 (ປີ 2019, ມີຜູ້ຮູ້ຈັກອ້າຍ ທຶກ ໄດ້ແນະນຳຮູບແບບລ້ຽງປາອອດສກ້າ ໃຫ້) |
ກວ່າ 5 ປີຜ່ານມາ, ອ້າຍ ຫງວຽນຈິທຶກ (ອາຍຸ 31 ປີ), ຢູ່ບ້ານ ດົງມີ້, ເມືອງ ເຈົາແທັງ, ແຂວງ ເຮົ້າຢາງ ໄດ້ສ້າງຄວາມຮັ່ງມີຈາກການລ້ຽງປາ. ປາທີ່ອ້າຍລ້ຽງນັ້ນບໍ່ແມ່ນປາຈາ, ປາຕອງ, ປາກະເດີດ… ຄືປະຊາຊົນຫຼາຍຄົນຢູ່ໃນແຂວງລ້ຽງນັ້ນ, ຫາກແມ່ນປາອອດສກ້າ (Astronotus ocellatus). ຮູບແບບໃໝ່ດັ່ງກ່າວໄດ້ຊ່ວຍໃຫ້ອ້າຍສ້າງລາຍຮັບກວ່າ 600 ລ້ານດົ່ງ (24.000 USD)/ປີ.
ກ່ອນນີ້ 8 ປີ, ຄືຢູ່ປີ 2017, ອ້າຍ ຫງວຽນຈິທຶກ ໄດ້ເລີ່ມລ້ຽງສິນໃນນ້ຳຢູ່ໃນອ່າງໂດຍເອົາຜ້າບາດປົກ. ປາຊະນິດທຳອິດທີ່ອ້າຍເລືອກລ້ຽງນັ້ນແມ່ນປາຫຼາດ, ເຖິງຢ່າງໃດກໍ່ຕາມ, ປາໃຫຍ່ຊ້າ, ສົ້ນອອກກໍ່ບໍ່ເປັນປົກກະຕິ, ສະນັ້ນ, ອ້າຍຕັດສິນໃຈຢຸດຕິຮູບແບບດັ່ງກ່າວ. ຮອດປີ 2019, ມີຜູ້ຮູ້ຈັກອ້າຍ ທຶກ ໄດ້ແນະນຳຮູບແບບລ້ຽງປາອອດສກ້າ ໃຫ້. ເຫັນວ່າ, ປາລ້ຽງໂຊນີ້ມີຫຼາຍສີ, ມີຫຼາຍຄົນນິຍົມລ້ຽງໂຊ, ສະນັ້ນ ອ້າຍຕົກລົງຊື້ປາແນວພັນ 5.000 ໂຕມາລ້ຽງໃນອ່າງໂດຍເອົາຜ້າບາດປົກ 2 ອ່າງ. ຍ້ອນຍັງບໍ່ທັນກຳແໜ້ນດ້ານເຕັກນິກ, ສະນັ້ນ, ຈຳນວນປາທີ່ອ້າຍລ້ຽງນັ້ນຖືກເສຍໄປ 80%. ແຕ່ກໍ່ບໍ່ທໍ້ຖອຍໃຈ, ອ້າຍ ທຶກ ສືບຕໍ່ຊອກຮູ້ຮ່ຳຮຽນ, ທົດລອງ, ດັດປັບແຫຼ່ງນ້ຳ ແລະ ຂັ້ນຕອນເບິ່ງແຍງບົວລະບັດ ຫຼັງຈາກນັ້ນຈຶ່ງລົງທຶນຊື້ປາແນວພັນ 10.000 ໂຕມາລ້ຽງຕື່ມອີກ. ໃນຄັ້ງນີິ້, ຝູງປາໄດ້ພັດທະນາເປັນຢ່າງດີ ແລະ ຫຼັງຈາກນັ້ນກໍ່ໄດ້ອອກໄຂ່. ອ້າຍ ທຶກ ໃຫ້ຮູ້ວ່າ:
“ສິ່ງຫຍຸ້ງຍາກທີ່ສຸດແມ່ນແຫຼ່ງນ້ຳ. ຖ້າຫາກເຮົາລ້ຽງປານ້ອຍ, ເຮົາຈະນຳໃຊ້ແຫຼ່ງນ້ຳທີ່ດູດຈາກແມ່ນ້ຳຂຶ້ນອ່າງເກັບນ້ຳ, ຫຼັງຈາກນັ້ນຈຶ່ງປ່ອຍນ້ຳລົງອ່າງຜ່ານບັນດາເຄື່ອງບຳບັດນ້ຳ”.
