 ທ່ານ ຫງວຽນຟີດຶກ ປະທານສະພາສະຫະກອນ ເຢືອງຫຼຽວ |
“ຂໍ້ລິເລີ່ມຂອງທ່ານ ດຶກ ແມ່ນບາດກ້າວບຸກທະລຸນຳລາຍຮັບຂອງຜູ້ອອກແຮງງານຈາກສອງສາມແສນດົ່ງ ມາຮອດປັດຈຸບັນສະເລ່ຍແຮງງານແຕ່ລະຄົນແມ່ນ 6,5 ລ້ານດົ່ງ”
“ເມື່ອເວົ້າເຖິງຂໍ້ລິເລີ່ມປະດິດຄິດສ້າງຂອງອາວ ດຶກ ກໍ່ເຫັນວ່າມີຫຼານທີ່ສຸດ. ພວກຂ້າພະເຈົ້າມີຄວາມນິຍົມນັບຖືຕໍ່ຄວາມຄິດກໍ່ຄື ວິທີຊີ້ນຳນຳພາຂອງອາວໃນວຽກງານ”.
ນັ້ນແມ່ນບັນດາຂໍ້ສັງເກດຂອງສະມາຊິກສະຫະກອນ ເຢືອງຫຼຽວ ກ່ຽວກັບທ່ານ ດຶກ ປີນີ້ອາຍຸ 68 ປີ, ປັດຈຸບັນແມ່ນປະທານສະພາສະຫະກອນ ເຢືອງຫຼຽວ. ທ່ານແມ່ນຜູ້ສ້າງແຜນປັບປຸງປ່ຽນແປງໃໝ່ສະຫະກອນຕາມກົດໝາຍວ່າດ້ວຍສະຫະກອນປີ 2022 ເຊິ່ງເປັນການເປີດຊ່ອງທາງໃຫ້ບັນດາສະຫະກອນອື່ນໆເຂົ້າຮ່ວມຮູບແບບດຳເນີນທຸລະກິດການຄ້າການທ່ອງທ່ຽວດ້ວຍການສ້າງຕັ້ງວິສາຫະກິດຂຶ້ນກັບວິສາຫະກອນ. ທ່ານ ຫວຽນຟີດຶກ ເວົ້າວ່າ:
“ແຜນປັບປຸງ ປ່ຽນແປງໃໝ່ສະຫະກອນນັ້ນ ພວກຂ້າພະເຈົ້າຢັ້ງຢືນວ່າ ນີ້ແມ່ນຮູບແບບທຳອິດຂອງນະຄອນ ຮ່າໂນ້ຍ. ພາຍຫຼັງກົດໝາຍວ່າດ້ວຍສະຫະກອນເລີ່ມມີຜົນສັກສິດນັ້ນ, ພວກຂ້າພະເຈົ້າກໍ່ໄດ້ລາຍງານຕໍ່ອຳນາດການປົກຄອງຕາແສງ ເຊິ່ງແມ່ນອົງການສ້າງແຜນປ່ຽນແປງໃໝ່ສະຫະກອນ. ເມື່ອສ້າງແຜນໃຫ້ສະຫະກອນ, ພວກຂ້າພະເຈົ້າກໍ່ໄດ້ປັບປຸງໂຄງປະກອບແຫຼ່ງທຶນ, ຕີລາຄາຄືນຊັບສິນເພື່ອຢັ້ງຢືນວ່າຜູ້ໃດມີຄວາມສຸດຈິດສຸດໃຈພ້ອມກັບສະຫະກອນຈະເຂົ້າເປັນສະມາຊິກ”.
ປັດຈຸບັນຈຳນວນສະມາຊິກກຳມະກອນຈົດທະບຽນເຂົ້າຮ່ວມຂຶ້ນເຖິງເກືອບ 2.500ຄົນແລະ ລູກຄ້ານຳໃຊ້ການບໍລິການສະຫະກອນກໍ່ຫຼວງຫຼາຍດ້ວຍ ຫຼາຍກວ່າ 5.000 ຄົນ. ທ່ານ ຟີວັນຄາງ ອະດີດຫົວໜ້າສະຫະກອນ ແລະ ແມ່ນສະມາຊິກອາວຸໂສຂອງສະຫະກອນ ເຢືອງຫຼຽວ ໃຫ້ຮູ້ວ່າ:
“ທາງສະຫະກອນໂດຍສະເພາະແມ່ນທ່ານດຶກ ໄດ້ນຳວິທະຍາສາດເຕັກນິກເຂົ້າໃນການຜະລິດ ດຳເນີນທຸລະກິດໂດຍໄວ ພ້ອມທັງໜູນຊ່ວຍຜູ້ອອກແຮງງານ, ຄອບຄົວສະມາຊິກສະຫະກອນພັດທະນາເສດຖະກິດ ແລະ ໜູນຊ່ວຍບັນດາວິສາຫະກິດສ້າງວຽກເຮັດງານທຳໃຫ້ແກ່ບັນດາຄອບຄົວເປົ້າໝາຍທີ່ບໍ່ມີວຽກເຮັດງານທຳຢູ່ທ້ອງຖິ່ນ. ປັດຈຸບັນຊາວ ເຢືອງຫຼຽວ ໄດ້ພໍກິນພໍຢູ່ ພ້ອມທັງມີສ່ວນແຮ່ໄວ້ ເພື່ອເສດຖະກິດພັດທະນາ”.
