ເສດຖະກິດການບິນລະດັບຕ່ຳພວມກາຍເປັນທ່າອ່ຽງທົ່ວໂລກກຳນົດອະນາຄົດ. ນີ້ແມ່ນຮູບແບບເສດຖະກິດຖືບັນດາການບິນລະດັບຕ່ຳກວ່າ 1.000 ແມັດ ເປັນກຳລັງໜູນໃຫ້ແກ່ການພັດທະນາ. ຕາມບັນດາບົດລາຍງານວິເຄາະຕະຫຼາດສາກົນແລ້ວ, ຂອບຂະໜາດຂະແໜງເສດຖະກິດການບິນລະດັບຕ່ຳທົ່ວໂລກອາດສາມາດບັນລຸປະມານ 700 ຕື້ USD ໃນປີ 2035 ແລະ ຂຶ້ນເຖິງ 1.500 ຕື້ USD ໃນປີ 2040.
ຢູ່ ຫວຽດນາມ, ຄວາມສາມາດບົ່ມຊ້ອນຂອງເສດຖະກິດການບິນລະດັບຕ່ຳມີທ່າແຮງຫຼາຍຢູ່. ທ່ານ ເຈິ່ນແອັງຕວັນ, ຮອງປະທານເຄືອຂ່າຍການບິນອາວະກາດ, ອຸປະກອນບິນບໍ່ມີຄົນຂັບ ໃຫ້ຂໍ້ສັງເກດວ່າ:
ຫວຽດນາມ ມີຄວາມສາມາດບົ່ມຊ້ອນໃຫຍ່ກ່ຽວກັບເສດຖະກິດການບິນລະດັບຕ່ຳ. ທີໜຶ່ງແມ່ນທີ່ຕັ້ງພູມີສາດການເມືອງ, ຫວຽດນາມ ນອນຢູ່ໃຈກາງຂອງເຂດອາຊີຕາເວັນອອກສ່ຽງໃຕ້ ເຊິ່ງແມ່ນເຂດທີ່ມີທ່າໄດ້ປຽບຢ່າງແຮງກ່ຽວກັບການບໍລິການ logistic. ທີສອງ, ນັບແຕ່ກ່ອນມາຮອດປັດຈຸບັນ ຫວຽດນາມ ຍັງຄົງປະຕິບັດນະໂຍບາຍ 4 ບໍ່, ເປັນເພື່ອນມິດກັບທຸກປະເທດຢ່າງສະເໝີຕົ້ນສະເໝີປາຍ. ສະຖຽນລະພາບທາງດ້ານການເມືອງຂອງ ຫວຽດນາມ ໄດ້ຊ່ວຍໃຫ້ບັນດານັກລົງທຶນຕ່າງປະເທດອຸ່ນອ່ຽງໃຈໃນການດຳເນີນທຸລະກິດ, ພັດທະນາເຕັກໂນໂລຢີ UAV ສະດວກທີສຸດ.
ບັນດາທ່າໄດ້ປຽບນັ້ນພວມຄ່ອຍໆຫັນເປັນບັນດາກິດຈະກຳລະອຽດ. ຈາກບັນດາ tour ທ່ອງທ່ຽວຊົມທັດສະນີຍະພາບດ້ວຍເຮີລີກອບເຕີ, ບັນດາການທົດລອງຂົນສົ່ງດ້ວຍ UAV, ຕະຫຼອດຮອດການນຳໃຊ້ອຸປະກອນບິນແບບອັດຕະໂນມັດໃນການກູ້ໄພກູ້ຊີບ, ກະສິກຳ ແລະ logistic, ພື້ນທີ່ການບິນລະດັບຕ່ຳພວມຄ່ອຍໆຫັນຈາກແນວຄວາມຄິດ ສູ່ການປະຕິບັດຕົວຈິງ. ສິ່ງສຳຄັນໃນປັດຈຸບັນແມ່ນ ຫວຽດນາມ ພວມຄ່ອຍໆເປັນເຈົ້າເຕັກໂນໂລຢີ. ທ່ານພັນໂທ ເວືອງຈຸງແອັງ, ສະຖາບັນເຕັກນິກປ້ອງກັນອາກາດ - ທະຫານອາກາດ ຫວຽດນາມ, ແບ່ງປັນວ່າ:
ໃນມືຂ້າພະເຈົ້າແມ່ນເຄື່ອງບັນຊາອຸປະກອນບິນ. ປັດຈຸບັນ, ພວກຂ້າພະເຈົ້າພວມເປັນເຈົ້າເຕັກໂນໂລຢີ ແລະ ພັດທະນາຫຼາຍຄຸນລັກສະນະໃໝ່, ພິເສດແມ່ນບັນດາຄຸນລັກສະນະໂດດເດັ່ນ, ອາດສາມາດບັນຊາອຸປະກອນບິນໃຫ້ເຄື່ອນໄຫວເປັນຢ່າງດີໃນສະພາບແວດລ້ອມທີ່ມີການລົບກວນຂອງສະໜາມແມ່ເຫຼັກ.
