 (ຜົງຂີ້ໝີ້ນຮັບການຕີລາຄາສູງຈາກຜູ້ບໍລິໂພກ) |
ເອື້ອຍ ເລີມຮັ່ງນີ, ຢູ່ບ້ານ ອົງບິກ, ຕາແສງ ແຄງບິ່ງ, ເມືອງ ເຈິ່ນວັນເທີຍ, ແຂວງ ກ່າເມົາ ໄດ້ສ້າງຮູບແບບຜະລິດຜົງຂີ້ໝີ້ນບັນລຸຜົນສຳເລັດ ແລະ ໄດ້ຮັບການຕີລາຄາສູງຈາກຜູ້ບໍລິໂພກ ຍ້ອນດີຕໍ່ສຸ້ຂະພາບ. ຜະລິດຕະພັນຜົງຂີ້ໝີ້ນຍາດໄດ້ລາງວັນແມ່ຍິງ startup ລະດັບຊາດ.
ເອື້ອຍ ເລີມຮັ່ງນີ startup ຈາກແນວຄິດເກັບຊື້ຂີ້ໝີ້ນສົດຈາກບັນດາຄອບຄົວ ແລະ ຂາຍໃຫ້ບັນດາຕະຫຼາດຂາຍສົ່ງຢູ່ທ້ອງຖິ່ນ. ໂດຍນຳໃຊ້ຂີ້ໝີ້ນທີ່ຖືກຄັດອອກຈາກວິວັດການຂາຍຂີ້ໝີ້ນສົດ, ຜົວເມຍເອື້ອຍໄດ້ຜະລິດອອກຜະລິດຕະພັນຜົງຂີ້ໝີ້ນເພື່ອສະໜອງໃຫ້ຕະຫຼາດ.
“ຂ້າພະເຈົ້າມີແນວຄວາມຄິດ ແລະ ຜະລິດອອກເທົ່ານັ້ນ. ຂ້າພະເຈົ້າເບິ່ງທາງອິນເຕີເນັດກ່ຽວກັບຕະຫຼາດ, ກັບຄົ້ນຄວ້າກ່ຽວກັບປະສິດທິຜົນຂອງຜົງຂີ້ໝີ້ນແມ່ນຄືແນວໃດ. ຖ້າໄດ້ຮັບການໜູນຊ່ວຍຕື່ມອີກ ຫຼື ຂາຍໄດ້ຫຼາຍ ຂ້າພະເຈົ້າຈະສືບຕໍ່ລົງທຶນເຄື່ອງຈັກ, ຕ່ອງໂສ້ຜະລິດ ເພື່ອຍົກສູງມູນຄ່າໃຫ້ແກ່ຜະລິດຕະພັນ”.
ໂດຍຜະລິດຜົງຂີ້ໝີ້ນແຕ່ປີ 2017, ໃນເບື້ອງຕົ້ນເອື້ອຍ ຮັ່ງນີ ປະສົບກັບຄວາມຫຍຸ້ງຍາກຫຼາຍຢ່າງ ຍ້ອນເຮັດດ້ວຍມື ແລະ ສົ້ນອອກບໍ່ເປັນປົກກະຕິ. ໂດຍໄດ້ຮັບການໜູນຊ່ວຍຈາກສະຫະພັນແມ່ຍິງຕາແສງ ແຄງບິ່ງ ໄດ້ເຂົ້າເຖິງແຫຼ່ງທຶນສິນເຊື່ອ, ເອື້ອຍ ນີ ໄດ້ລົງທຶນຊື້ຈັກບົດ, ຈັກອົບຂີ້ໝີ້ນເພື່ອໃຫ້ມີສະມັດຕະພາບສູງກວ່າ, ມີຄຸນນະພາບສູງກວ່າ. ເອື້ອຍ ກໍ່ຄ່ອຍໆດັດປັບຮູບແບບເທື່ອລະກ້າວ, ບັນລຸໃບຢັ້ງຢືນຜະລິດຕະພັນຂອງໂຄງການໜຶ່ງຕາແສງ/ບ້ານ ໜຶ່ງຜະລິດຕະພັນກະສິກຳ (OCOP) 3 ດາວຂອງເມືອງ ເຈິ່ນວັນເທີຍ, ສະນັ້ນ ສົ້ນອອກກໍ່ມີຄວາມສະດວກ. ເອື້ອຍ ເລງອັກຕູ, ຢູ່ຕາແສງ ແຄັງບິ່ງ, ແບ່ງປັນວ່າ:
“ແຕ່ດົນແລ້ວຂ້າພະເຈົ້າພຽງແຕ່ໃຊ້ຜົງຂີ້ໝີ້ນຂອງສະຫະກອນ. ມີສີງາມທີ່ສຸດ, ນຳໃຊ້ເພື່ອປຸງແຕ່ງອາຫານກໍ່ດີ. ຂ້າພະເຈົ້າກໍ່ເອົານ້ຳເຜິ້ງໃສ່ກັບຜົງຂີ້ໝີ້ນເພື່ອກິນໃນຕອນເຊົ້າແຕ່ລະມື້. ມີຫຼາຍແຫ່ງຂາຍຜົງຂີ້ໝີ້ນ, ແຕ່ນັບແຕ່ກ່ອນມາຮອດປະຈຸບັນ, ຂ້າພະເຈົ້າພຽງແຕ່ຊື້ຢູ່ທີ່ນີ້, ເຫັນວ່າຜະລິດຕະພັນມີຄຸນນະພາບດີ”.
 (ໃນເບື້ອງຕົ້ນເອື້ອຍ ຮັ່ງນີ ປະສົບກັບຄວາມຫຍຸ້ງຍາກຫຼາຍຢ່າງ ຍ້ອນເຮັດດ້ວຍມື) |
ກ່ອນນີ້ 2 ປີ, ຄືປີ 2022, ເອື້ອຍ ນີ ໄດ້ສ້າງຕັ້ງສະຫະກອນ ເຍີດຮຸຍ (ຢູ່ບ້ານ ອົງບິກ, ຕາແສງ ແຄັງບິ່ງ), ດ້ວຍສະມາຊິກສະຫະກອນ 8 ຄົນ ໂດຍເອື້ອຍເປັນປະທານສະພາຄຸ້ມຄອງ, ທັງເປັນຫົວໜ້າສະຫະກອນ. ບັນດາສະມາຊິກຂອງສະຫະກອນໄດ້ນຳໃຊ້ເນື້ອທີ່ດິນຢູ່ອ້ອມບ້ານເພື່ອປູກຕົ້ນຂີ້ໝີ້ນ, ສ່ວນສະຫະກອນຈະເກັບຊື້ຜະລິດຕະພັນ. ພ້ອມກັນນັ້ນ, ຍັງເຊື່ອມຕໍ່ກັບບັນດາຄອບຄົວຢູ່ທ້ອງຖິ່ນເພື່ອປູກ, ເພື່ອໃຫ້ມີແຫຼ່ງວັດຖຸດິບສະໜອງເປັນປົກກະຕິ 12 ເຮັກຕາ. ສະຫະກອນຍັງເກັບຊື້ຂີ້ໝີ້ນສົດ ຊ່ວຍໃຫ້ພໍ່ແມ່ປະຊາຊົນຫຼາຍຄົນມີລາຍຮັບຕື່ມອີກ. ບັນດາສະມາຊິກຂອງສະຫະກອນ ເຍີດຮຸຍ ມີຄວາມເອກອ້າງທະນົງໃຈຍ້ອນໄດ້ຜະລິດອອກຜະລິດຕະພັນທີ່ເປັນມິດກັບສິ່ງແວດລ້ອມ, ເພື່ອສຸຂະພາບຂອງທຸກໆຄົນ. ຈາກນັ້ນ, ຫຼາຍຄົນກໍ່ຊົມໃຊ້ຜະລິດຕະພັນຜົງຂີ້ໝີ້ນຫຼາຍກວ່າ. ເອື້ອຍ ເລິມຮັ່ງນີ, ຫົວໜ້າສະຫະກອນ ເຍິດຮຸຍ, ໃຫ້ຮູ້ວ່າ:
