ໃນອາທິດຜ່ານມາ, ທ່ານຜູ້ຟັງ ວັນໄຊ, ແຂວງວຽງຈັນ ໄດ້ສົ່ງອີເມວມາຍັງລາຍການ, ປະກອບຄຳເຫັນກ່ຽວກັບບົດຈຳນວນໜຶ່ງໃນລາຍການວັດທະນະທຳ, ຄົ້ນຫາ ຫວຽດນາມ, ເພື່ອນໃຫ້ຮູ້ວ່າ: ຂ້າພະເຈົ້າມັກຟັງບັນດາບົດຂຽນກ່ຽວກັບວັດທະນະທຳຂອງ ຫວຽດນາມ ຜ່ານ VOV5. ບັນດາບົດຂຽນນີ້ສ່ວນໃດໜຶ່ງໄດ້ຊ່ວຍໃຫ້ຂ້າພະເຈົ້າມີຄວາມເຂົ້າໃຈວ່າ ແຕ່ລະຊົນເຜົ່າ, ເຂດພາກຂອງ ຫວຽດນາມ ພັດມີສີສັນ, ຮີດຄອງປະເພນີ ແລະ ວັດທະນະທຳທີ່ແຕກຕ່າງກັນໄປ. ເຖິງວ່າສັງຄົມມີການພັດທະນາແນວໃດກໍ່ຕາມ ແຕ່ວັດທະນະທຳ, ກົກເຄົ້າເຫງົ້າກໍຍາມໃດກໍ່ໄດ້ຮັບການຮັກສາ ແລະ ພັດທະນາ. ຜ່ານບັນດາບົດຂຽນ, ບັນດາຜູ້ຟັງກໍ່ເຫັນໄດ້ເຖິງຄວາມມານະພະຍາຍາມຂອງອຳນາດການປົກຄອງນັບແຕ່ຂັ້ນທ້ອງຖິ່ນຈົນຮອດສູນກາງ ຂອງ ຫວຽດນາມ ໃນການປົກປັກຮັກສາຄວາມງາມທາງດ້ານວັດທະນະທຳນັ້ນ.
ຈາກ Fukuoka, ຍີ່ປຸ່ນ, ທ່ານຜູ້ຟັງ Hokamura Fumito ໄດ້ຂຽນວ່າ: ໂດຍແມ່ນຜູ້ຟັງດົນນານຂອງພວກເພື່ອນ, ຂ້າພະເຈົ້າຮູ້ສຶກເອກອ້າງທະນົງໃຈເມື່ອເຫັນການປ່ຽນແປງ ແລະ ພັດທະນາຜ່ານແຕ່ລະໄລຍະຂອງບັນດາລາຍການກະຈາຍສຽງຂອງ VOV. ດ້ວຍການພັດທະນາຂອງສັງຄົມໃນຍຸກດີຈີຕອນ, ຫວັງວ່າ VOV ຈະຍັງຮັກສາບັນດາຄຸນຄ່າທີ່ດີງາມໃນຫຼາຍປີຜ່ານມາ ແລະ ມີການປ່ຽນແປງໃໝ່ເພື່ອໄປທັນກັບທ່າອ່ຽງຂອງສັງຄົມ.
ທ່ານຜູ້ຟັງ ຈັນສະໝອນ, ຢູ່ແຂວງຊຽງຂວາງ ໄດ້ສົ່ງອີເມວມາຍັງລາຍການດ້ວຍຄຳຖາມກ່ຽວກັບບັນດາປະພາຄານຂອງ ຫວຽດນາມ: ຫວຽດນາມ ມີຊາຍທະເລກວ່າ 3.000 ກີໂລແມັດ, ຂ້າພະເຈົ້າຢາກຖາມວ່າ ຫວຽດນາມ ມີປະພາຄານຈັກແຫ່ງ ແລະ ຂໍຖາມຊື່ຂອງປະພາຄານທີ່ງາມທີ່ສຸດຢູ່ ຫວຽດນາມ ແດ່?
ເພື່ອນ ຈັນສະໝອນ ທີ່ຮັກແພງ, ຕາມຕົວເລກສະຖິຕິຂອງກົມໃຫຍ່ການເດີນເຮືອ ຫວຽດນາມ ແລ້ວ, ປະຈຸບັນ, ຢູ່ ຫວຽດນາມ ມີປະພາຄານ 92 ແຫ່ງ ແຕ່ ມ໋ອງກ່າຍ (ແຂວງ ກ໋ວາງນິງ) ໄປຮອດ ຮ່າຕຽນ. ໃນນັ້ນ, ມີປະພາຄານ 5 ແຫ່ງທີ່ໄດ້ຮັບຖືວ່າງາມທີ່ສຸດຢູ່ ຫວຽດນາມ, ເຊິ່ງລວມມີ: ປະພາຄານ ເກກ່າ, ຢູ່ຕາແສງ ເຕີນແທັ່ງ, ແຂວງ ເລິມດົ່ງ. ປະພາຄານແຫ່ງນີ້ສູງ 35 ແມັດ ແລະ ມີອາຍຸກວ່າ 125 ປີ.