ໜຶ່ງໃນບັນດາຂົງເຂດທີ່ທ່ານ ແລະ ສະຫະກອນເອົາໃຈໃສ່ທີ່ສຸດ ແມ່ນການຟື້ນຟູອະນຸລັກ ແລະ ພັດທະນາອາຊີບຫັດຖະກຳ ເປັນຕົ້ນແມ່ນອາຊີບທັກແສ່ວ. ສິ່ງນີ້ປະກອບສ່ວນຊຸກຍູ້ການພັດທະນາເສດຖະກິດຂອງທ້ອງຖິ່ນ. ທ່ານ ຫງວຽນບາຮຶງ ປະທານຄະນະກຳມະການປະຊາຊົນຕາແສງ ເຢືອງຫຼຽວ ໃຫ້ຮູ້ວ່າ:
“ປັດຈຸບັນສະຫະກອນໄດ້ປະຕິບັດການຜະລິດດຳເນີນທຸລະກິດໃນຫຼາຍຂົງເຂດ ແລະ ໄດ້ມີການປະກອບສ່ວນຢ່າງໃຫຍ່ຫຼວງເຂົ້າໃນການເຕີບໂຕເສດຖະກິດຂອງທ້ອງຖິ່ນ”.
ສະຫະກອນ ເຢືອງຫຼຽວມີຄົບທຸກຂະແໜງອາຊີບຈາກປຸງແຕ່ງຜະລິດຕະພັນກະເສດ, ເຮັດເສັ້ນລ້ອນ, ຫຍິບປັກທັກແສ່ວຕະຫຼອດຮອດການໂຄສະນາແນະນຳຜະລິດຕະພັນການບໍລິການການຄ້າ ການທ່ອງທ່ຽວ ທ່ານ ຫງວຽນຟີດຶກ ໃຫ້ຮູ້ຕື່ມອີກວ່າ:
“ພວກຂ້າພະເຈົ້າມີສາມເປົ້າໝາຍ ນັ້ນແມ່ນຫັນປ່ຽນຮູບແບບກະສິກຳຊົນນະບົດແບບເກົ່າມາສູ່ກະສິກຳຕົວເມືອງ ແລະ ຍູ້ແຮງການພັດທະນາບັນດາວິສາຫະກິດພັດທະນາການບໍລິການ ເພື່ອຕອບສະໜອງຄວາມຕ້ອງການຂອງປະຊາຊົນໃນເຂດຕົວເມືອງ. ທີສອງ ແມ່ນສືບຕໍ່ຍູ້ແຮງວຽກງານຄຸ້ມຄອງໄຟຟ້າດ້ວຍຄຸນນະພາບດີທີ່ສຸດ ໂປ່ງໃສ, ດູແລລູກຄ້າເປັນຢ່າງດີ. ທີສາມ ຍູ້ແຮງການນຳໃຊ້ເຕັກໂນໂລຊີໃນການຄຸ້ມຄອງ ແລະ ດູແລລູກຄ້າໃນການຜະລິດ”.
ສະຫະກອນໄດ້ຮັບຫຼຽນໄຊແຮງງານຊັ້ນໜຶ່ງ ຊັ້ນສອງ ແລະ ຊັ້ນສາມຈາກປະທານປະເທດພ້ອມກັບໃບຍ້ອງຍໍຫຼາຍໃບຈາກລັດຖະບານ ແລະ ປີກາຍນີ້ສະເພາະທ່ານ ດຶກ ເອງໄດ້ຮັບກຽດກາຍເປັນໜຶ່ງໃນຈຳນວນ 10 ແບບຢ່າງ “ພົນລະເມືອງນະຄອນຫຼວງດີເດັ່ນ”. ທ່ານ ດຶກ ເວົ້າຕໍ່ໄປວ່າ:
“ພວກຂ້າພະເຈົ້າຢືນຢັນວ່າ ໃນຈຸດເວລານີ້ສະຫະກອນກໍ່ໄດ້ມີບັນດາບາດກ້າວຂະຫຍາຍຕົວເພື່ອສືບຕໍ່ພັດທະນາ ເພື່ອໃຫ້ສະຫະກອນກ້າວເດີນຢ່າງໝັ້ນຄົງ ພວກຂ້າພະເຈົ້າກໍ່ໄດ້ມີແນວຄວາມຄິດທີ່ແທດເໝາະຮັບປະກັນໃຫ້ສະຫະກອນປະສົບຜົນສຳເລັດ”.
ໃນວິວັດການພັດທະນາຂອງສະຫະກອນ ເຢືອງຫຼຽວ ເຖິງວ່າປະສົບກັບຄວາມຫຍຸ້ງຍາກຫຼາຍຢ່າງກໍ່ຕາມ ແຕ່ກໍ່ມີຄວາມມ່ວນຊື່ນຄວາມຜາສຸກ ມີບັນດາກຳລັງໜູນ ເພື່ອໃຫ້ທ່ານ ດຶກ ແລະ ບັນດາຜູ້ສຸມຈິດສຸມໃຈກັບສະຫະກອນປ່ຽນແປງໃໝ່ປະດິດຄິດສ້າງຢ່າງບໍ່ຢຸດຢັ້ງ ເພື່ອປະກອບສ່ວນເຂົ້າໃນຄວາມຈະເລີນຮຸ່ງເຮືອງຂອງບ້ານເກີດເມືອງນອນ.