“ກ່ຽວກັບແນວພັນ, ສະຫະກອນໄດ້ສະໜອງໃຫ້ພໍ່ແມ່ປະຊາຊົນເພື່ອປູກ. ການບົວລະບັດ, ໃສ່ຝຸ່ນສະຫະກອນຈະສົມທົບ, ຕິດຕາມ ແລະ ສະໜອງຝຸ່ນອົງຄະທາດໃຫ້ພໍ່ແມ່ປະຊາຊົນ. ເວົ້າລວມແລ້ວ, ລະຫວ່າງປະຊາຊົນ ແລະ ສະຫະກອນ ໄດ້ເຊັນສັນຍາ. ພໍ່ແມ່ປະຊາຊົນປູກ, ຂ້າພະເຈົ້າມາເກັບຊື້ໃຫ້”.
ສະຫະກອນຍັງນຳໃຊ້ບັນດາສິ່ງເສດເຫຼືອຂອງຂີ້ໝີ້ນ ເພື່ອເຮັດຝຸ່ນອົງຄະທາດ, ນຳໃຊ້ໃຫ້ລະດູການຕໍ່ໄປ. ສິ່ງດັ່ງກ່າວໄດ້ຊ່ວຍປະຢັດລາຍຈ່າຍ ແລະ ຫຼຸດຜ່ອນສິ່ງເສດເຫຼືອອອກສູ່ສິ່ງແວດລ້ອມ. ເອື້ອຍ ນີ ໄດ້ນຳເອົາໂຄງການຜະລິດຜົງຂີ້ໝີ້ນແດງຂອງສະຫະກອນເຂົ້າຮ່ວມການແຂ່ງຂັນແມ່ຍິງ startup. ໃນເດືອນ ຕຸລາ ຜ່ານມາ, ທີ່ຮອບຊີງຊະນະເລີດທົ່ວປະເທດ, ສະຫະພັນແມ່ຍິງ ຫວຽດນາມ ໄດ້ມອບລາງວັນຊົມເຊີຍໃຫ້ແກ່ໂຄງການຂອງເອື້ອຍ.
ປະຈຸບັນ, ຄິດສະເລ່ຍແຕ່ລະເດືອນ, ສະຫະກອນ ເຍີດຮຸຍ ໄດ້ສະໜອງຜົງຂີ້ໝີ້ນໃຫ້ແກ່ຕະຫຼາດປະມານ 50 ກີໂລກຣາມ, ດ້ວຍລາຄາ 1 ລ້ານດົ່ງ (40 USD)/ກີໂລກຣາມ. ສະຫະກອນກໍ່ຍັງສະໜອງຜະລິດຕະພັນຂີ້ໝີ້ນສົດໃຫ້ແກ່ແມ່ຄ້າຊາວຂາຍຕື່ມອີກ. ໃນໄລຍະຈະມາເຖິງ, ສະຫະກອນປາດຖະໜາຢາກເປີດກວ້າງການຜະລິດ ເພື່ອຕອບສະໜອງຄວາມຕ້ອງການຂອງຕະຫຼາດ, ຜ່ານນັ້ນ, ກໍ່ໄດ້ສ້າງວຽກເຮັດງານທຳໃຫ້ແກ່ຜູ້ອອກແຮງງານທ້ອງຖິ່ນ, ໂດຍສະເພາະແມ່ນເອື້ອຍນ້ອງແມ່ຍິງ.