ປະພາຄານ ດ້າຍແຫຼງ, ຂຶ້ນກັບບ້ານ ເຟືອກເຕີນ, ແຂວງ ດັກລັກ, ໄດ້ຮັບການກໍ່ສ້າງໃນປີ 1890, ມີຕົວເຮືອນສູງ 5 ແມັດ ແລະ ມີເນື້ອທີ່ 320 ຕາແມັດ. ປະພາຄານ ຫວູງເຕົ່າຕັ້ງຢູ່ເທິງຈອມພູ ຍໍ ຢູ່ນະຄອນໂຮ່ຈີມິນ, ໄດ້ຮັບການກໍ່ສ້າງໃນປີ 1862. ປະພາຄານ ຮອນເຢົາ ຕັ້ງໃນເກາະ ຮ່ອນເຢົາ, ຂຶ້ນກັບເຂດທ່ອງທ່ຽວບັນເທິງ ໂດ໋ເຊີນ (ແຂວງ ຫາຍຟ່ອງ). ນີ້ແມ່ນກິດຈະກຳໂດຍບັນດາສະຖາປະນິກຊາວ ຝລັ່ງ ອອກແບບ ແລະ ກໍ່ສ້າງໃນເດືອນ ມິຖຸນາ ປີ 1898. ປະພາຄານ ແຫ່ງນີ້ມີ 5 ຊັ້ນ, ຈຸດສູງສຸດແມ່ນສູງ 140 ແມັດ ທຽບກັບໜ້ານ້ຳທະເລ.
ໃນອາທິດນີ້, ທ່ານຜູ້ຟັງ ມາລີ ຈາກແຂວງຫົວພັນ ໄດ້ສົ່ງອີເມວມາຍັງລາຍການ ດ້ວຍເນື້ອໃນຢາກຊອກຮູ້ກ່ຽວກັບສະພາບການສົ່ງອອກຜະລິດຕະພັນກະເສດ, ເຄື່ອງປ່າຂອງດົງ ແລະ ສິນໃນນ້ຳຂອງ ຫວຽດນາມ ໃນ 4 ເດືອນຕົ້ນປີ 2026.
ເພື່ອນ ມາລີ ທີ່ຮັກແພງ, 4 ເດືອນຕົ້ນປີ 2026, ການສົ່ງອອກບັນດາຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳໃນທົ່ວປະເທດ ຫວຽດນາມ ສືບຕໍ່ຮັກສາຂອບຂະໜາດໃຫຍ່ ດ້ວຍວົງເງິນຄາດວ່າບັນລຸ 23,05 ຕື້ USD, ເພີ່ມຂຶ້ນ 5,4% ເມື່ອທຽບໃສ່ກັບໄລຍະດຽວກັນຂອງປີ 2025. ໃນຂະນະນັ້ນ, ການນຳເຂົ້າຂອງຂະແໜງກະເສດໃນ 4 ເດືອນຕົ້ນປີ ບັນລຸປະມານ 17,4 ຕື້ USD, ເພີ່ມຂຶ້ນ 10,5%, ນຳທົ່ວຂະແໜງມີຄວາມເກີນດຸນການຄ້າບັນລຸ 5,649 ຕື້ດົ່ງ, ຫຼຸດລົງ 7,6% ເມື່ອທຽບໃສ່ກັບໄລຍະດຽວກັນຂອງປີກາຍນີ້. ສະເພາະໃນເດືອນເມສາ 2026, ການເກີນດຸນການຄ້າຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳບັນລຸ 1,249 ຕື້ USD, ຫຼຸດລົງ 32,3% ເມື່ອທຽບໃສ່ກັບໄລຍະດຽວກັນຂອງປີ 2025.
ຈີນ ແລະ ອາເມລິກາ ຍັງແມ່ນສອງຕະຫຼາດທີ່ນຳເຂົ້າຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳໃຫຍ່ທີ່ສຸດຂອງ ຫວຽດນາມ ໃນ 4ເດືອນຕົ້ນປີ, ຈີນ ກວມເອົາ 21% ແລະ ອາເມລິກາ 18% ຍອດວົງເງິນສົ່ງອອກທົ່ວຂະແໜງ. ຕະຫຼາດ EU ຢືນຢູ່ອັນດັບທີ 3 ດ້ວຍ ປະມານ 13%, ຖັດຈາກນັ້ນແມ່ນ ອາຊຽນ 10%, ຍີ່ປຸ່ນ 7% ແລະ ສ.ເກົາຫຼີ 3%.
ກ່ຽວກັບໂຄງປະກອບຂະແໜງ, ສິນໃນນ້ຳສືບຕໍ່ແມ່ນໜຶ່ງໃນບັນດາຈຸດພົ້ນເດັ່ນຂອງການສົ່ງອອກ. ຕາມຂໍ້ມູນຂອງກົມພາສີອາກອນແລ້ວ, 4 ເດືອນຕົ້ນປີ 2026, ວົງເງິນການສົ່ງອອກສິນໃນນ້ຳບັນລຸປະມານ 3,544 ຕື້ USD, ເພີ່ມຂຶ້ນ 10,4% ເມື່ອທຽບໃສ່ໄລຍະດຽວກັນຂອງປີ 2025. ໃນນັ້ນ, ກຸ້ງຍັງແມ່ນຜະລິດຕະພັນຫຼັກແຫຼ່ງ, ກວມເອົາປະມານ 40% ຍອດວົງເງິນການສົ່ງອອກສິນໃນນ້ຳ.
