ໃນອາທິດຜ່ານມາ, ພະແນກກະຈາຍສຽງບັນດາລາຍການພາກພາສາຕ່າງປະເທດ, ວິທະຍຸກະຈາຍສຽງຫວຽດນາມ ໄດ້ຮັບຈົດໝາຍ, ອີເມວ 428 ສະບັບ ແລະ ໂທລະສັບຫຼາຍສາຍ ຈາກທ່ານຜູ້ຟັງທີ່ມາຈາກ 33 ປະເທດ ແລະ ເຂດແຄວ້ນ. ໃນນັ້ນ, ລາຍການພາກພາສາລາວ ໄດ້ຮັບຈົດໝາຍ, ອີເມວ 29 ສະບັບຈາກທ່ານຜູ້ຟັງລາວ.
(ພາບອິນເຕີເນັດ)
ເພື່ອນ ວົງຄຳ, ຢູ່ແຂວງ ອຸດົມໄຊ ໄດ້ສົ່ງອີເມວມາຫາລາຍການໂດຍແບ່ງປັນວ່າ: ວັນທີ 19 ພຶດສະພາ 2026 ນີ້ຈະແມ່ນວັນສະເຫຼີມສະຫຼອງວັນຄ້າຍວັນເກີດຂອງປະທານ ໂຮ່ຈີມິນ ຄົບຮອບ 136 ປີ (19 ພຶດສະພາ 1890 – 19 ພຶດສະພາ 2026), ເຊິ່ງເປັນຜູ້ນຳທີ່ປີຊາສາມາດ, ເປັນຄູຜູ້ຍິ່ງໃຫຍ່ຂອງການປະຕິວັດ ຫວຽດນາມ. ແລະກໍ່ແມ່ນຜູ້ໄດ້ກໍ່ຕັ້ງພື້ນຖານຢ່າງໝັ້ນແກ່ນໃຫ້ແກ່ສາຍພົວພັນ ລາວ - ຫວຽດນາມ ຈົນມາຮອດປະຈຸບັນ ແລະ ໃນອະນາຄົດ. ຂ້າພະເຈົ້າເອງຂໍສົ່ງຄຳຕອບບຸນແທນຄຸນຕໍ່ປະຊາຊົນ ຫວຽດນາມ ໝົດທຸກຄົນ ແລະ ຂໍອວຍພອນໃຫ້ນ້ຳໃຈສາມັກຄີ, ມິດຕະພາບລະຫວ່າງ 2 ປະເທດ ນັບມື້ນັບພັດທະນາ.
ເພື່ອນ Armando Francisco Higuera del Reyo, ຢູ່ ເມັກຊີໂກ, ໄດ້ແບ່ງປັນວ່າ: “ກຳລັງໜູນຢ່າງເຂັ້ມແຂງເພື່ອສ້າງມະຫາໄຊລະດູບານໃໝ່ປີ 1975 ນັ້ນ ແມ່ນນ້ຳໃຈຕໍ່ສູ້ຢ່າງກ້າແກ່ນ, ໝັ້ນໜຽວຂອງປະຊາຊົນທີ່ມີຕໍ່ແນວທາງນຳພາອັນສະຫຼາດສະຫຼຽວຂອງພັກກອມມູນິດ ຫວຽດນາມ, ໂດຍນຳໜ້າແມ່ນ ປະທານ ໂຮ່ຈິມິນ, ພ້ອມກັບການສະໜັບສະໜູນຢ່າງກວ້າງຂວາງຈາກເພື່ອນມິດສາກົນ. ພາລະກິດທ້ອນໂຮມປະເທດຊາດເປັນເອກະພາບນັ້ນ ໄດ້ສ້າງເປັນແບບຢ່າງວິລະຊົນອະມະຕະ, ເຍືອງທາງໃຫ້ແກ່ບັນດາຊົນເຜົ່າໃນທົ່ວໂລກ. ໃນກະແສປະຫວັດສາດຂອງມວນມະນຸດ, ວິລະກຳນັ້ນຈະໄດ້ຈົດຈຳໄວ້ຕະຫຼອດໄປ”.
ເພື່ອນ ສຸລິວົງ, ຢູ່ແຂວງ ຫຼວງພະບາງ ໄດ້ສົ່ງອີເມວມາຫາລາຍການດ້ວຍເນື້ອໃນທີ່ວ່າ: “ຕາມຂ້າພະເຈົ້າແລ້ວ, ໜ້າເວັບໃໝ່ຂອງສື່ເອເລັກໂຕນິກ vovworld.vn ສ້າງຄວາມດຶງດູດໃຈຢ່າງຈະແຈ້ງ ເມື່ອທຽບກັບກ່ອນນີ້. ເຖິງວ່າໄດ້ລຶ້ງກັບການຈັດໜ້າເວັບກ່ອນນີ້ແລ້ວ, ແຕ່ຕາມການເວລາ, ຂ້າພະເຈົ້າກໍ່ຄ່ອຍໆຄົ້ນຫາຫຼາຍສິ່ງທີ່ຈັບໃຈຈາກການຈັດແບບໃໝ່ນີ້”.