ປະຈຸບັນ, ຟາມລ້ຽງປາອອດສກ້າ ຂອງອ້າຍ ທຶກ ໄດ້ເປີດກວ້າງກວ່າ 1.000 ຕາແມັດ, ດ້ວຍອ່າງລ້ຽງ 70 ອ່າງ, ມີ ປາພໍ່ແມ່ພັນ 70 ຄູ່ ແລະ ປາແນວພັນກວ່າ 50.000 ໂຕ, ລວມມີປາອອດສກ້າ 2 ຊະນິດ ແມ່ນປາອອດສກ້າ ດຳ ແລະ ປາອອດສກ້າ ຂາວ. ຍ້ອນຮູບຮ່າງປາງາມ, ແຂງແຮງ, ສະນັ້ນ ຟາມຂອງອ້າຍໄດ້ດຶງດູດລູກຄ້າຢູ່ຫຼາຍແຂວງ, ນະຄອນໃນທົ່ວປະເທດມາຊື້. ແຕ່ລະປີ, ອ້າຍ ທຶກ ໄດ້ຂາຍປາແນວພັນໃຫ້ພໍ່ຄ້າຊາວຂາຍແຕ່ 200.000 – 300.000 ໂຕ, ດ້ວຍລາຄາແຕ່ 3.000 – 100.000 ດົ່ງ (0,15 – 4 USD)/ໂຕ, ໂດຍອີງຕາມໂຕໃຫຍ່, ນ້ອຍ ແລະ ສີຂອງມັນ. ຍ້ອນເຫດນັ້ນ, ອ້າຍໄດ້ເກັບລາຍຮັບກວ່າ 600 ລ້ານດົ່ງ/ປີ. ອ້າຍ ທຶກ ແບ່ງປັນວ່າ:
“ໃນເບື້ອງຕົ້ນຂອງການລ້ຽງປານັ້ນ, ຕະຫຼາດສົ້ນອອກກໍ່ຍັງບໍ່ທັນກຳແໜ້ນໄດ້… ຫຼັງຈາກນັ້ນ, ຂ້າພະເຈົ້າຈຶ່ງຊອກຮູ້ທາງອິນເຕີເນັດກ່ຽວກັບຕະຫຼາດປາລ້ຽງໂຊຂອງບັນດາແຂວງ, ນະຄອນ. ຂ້າພະເຈົ້າກໍ່ໄດ້ເອົາລົງບັນດາເວັບໄຊຊື້ຂາຍປາລ້ຽງໂຊ ແລະ ກໍ່ມີຜູ້ມາຊອກຊື້. ປະຈຸບັນ, ພໍ່ຄ້າຊາວຂາຍຊື້ປາຫຼາຍທີ່ສຸດແມ່ນຢູ່ນະຄອນ ຫາຍຟ່ອງ, ດ່ານັ້ງ ແລະ ເລິມດົ່ງ, ແຕ່ລະເທື່ອກໍ່ຊື້ແຕ່ 7.000 ຫາ 10.000 ໂຕ”.
 (ຮູບແບບລ້ຽງປາອອດສກ້າ) |
ໂດຍແມ່ນຮອງເລຂາຄະນະຊາວໜຸ່ມ, ປະທານສະຫະພັນຊາວໜຸ່ມ ຫວຽດນາມ ເທດສະບານ ງ້າເຊົ໋າ, ເມືອງ ເຈົາແທັງ, ສະນັ້ນ, ເມື່ອຮູບແບບລ້ຽງປາອອດສກ້າ ບັນລຸຜົນສຳເລັດນັ້ນ, ອ້າຍ ທຶກ ໄດ້ຈັດໃຫ້ສະມາຊິກຊາວໜຸ່ມ, ໄວໜຸ່ມທ້ອງຖິ່ນມາຮ່ຳຮຽນເປັນປະຈຳ ແລະ ແບ່ງປັນບົດຮຽນຢ່າງສຸດໃຈ ແລະ ສະໜອງປາແນວພັນທີ່ມີຄຸນນະພາບສູງເພື່ອໃຫ້ບັນດາສະມາຊິກຊາວໜຸ່ມ, ໄວໜຸ່ມ startup.