ພ້ອມກັນນັ້ນ, ເຮືອບິນທີ່ເຮັດໄດ້ຫຼາຍໜ້າທີ່ Hera ຂອງ Realtimes Robustic ຫວຽດນາມ ຊິ່ງເແມ່ນຜະລິດຕະພັນໂດຍນັກເຕັກນິກ ຫວຽດນາມ ອອກແບບເອງ, ປັດຈຸບັນໄດ້ສົ່ງອອກຕະຫຼາດ ອາເມລິກາ, ເອີລົບປະສົບຜົນສຳເລັດ ຍ້ອນມີກຳລັງຍົກທີ່ໂດດເດັ່ນທົບ 10 ເທົ່າເມື່ອທຽບກັບບັນດາຄູ່ແຂ່ງທີ່ມີຂະໜາດດ່ຽວກັນ. ທ່ານ ອານງອກຖ໋າວ, ຮອງເລຂາທິການໃຫຍ່ ສະມາຄົມຊອບແວ ແລະ ການບໍລິການເຕັກໂນໂລຢີຂໍ້ມູນຂ່າວສານ ຫວຽດນາມ (VINASA), ຢັ້ງຢືນວ່າ:
ພວກເຮົານຳປັນຍາປະດິດ (AI), ເຕັກໂນໂລຢີຂັ້ນສູງ (deep tech) ເຂົ້າບັນດາຂະແໜງເສດຖະກິດການບິນລະດັບຕ່ຳເພື່ອຊຸກຍູ້ການເຕີບໂຕ. ເພື່ອຕອບສະໜອງຄວາມຕ້ອງການໃນການເຕີບໂຕເສດຖະກິດດີຈີຕອນ, ຖ້າພຽງແຕ່ອີງໃສ່ເຕັກໂນໂລຢີ ຮາດແວ (Hardware technology), ການຄ້າເອເລັກໂຕນິກເທົ່ານັ້ນ ເຖິງວ່າການເຕີບໂຕບັນລຸໄດ້ລະດັບສອງຕົວເລກແຕ່ຍາກທີ່ຈະຮັກສາລະດັບນັ້ນໄວ້ໄດ້. ແທນທີ່ນັ້ນ, ພວກເຮົາເປີດບັນດາພື້ນທີ່ພັດທະນາໃໝ່ ແລະ ນັ້ນແມ່ນໜ້າທີ່ສຳຄັນທີ່ສຸດຂອງຂະແໜງເຕັກໂນໂລຢີ.
ການພັດທະນາຂອງເຕັກໂນໂລຢີປະດິດພາຍໃນປະເທດພວມສ້າງການພົວພັນຮ່ວມມືອັນແໜ້ນແຟ້ນ ແລະຍາວນານກັບຄວາມຕ້ອງການຕົວຈິງຂອງພື້ນຖານເສດຖະກິດສັງຄົມ. ຂົງເຂດກະສິກຳໄດ້ຫັນເປັນທັນສະໄໝຢ່າງແຮງ ຍ້ອນໄດ້ນຳໃຊ້ເຮືອບິນບໍ່ມີຄົນຂັບ. ຂະແໜງຂົນສົ່ງ ແລະ logistic ກໍ່ຊອກໄດ້ມີວິທີການແກ້ໄຂບັນຫາຄ່າໃຊ້ຈ່າຍສູງ ແລະ ສະພາບລົດຕິດ. ເພື່ອຊຸກຍູ້ຂະແໜງເສດຖະກິດການບິນລະດັບຕ່ຳ, ຫວຽດນາມ ຮີບດ່ວນປັບປຸງແລວນິຕິກຳໃຫ້ຄົບຊຸດ. ທີ່ການເຮັດວຽກກັບກະຊວງວິທະຍາສາດເຕັກໂນໂລຢີ ເມື່ອທ້າຍເດືອນສິງຫາ ຜ່ານມາ, ທ່ານ ໂຮ່ກວັກຢຸງ ຮອງນາຍົກລັດຖະມົນຕີ ຫວຽດນາມ ຮຽກຮ້ອງວ່າ:
ສືບຕໍ່ກວດກາ, ສັງລວມ, ປະເມີນ ແລະ ແນະນຳຜັນຂະຫຍາຍການພັດທະນາບັນດາຂະແໜງເຕັກໂນໂລຢີຍຸດທະສາດສູງ. ເມື່ອມີບັນດາຫົວຂໍ້, ການຄົ້ນຄ້ວາ, ການປະດິດ ຫຼືແນວຄວາມຄິດທີ່ຕ້ອງການຈົດທະບຽນເພື່ອໃຫ້ກະຊວງວິທະຍາສາດ ແລະ ເຕັກໂນໂລຢີ ຜັນຂະຫຍາຍການກະກຽມໃຫ້ຊຸມປີຕໍ່ໄປ. ປີນີ້, ພວກເຮົາຈັດເງິນ 103.000 ຕື້ດົ່ງ ແລະ ປີຕໍ່ໄປຈະຫຼາຍກວ່າອີກ.
ເສດຖະກິດການບິນລະດັບຕ່ຳແມ່ນການປະສານສົມທົບລະຫວ່າງອຸປະກອນບິນບໍ່ມີຄົນຂັບ (UAV), ປັນຍາປະດິດ (AI), ຂໍ້ມູນ, ໂທລະຄົມມະນາຄົມ ແລະ ເຕັກໂນໂລຢີປະດິດແຕ່ງ, ເປີດພື້ນທີ່ພັດທະນາໃໝ່. ຖ້າໝູນໃຊ້ບັນດາທ່າໄດ້ປຽບນີ້ເປັນຢ່າງດີ, ທ້ອງຟ້າໃຫ້ແກ່ການບບິນລະດັບຕ່ຳອາດສາມາດກາຍເປັນຊັ້ນພັດທະນາໃໝ່ຂອງພື້ນຖານເສດຖະກິດດີຈີຕອນ ຫວຽດນາມ, ສ້າງກຳລັງໜູນຕື່ມອີກໃຫ້ແກ່ນະວັດຕະກຳ ແລະ ຍົກສູງຖານະບົດບາດເຕັກໂນໂລຢີຂອງປະເທດຊາດ.
