 ທ່ານຮອງລັດຖະມົນຕີການຕ່າງປະເທດລາວ ທອງພັນ ສະຫວັນເພັດ |
“ຫວຽດນາມ ໄດ້ມີຂໍ້ລິເລີ່ມຫຼາຍສິ່ງຫຼາຍຢ່າງທີ່ເປັນປະໂຫຍດ ຕໍ່ ອາຊຽນ”. ນັ້ນແມ່ນການຕີລາຄາຂອງທ່ານຮອງລັດຖະມົນຕີການຕ່າງປະເທດລາວ ທອງພັນ ສະຫວັນເພັດ ເມື່ອໃຫ້ສຳພາດຕໍ່ນັກຂ່າວ ວິທະຍຸກະຈາຍສຽງຫວຽດນາມ ກ່ອນດຳເນີນກອງປະຊຸມສຸດຍອດ ອາຊຽນ ຄັ້ງທີ 37. ທ່ານຮອງລັດຖະມົນຕີການຕ່າງປະເທດລາວ ທອງພັນ ສະຫວັນເພັດ ຕີລາຄາສູງຕໍ່ລັກສະນະເປັນເຈົ້າການ ແລະ ຄວາມມີໄຫວພິບຂອງ ຫວຽດນາມ ເມື່ອວາງອອກຂໍ້ລິເລີ່ມ ແລະ ຈັດຕັ້ງສຳເລັດບັນດາການເຄື່ອນໄຫວຂອງ ອາຊຽນ ໃນປີທີ່ໄດ້ຮັບຖືວ່າ ມີສິ່ງທ້າທາຍຫຼາຍຢ່າງຈາກໂລກລະບາດໂຄວິດ - 19. ທ່ານກ່າວວ່າ:
ຕາມທ່ານຮອງລັດຖະມົນຕີການຕ່າງປະເທດ ລາວ ທອງພັນ ສະຫວັນເພັດ ແລ້ວ, ເຖິງວ່າປະສົບກັບຄວາມຫຍຸ້ງຍາກຈາກໂລກລະບາດໂຄວິດ - 19 ຕໍ່ຕາມ, ແຕ່ການຮ່ວມມືຂອງ ອາຊຽນ ກັບບັນດາຄູ່ຮ່ວມມືນອກກຸ່ມ ຍັງສືບຕໍ່ໄດ້ດຳເນີນເປັນປົກກະຕິ ແລະ ບັນດາການເຄື່ອນໄຫວລະຫວ່າງບັນດາຝ່າຍ ຍັງຄົງສືບຕໍ່ໄດ້ຮັບການຮັກສາໄວ້. ທ່ານຍັງໃຫ້ຮູ້ຕື່ມອີກວ່າ ການປະກອບສ່ວນພົ້ນເດັ່ນທີ່ສຸດຂອງ ຫວຽດນາມ ໃນປີນີ້ແມ່ນ ຫວຽດນາມ ໄດ້ຍົກອອກຂໍ້ລິເລີ່ມຫຼາຍຢ່າງ ແລະ ປະຕິບັດສຳເລັດບັນດາເປົ້າໝາຍ ແລະ ແຜນການທີ່ໄດ້ວາງອອກທັງໝົດ. ສິ່ງດັ່ງກ່າວ ໄດ້ປະກອບສ່ວນເຂົ້າໃນການປົກປັກຮັກສາສັນຕິພາບ, ສະຖຽນລະພາບ ແລະ ການພັດທະນາຂອງ ອາຊຽນ, ຊ່ວຍໃຫ້ ອາຊຽນ ນັບມື້ນັບມີຄວາມສາມັກຄີ ແລະ ສືບຕໍ່ຮັກສາໄດ້ບົດບາດເປັນໃຈກາງຂອງ ອາຊຽນ ໃນການຮ່ວມມືກັບບັນດາປະເທດພາຍນອກ.
