 ທ່ານນາງ ສູນທອນ ໄຊຍະຈັກ, ຫົວໜ້າຄະນະພົວພັນຕ່າງປະເທດ ສູນກາງພັກ ປະຊາຊົນປະຕິວັດ ລາວ (ພາບ:TTXVN) |
ເມື່ອຕອບສຳພາດຕໍ່ນັກຂ່າວສຳນັກຂ່າວສານ ຫວຽດນາມ ເນື່ອງໃນໂອກາດສະເຫຼີມສະຫຼອງ 45 ປີ ແຫ່ງວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນ ລາວ (2/12/1975 – 2/12/2020), ທ່ານນາງ ສູນທອນ ໄຊຍະຈັກ, ຫົວໜ້າຄະນະພົວພັນຕ່າງປະເທດ ສູນກາງພັກ ປະຊາຊົນປະຕິວັດ ລາວ ຢັ້ງຢືນວ່າ: ໄຊຊະນະອັນສະຫງ່າລາສີ ແລະ ມີລັກສະນະປະຫວັດສາດຂອງ ລາວ ບໍ່ອາດຕັດແຍກອອກຈາກການຊ່ວຍເຫຼືອຢ່າງໃຫຍ່ຫຼວງ ແລະ ການເສຍສະຫຼະອັນຍິ່ງໃຫຍ່ຂອງກອງທັບ ແລະ ປະຊາຊົນ ຫວຽດນາມ ອ້າຍນ້ອງ, ຂອງສຳພັນທະມິດສູ້ຮົບ ລາວ - ຫວຽດນາມ. ທ່ານນາງ ສູນທອນ ໄຊຍະຈັກ ຖືວ່າ: ປະຊາຊົນ ລາວ ບໍ່ມີວັນທີ່ຈະຫຼົງລືມເລື່ອງປະຊາຊົນ ຫວຽດນາມ ລຸ້ນຕ່າງໆນັບພັນໆຄົນ ໄດ້ມາຊ່ວຍເຫຼືອປະຊາຊົນ ລາວ ໃນການຕໍ່ສູ້ຍາດເອົາເອກະລາດ ແລະ ເສລີພາບມາໃຫ້ປະເທດລາວ. ໃນຕະຫຼອດໄລຍະ 45 ປີ ຜ່ານມາ, ສອງພັກ, ສອງລັດ ແລະ ປະຊາຊົນສອງປະເທດ ຍາມໃດກໍມີຄວາມສະໜິດຕິດພັນ, ຄຽງບ່າຄຽງໄຫຼ່, ຊ່ວຍເຫຼືອເຊິ່ງກັນແລະກັນໃນກິດຈະການສ້າງສາ, ປົກປັກຮັກສາປະເທດຊາດ ແລະ ເພີ່ມພູນຄູນສ້າງສາຍພົວພັນແບບພິເສດ ລະຫວ່າງ ລາວ - ຫວຽດນາມ.
ທ່ານນາງ ສູນທອນ ໄຊຍະຈັກ ຢັ້ງຢືນວ່າ: ການພົວພັນແບບພິເສດ ລະຫວ່າງ ລາວ - ຫວຽດນາມ ແມ່ນບຸລິມະສິດແຖວໜ້າໃນນະໂຍບາຍການຕ່າງປະເທດຂອງພັກ ແລະ ປະຊາຊົນ ລາວ. ສອງປະເທດ ສືບຕໍ່ສຶກສາອົບຮົມ ແລະ ໂຄສະນາໃຫ້ປະຊາຊົນ, ໂດຍສະເພາະແມ່ນຄົນລຸ້ນໜຸ່ມສອງປະເທດ ມີຄວາມເຂົ້າໃຈກ່ຽວກັບຄວາມສຳຄັນຂອງການພົວພັນແບບພິເສດ ລະຫວ່າງ ລາວ - ຫວຽດນາມ; ຖືປະສິດທິຜົນ ແລະ ຄຸນນະພາບຂອງການຮ່ວມມືໃນທຸກຂົງເຂດເປັນສຳຄັນ ໂດຍສະເພາະແມ່ນໃນການຮ່ວມມືດ້ານເສດຖະກິດ - ການຄ້າ, ການລົງທຶນ ແລະ ການພັດທະນາແຫຼ່ງຊັບພະຍາກອນມະນຸດ ເພື່ອສົມກັບການເສຍສະຫຼະອັນຍິ່ງໃຫຍ່ຂອງຄົນລຸ້ນພໍ່ລຸ້ນອ້າຍ, ສົມກັບການພົວພັນດ້ານການເມືອງລະຫວ່າງສອງພັກ, ສອງລັດຖະບານ ແລະ ປະຊາຊົນສອງປະເທດ ລາວ - ຫວຽດນາມ.