ເພື່ອນ ຄຳມະວົງ, ຢູ່ນະຄອນຫຼວງ ວຽງຈັນ ໄດ້ສົ່ງອີເມວມາຫາລາຍການໂດຍແບ່ງປັນວ່າ: ຂ້າພະເຈົ້າໄດ້ຊອກຮູ້ກ່ຽວກັບມູນເຊື້ອ ແລະ ວັດທະນະທຳ ຫວຽດນາມ ແມ່ນອຸດົມສົມບູນທີ່ສຸດ. ໃນນັ້ນ, ຜ່ານບັນດາບົດຂຽນແນະນຳກ່ຽວກັບປະເທດ ຫວຽດນາມ, ຂ້າພະເຈົ້າຄືດັ່ງໄດ້ຄົ້ນຫາຫຼາຍແຫ່ງທີ່ບໍ່ທັນເຄີຍໄປຢ້ຽມຢາມ ແລະ ບັນດາສິ່ງທີ່ດຶງດູດໃຈຕື່ມອີກ. ໃນນັ້ນ, ຂ້າພະເຈົ້າມັກທີ່ສຸດແມ່ນລາຍການ “ຄົ້ນຫາ ຫວຽດນາມ”.
ລາຍການພາກພາສາລາວ ຂໍຂອບໃຈບັນດາທ່ານຜູ້ຟັງທີ່ໄດ້ໂທລະສັບ, ສົ່ງຈົດໝາຍ, ອີເມວມາຫາລາຍການໃນຕະຫຼອດໄລຍະຜ່ານມາ. ຫວັງວ່າ, ໃນໄລຍະຈະມາເຖິງ, ພວກຂ້າພະເຈົ້າຈະສືບຕໍ່ໄດ້ຮັບຄຳເຫັນປະກອບ, ການແບ່ງປັນຂອງທ່ານຜູ້ຟັງທຸກໆທ່ານຫຼາຍກວ່າ ເພື່ອແນໃສ່ປະກອບສ່ວນຊ່ວຍໃຫ້ລາຍການນັບມື້ນັບອຸດົມສົມບູນກວ່າເກົ່າ.
(ພາບປະກອບ:doanhnhansaigon.vn)
ເພື່ອນ ຄຳປະສົງ, ຢູ່ນະຄອນຫຼວງ ວຽງຈັນ ໄດ້ສົ່ງອີເມວມາຫາລາຍການດ້ວຍເນື້ອໃນທີ່ວ່າ: “ຢູ່ ຫວຽດນາມ ມີຄົນໃຊ້ລົດຈັກໄຟຟ້າຫຼາຍບໍ່? ການໃຊ້ລົດໄຟຟ້າມີຄວາມສະດວກບໍ່?”
ເພື່ອນ ຄຳປະສົງ ທີ່ຮັກແພງ, ຕາມຕົວເລກປະກາດໃນວັນທີ 10 ເມສາ ຈາກສະຫະສະມາຄົມບັນດາຜູ້ຜະລິດລົດຈັກ ຫວຽດນາມ (VAMM) ແລ້ວ, ຈຳນວນລົດຈັກໄຟຟ້າທັງໝົດທີ່ໄດ້ຂາຍໃນໄຕມາດທີ 1 ປີ 2026 ບັນລຸກວ່າ 729.000 ຄັນ, ເພີ່ມຂຶ້ນ 8,3% ເມື່ອທຽບໃສ່ປີ 2025. ລະອຽດແມ່ນ, ນັບແຕ່ຕົ້ນເດືອນ ກຸມພາ ມາຮອດປະຈຸບັນ, ການສຳຫຼວດຢູ່ຫຼາຍຮ້ານຂາຍລົດຈັກໄຟຟ້າຢູ່ຮ່າໂນ້ຍ ຊີ້ໃຫ້ເຫັນວ່າ ຈຳນວນລູກຄ້າມາຊື້ແມ່ນເພີ່ມຂຶ້ນຢ່າງແຮງ, ມີບາງຈຸດເວລາເພີ່ມຂຶ້ນຫຼາຍເທົ່າເມື່ອທຽບໃສ່ກ່ອນນີ້. ໃນນັ້ນ, ຜູ້ຂັບລົດໄດ້ເລືອກເອົາບັນດາລົດໄຟຟ້າແບບປ່ຽນຖ່ານ (ແບັດເຕີຣີ) ຍ້ອນບໍ່ຕ້ອງລໍຖ້າສາກແບັດເຕີຣີໃນເວລາຫຼາຍຊົ່ວໂມງອີກ, ແທນທີ່ນັ້ນແມ່ນໃຊ້ເວລາພຽງແຕ່ປະມານ 2 – 3 ນາທີເມື່ອປ່ຽນຖ່ານແຕ່ລະເທື່ອ.