ພ້ອມກັນນັ້ນ, ອ້າຍ ທຶກ ຍັງສ້າງວຽກເຮັດງານທຳທີ່ເປັນປົກກະຕິໃຫ້ຄົນງານທ້ອງຖິ່ນ 5 ຄົນ, ດ້ວຍລາຍຮັບ 7 ລ້ານດົ່ງ (ປະມານ 300 USD)/ເດືອນ/ຄົນ. ໃນເວລາປາອອກໄຂ່ ຫຼື ເກັບປາ, ອ້າຍ ທຶກ ຕ້ອງຈ້າງຄົນງານຕື່ມອີກ 20 ຄົນເພື່ອຮັບໃຊ້ວຽກງານ. ອ້າຍ ຫງວຽນຫິວງີ້, ເລຂາຄະນະຊາວໜຸ່ມເມືອງ ເຈົາແທັງ, ໃຫ້ຮູ້ວ່າ:
“ຜົນສຳເລັດຂອງອ້າຍ ທຶກ ໄດ້ນຳມາເຊິ່ງກຳລັງໜູນທີ່ໃຫຍ່ໃຫ້ແກ່ຊາວໜຸ່ມຢູ່ທ້ອງຖິ່ນ, ມີຊາວໜຸ່ມຫຼາຍຄົນມີແນວຄິດ startup. ໂດຍແມ່ນສະມາຊິກຊາວໜຸ່ມທີ່ມີຄວາມຈູບຈ້າວຫ້າວຫັນ, ສຸດຈິດສຸດໃຈໃນວຽກງານຊາວໜຸ່ມ, ອ້າຍ ຫງວຽນຈິທຶກ ໄດ້ໜູນຊ່ວຍດ້ານເຕັກນິກ, ແນວພັນສັດລ້ຽງໃຫ້ແກ່ຊາວໜຸ່ມຢູ່ທ້ອງຖິ່ນປະຕິບັດຮູບແບບ ເພື່ອສ້າງວຽກເຮັດງານທຳ, ສ້າງລາຍຮັບໃຫ້ເປັນປົກກະຕິໃນໄລຍະຈະມາເຖິງ”.
ປະຈຸບັນ, ອ້າຍ ທຶກ ພວມມີແນວຄວາມຄິດປ່ຽນ gen ເພື່ອສ້າງເປັນປາພັນໃໝ່ດ້ວຍຮູບຮ່າງ, ສີສັນທີ່ງາມກວ່າ ແນໃສ່ຍົກສູງມູນຄ່າດ້ານເສດຖະກິດໃຫ້ແກ່ປາຊະນິດນີ້. ຫວ່າງມໍ່ໆມານີ້, ທ້າຍເດືອນ ພະຈິກ 2024, ອ້າຍ ທຶກ ແມ່ນ 1 ໃນຈຳນວນຊາວໜຸ່ມ 36 ຄົນໃນທົ່ວປະເທດໄດ້ຮັບລາງວັນ ເລືອງດິງກົ໋ວ ຄັ້ງທີ 14 ຈາກສູນກາງຄະນະຊາວໜຸ່ມກອມມູນິດ ໂຮ່ຈີມິນ. ນີ້ແມ່ນຂອງລາງວັນອັນສູງສົ່ງເພື່ອຍ້ອງຍໍ, ເຊີດຊູບັນດາຊາວໜຸ່ມຜູ້ມີຜົນງານດີເດັ່ນໃນການຜະລິດ, ດຳເນີນທຸລະກິດ, ຖ່າຍທອດຄວາມກ້າວໜ້າດ້ານວິທະຍາສາດ, ເຕັກນິກ, ອຸດສາຫະກຳກະສິກຳ, ປົກປັກຮັກສາສິ່ງແວດລ້ອມ ແລະ ກໍ່ສ້າງຊົນນະບົດໃໝ່.
