 ເຈົ້າກົກເຈົ້າເຫຼົ່າ ຊິວຢໍ (ພາບ: VOV ໄຕງວຽນ) |
ໃນຊຸມວັນທ້າຍອາທິດ, ຢູ່ບ້ານວັດທະນະທຳໝູ່ບ້ານ ອໍງອນ ຍາມໃດກໍ່ມີຄວາມຄຶກຄື້ນມ່ວນຊື່ນດ້ວຍສຽງຄ້ອງສຽງກອງ, ສຽງຮ້ອງເພງພື້ນເມືອງ ແລະ ສຽງເວົ້າສຽວຫົວ… ການສອນຕີຄ້ອງຕີກອງ ແລະ ຮ້ອງເພງພື້ນເມືອງເຜົ່າ ຢາຣາຍ ໄດ້ກາຍເປັນການດຳເນີນຊີວິດດ້ານວັດທະນະທຳເປັນປະຈຳ, ດ້ວຍການເຂົ້າຮ່ວມຂອງ ປຊຊ ທຸກຊັ້ນຄົນເປັນຈຳນວນຫຼາຍ. ໂດຍແມ່ນຜູ້ສ້າງຕັ້ງກຸ່ມເຕົ້າໂຮມແມ່ຍິງໝູ່ບ້ານ ອໍງອນ ພ້ອມກັນເຂົ້າຮ່ວມການຮັກສາສີສັນວັດທະນະທຳຂອງຊາດ, ເອື້ອຍ ຊິວ ເຮິບີອາວ ໃຫ້ຮູ້ວ່າ:
ເພງພື້ນເມືອງ ຢາຣາຍ ກໍ່ມີຫຼາຍບົດໄດ້ຍ້ອງຍໍສັນລະເສີນນັກວິລະຊົນໃນປາງສົງຄາມ, ພິເສດມີຫຼາຍບົດເພງອີງຕາມຈັງຫວະພື້ນເມືອງ ເພື່ອຍ້ອງຍໍສັນລະເສີນລຸງ ໂຮ່. ວຽກງານນີ້ບໍ່ປະສົບກັບຄວາມຫຍຸ້ງຍາກຄືເມື່ອກ່ອນແລ້ວ. ເມື່ອໃຊ້ສະມາດໂຟນກໍ່ສາມາດມີຜົນປະໂຫຍດຕໍ່ວຽກງານ. ຕົວຢ່າງຄື: ເມື່ອສ້າງຕັ້ງກຸ່ມສະມາຊິກສະມາຄົມ, ເມື່ອປະກາດ ຫຼື ແລກປ່ຽນວຽກງານກໍ່ມີຄວາມສະດວກ.
ເຈົ້າກົກເຈົ້າເຫຼົ່າ ຊິວຢໍ ໃຫ້ຮູ້ວ່າ: ປຊຊ ຢູ່ໝູ່ບ້ານ ອໍງອນ ຍາມໃດກໍ່ມີຄວາມສາມັກຄີກັນ. ໃນ 10 ກ່ວາປີທີ່ຜ່ານມາ, ໝູ່ບ້ານ ອໍງອນ ຍາມໃດກໍ່ບັນລຸໄດ້ນາມມະຍົດໝູ່ບ້ານວັດທະນະທຳຂັ້ນແຂວງ. ໃນນັ້ນ ພົ້ນເດັ່ນແມ່ນບັນດາການເຄື່ອນໄຫວອະນຸລັກຮັກສາ ແລະ ເສີມຂະຫຍາຍບັນດາຄຸນຄ່າວັດທະນະທຳທີ່ເປັນມູນເຊື້ອ:
ຂ້າພະເຈົ້າມີຄວາມພາກພູມໃຈ ຍ້ອນວ່າລຸ້ນໜຸ່ມໄດ້ສືບທອດຮຽນຕີຄ້ອງ ແລະ ຮັກສາວັດທະນະທຳທີ່ເປັນມູນເຊື້ອຂອງລຸ້ນພໍ່ລຸ້ນອ້າຍທີ່ປະໄວ້ໃຫ້. ສະເພາະຢູ່ໝູ່ບ້ານ ອໍງອນ ມີ 3 ກອງຕີຄ້ອງໃນ 3 ເກນອາຍຸຄື: ຊາວໜຸ່ມ, ເຍົາວະຊົນ ແລະ ຜູ້ມີອາຍຸສູງ. ມີທັງນັກສິລະປະການ ອາມາງາ ແລະ ນາຍບ້ານ ກໍ່ໄດ້ຕີຄອງນຳອ້າຍນ້ອງ. ຜູ້ມີອາຍຸສູ້ງບໍ່ຕ້ອງຫ່ວງແລ້ວ ຍ້ອນມີກອງຕີຄ້ອງໜຸ່ມສືບທອດແລ້ວ. ຍ້ອນວ່າ ຄ້ອງມີຄວາມສຳຄັນທີ່ສຸດ ໃນຊີວິດດ້ານຈິດວິນຍານ.