ຕາມຕົວເລກອັບເດດຮອດຕົ້ນປີ 2026, ຫວຽດນາມ ໄດ້ກາຍເປັນຕະຫຼາດລົດຈັກໄຟຟ້າໃຫຍ່ທີ່ 3 ໃນໂລກ, ຖັດຈາກ ຈີນ ແລະ ອິນເດຍ. ນີ້ໄດ້ຮັບຖືວ່າແມ່ນບາດກ້າວທີ່ໜ້າສົນໃຈ, ເປັນການສ່ອງແສງໃຫ້ເຫັນຄວາມຕ້ອງການທີ່ນັບມື້ນັບສູງຂອງພາຫະນະສີຂຽວ. ຕາມການຄາດຄະເນຂອງບັນດານັກຊ່ຽວຊານແລ້ວ, ຈຳນວນລົດໄຟຟ້າທີ່ໄດ້ຂາຍໃນປີນີ້ອາດຈະບັນລຸແຕ່ 1,2 – 1,3 ລ້ານຄັນ, ທຽບເທົ່າກັບລະດັບເຕີບໂຕຂຶ້ນເຖິງ 150% ເມື່ອທຽບໃສ່ປີ 2025.
ເພື່ອນ ເພັດມະລີ, ຄົນ ລາວ ໄດ້ສົ່ງຂໍ້ຄວາມຜ່ານສື່ສັງຄົມ Facebook ມາຫາລາຍການຖາມວ່າ: ຂ້າພະເຈົ້າຢາກຮູ້ວ່າ ຂົວຂ້າມທະເລໃດຍາວທີ່ສຸດຢູ່ ຫວຽດນາມ ໃນປະຈຸບັນ?
ເພື່ອນ ເພັດມະລີ ທີ່ຮັກແພງ, ຂົວຂ້າມທະເລ ດິ່ງວູ - ກາດຫາຍ (ຫຼືຍັງເອີ້ນວ່າຂົວຂ້າມທະເລ ເຕິນວູ - ແລັກຮວ້ຽນ, ນະຄອນ ຫາຍຟ່ອງ) ແມ່ນຂົວຂ້າມທະເລຍາວທີ່ສຸດຢູ່ ຫວຽດນາມ (ຂົວຂ້າມທະເລຍາວທີ 2 ຢູ່ ອາຊີຕາເວັນອອກສ່ຽງໃຕ້ ຖັດຈາກຂົວ Sultan Haji Omar Ali Saifuddien, ຢູ່ ບຣູໄນ). ຂົວຂ້າມທະເລມີລວງກວ້າງ 16 ມ, ດ້ວຍ 4 ເລນ ແລະ ໄດ້ອອກແບບແລ່ນໃນຄວາມໄວ 80 ກມ/ຊົ່ວໂມງ. ຂົວແຫ່ງນີ້ຍາວ 5,44 ກມ ນອນໃນໂຄງການເສັ້ນທາງລົດໂອໂຕ ເຕິນວູ - ແລັກຮວ້ຽນ ດ້ວຍຄວາມຍາວທັງໝົດ 15,63 ກມ.
ຂົວແຫ່ງນີ້ເລີ່ມລົງມືກໍ່ສ້າງໃນວັນທີ 15 ກຸມພາ 2014 ແລະ ເປີດນຳໃຊ້ໃນວັນທີ 02 ກັນຍາ 2017. ນີ້ແມ່ນກິດຈະກຳຂົວ, ເສັ້ນທາງຂ້າມທະເລຍາວທີ່ສຸດຂອງ ຫວຽດນາມ ໃນປະຈຸບັນ, ມີເຕັກໂນໂລຊີທີ່ສັບສົນ, ມີເຕັກນິກສູງ, ແມ່ນໂຄງການທຳອິດທີ່ໄດ້ລົງທຶນຕາມຮູບແບບຮ່ວມມືພາກລັດ - ເອກະຊົນ (PPP) ລະຫວ່າງ ຫວຽດນາມ - ຍີ່ປຸ່ນ.
