີລົບ, ອາຊີ, ອາຟະລິກາ…. ຈຸດປະສົງຂອງວັນຜູ້ຊາຍສາກົນ ບໍ່ໝາຍຄວາມວ່າເພື່ອແກ້ງແຍ້ງກັບວັນແມ່ຍິງສາກົນ, ແຕ່ແມ່ນເພື່ອຈຸດປະສົງແລກປ່ຽນບົດຮຽນຂອງຜູ້ຊາຍນຳກັນ; ສຸມໃສ່ບັນຫາສຸຂະພາບ ແລະ ເດັກຊາຍ, ປົວແປງການພົວພັນລະຫວ່າງເພດນຳກັນ, ຊຸກຍູ້ຄວາມສະເໝີພາບລະຫວ່າງຍິງ-ຊາຍ ແລະ ເຮັດໃຫ້ບົດບາດຂອງເພດຊາຍພົ້ນເດັ່ນຂຶ້ນ. ນີ້ແມ່ນໂອກາດເພື່ອໃຫ້ເພດຊາຍຍົກອອກໃຫ້ເຫັນຢ່າງຈະແຈ້ງກ່ຽວກັບການຈຳແນກປະພຶດກັບເຂົາເຈົ້າ ແລະ ການປະກອບສ່ວນຂອງຕົນ, ພິເສດແມ່ນການປະກອບສ່ວນຕໍ່ວົງຄະນາຍາດຊຸມຊົນ, ຄອບຄົວ ແລະ ເບິ່ງແຍງດູແລລູກເຕົ້າ.