 (ພາບ: VOV ໄຕງວຽນ) |
ໝູ່ບ້ານ ອໍງອນ ມີເກືອບ 120 ຄອບຄົວ, ດ້ວຍ ປຊຊ 500 ຄົນ, ເກືອບທັງໝົດແມ່ນຄົນຊົນເຜົ່າ ຢາຣາຍ. ນັບແຕ່ 7 ປີກ່ອນ, ໝູ່ບ້ານບັນລຸໄດ້ມາດຖານຊົນນະບົດໃໝ່ແລ້ວ. ບັນດາການເຄື່ອນໄຫວດ້ານວັດທະນະທຳຄື: ຕີກອງ ຕີຄ້ອງ, ສະແດງເຄື່ອງດົນຕີພື້ນເມືອງ, ຟ້ອນຊວາງ, ຮ້ອງເພງພື້ນເມືອງ… ແມ່ນຄວາມຕ້ອງການທີ່ບໍ່ສາມາດຂາດໄດ້ໃນຊີດວິດຂອງ ປຊຊ, ຍາມໃດກໍ່ໄດ້ຮັບການຮັກສາໄວ້. ທ່ານ ຊິວຮວິ່ງ ນາຍບ້ານ ອໍງອນ ແບ່ງປັນວ່າ:
ສັງຄົມນັບມື້ນັບມີການພັດທະນາຕາມທິດທັນສະໄໝ, ແຕ່ວັດທະນະທຳທີ່ເປັນມູນເຊື້ອອັນດີງາມກໍ່ຕ້ອງໄດ້ຮັບການເສີມຂະຫຍາຍ. ຂ້າພະເຈົ້າເອງກໍ່ພະຍາຍາມຝຶກຊ້ອມຮ້ອງເພງພື້ນເມືອງ, ຮ້ອງບັນດາບົດເພງມູນເຊື້ອປະຕິວັດ ດ້ວຍເພງພື້ນເມືອງ ຢາຣາຍ. ບໍ່ວ່າຜູ້ເຖົ້າແກ່ ຫຼື ຜູ້ໜຸ່ມກໍ່ລ້ວນແຕ່ມີສະຕິຄວາມຮັບຮູ້ຄືແນວນັ້ນ, ດັ່ງນັ້ນ, ໝູ່ບ້ານພວກຂ້າພະເຈົ້າໄດ້ນຳໜ້າໃນທຸກວຽກງານ, ໂດຍສະເພາະແມ່ນຂະບວນການສ້າງຊົນນະບົດໃໝ່.
ທ່ານ ຊິວຄລໍ, ເລຂາຄະນະພັກຕາແສງ ອີອາເວ, ເມືອງ ຈືປຼົງ ໃຫ້ຮູ້ວ່າ, ໃນການສ້າງຊົນນະບົດໃໝ່, ນັບແຕ່ທ້າຍປີ 2018, ໝູ່ບ້ານ ອໍງອນ ບັນລຸໄດ້ບັນດາມາດຖານຂອງເຂດຊາວຊົນເຜົ່າສ່ວນໜ້ອຍ ແລະ ກາຍເປັນໜຶ່ງໃນບັນດາໝູ່ບ້ານຊົນນະບົດໃໝ່ທີ່ເປັນແບບຢ່າງຂອງແຂວງ:
ໝູ່ບ້ານ ອໍງອນ ໄດ້ປະຕິບັດແຜນນະໂຍບາຍ “ລັດ ແລະ ປຊຊ ພ້ອມກັນເຮັດ”, ປຊຊ ໄດ້ເປີດເສັ້ນທາງລະຫວ່າງບ້ານທີ່ສວຍງາມ, ສອງຟາກທາງລ້ວນແຕ່ມີໄຟເຍືອງທາງ. ເຮືອນຊານກໍ່ສວຍງາມ, ສວນກໍ່ມີຮົ້ວ, ມີແຖວຕົ້ນໄມ້ຂຽວສົດງົດງາມ, ຢູ່ໃນແມ່ນສວນປູກກາເຟ, ຕົ້ນພິກໄທ… ປະຈຸບັນ, ຫຼາຍຄອບຄົວໄດ້ກໍ່ສ້າງເຮືອນຢູ່ຢ່າງໃຫ່ຍໂຕ ແລະ ສວຍງາມ, ຊື້ເຄື່ອງອຸປະກອນການຜະລິດ, ການດຳເນີນຊີວິດຄື ລົດໄຖ, ລົດຈັກ… ພິເສດ, ໝູ່ບ້ານມີບ້ານວັດທະນະທຳວົງຄະນະຍາດ, ມີກອງສະແດງຕີຄ້ອງ ແລະ ບັນດາເຄື່ອງດົນຕີພື້ນເມືອງຕ່າງໆຄື: ພິນກອງ, ພິນເຕີຣຶງ….ບັນດານັກສິລະປະກອນ ແລະ ປຊຊ ຍາມໃດກໍ່ເຄົາລົບ ແລະ ຮັກສາສີສັນວັດທະນະທຳຂອງຊົນເຜົ່າຕົນ.
ໝູ່ບ້ານ ອໍງອນ, ຕາແສງ ອີອາເວ, ເມືອງ ຈືປຼົງ ໃນທຸກວັນນີ້ ແມ່ນແບບຢ່າງກ່ຽວກັບໝູ່ບ້ານຊົນນະບົດໃໝ່ໃນເຂດຊາວຊົນເຜົ່າສ່ວນໜ້ອຍຂອງແຂວງ ຢາລາຍ. ນີ້ແມ່ນຈຸດພົ້ນເດັ່ນໃນການຮັກສາສີສັນວັດທະນະທຳຂອງຊາດໃນຍຸກສະໄໝປະຈຸບັນ./.
