ວັນທີ 22 ເມສາ, ບັນດາລັດຖະມົນຕີເສດຖະກິດອາຊຽນ - ຍີ່ປຸ່ນ ໄດ້ຮັບຮອງເອົາ “ຖະແຫຼງການຮ່ວມອາຊຽນ - ຍີ່ປຸ່ນ ກ່ຽວກັບຂໍ້ລິເລີ່ມ ຟື້ນຟູເສດຖະກິດຮັບມືກັບໂລກລະບາດໂຄວິດ-19” ຢ່າງເປັນທາງການ ເພື່ອແນໃສ່ຮັບມືກັບບັນດາຜົນຮ້າຍຢ້ອນຫຼັງທາງດ້ານເສດຖະກິດ ແລະ ລະບົບສະໜອງ ຍ້ອນໂລກລະບາດໂຄວິດ-19 ກໍ່ຂຶ້ນ.
ຖະແຫຼງການໄດ້ຢືນຢັນຄວາມເປັນເອກະພາບລະຫວ່າງບັນດາປະເທດອາຊຽນ ແລະ ຍີ່ປຸ່ນ ໃນຄວາມມານະພະຍາຍາມຜັນຂະຫຍາຍບັນດານະໂຍບາຍ ເພື່ອແນໃສ່ບັນລຸໄດ້ 3 ເປົ້າໝາຍຕົ້ນຕໍ, ນັ້ນແມ່ນ: ຮັກສາບັນດາການພົວພັນທາງດ້ານເສດຖະກິດຢ່າງແໜ້ນແຟ້ນລະຫວ່າງອາຊຽນ ແລະ ຍີ່ປຸ່ນ; ຫຼຸດຜ່ອນຜົນກະທົບຈາກໂລກລະບາດໂຄວິດ-19 ທີ່ມີຕໍ່ພື້ນຖານເສດຖະກິດໃຫ້ຢູ່ໃນລະດັບຕ່ຳສຸດ; ເພີ່ມທະວີຄວາມສາມາດໃນການຟື້ນຟູເສດຖະກິດ.
ໃນໄລຍະຈະມາເຖິງ, ບັນດາລັດຖະມົນຕີອາຊຽນ ແລະ ຍີ່ປຸ່ນ ເຫັນດີຊຸກຍູ້ຄວາມເປັນເອກະພາບຕໍ່ “ແຜນການກະທຳເພື່ອຟື້ນຟູເສດຖະກິດອາຊຽນ - ຍີ່ປຸ່ນ” ເພື່ອຜັນຂະຫຍາຍບັນດາມາດຕະການລະອຽດໂດຍໄວ ແນໃສ່ໜູນຊ່ວຍບັນດາວິສາຫະກິດຂອງ 2 ຝ່າຍຮັບມືກັບຜົນຮ້າຍຢ້ອນຫຼັງຈາກໂລກລະບາດໂຄວິດ-19, ປັບປຸງລະບົບສະໜອງຂອງພາກພື້ນ ແລະ ທົ່ວໂລກ, ຟື້ນຟູພື້ນຖານເສດຖະກິດອາຊຽນ ແລະ ຍີ່ປຸ່ນ.
