ໃນໄລຍະພັດທະນາໃໝ່, ຫວຽດນາມ ບໍ່ພຽງແຕ່ຕ້ອງການແຫຼ່ງທຶນໂດຍກົງຈາກຕ່າງປະເທດ (FDI) ເທົ່ານັ້ນ ຫາກຍັງຕ້ອງການແຫຼ່ງທຶນທີ່ມີຄຸນນະພາບສູງ, ຕິດພັນກັບນະວັດຕະກຳ, ການຖ່າຍທອດເຕັກໂນໂລຢີ ແລະ ຄວາມສາມາດເຊື່ອມຕໍ່ລະຫວ່າງວິສາຫະກິດ FDI ກັບວິສາຫະກິດພາຍໃນປະເທດອີກດ້ວຍ. ເພາະສະນັ້ນ, ຫວຽດນາມ ພວມຍູ້ແຮງການສ້າງລະບົບນິເວດແຫ່ງການຮ່ວມມືທີ່ມີປະສິດທິຜົນ ລະຫວ່າງວິສາຫະກິດ FDI ແລະ ວິສາຫະກິດ ຫວຽດນາມ ເພື່ອແນໃສ່ສ້າງແຮງກະຕຸ້ນໃຫ້ແກ່ການເຕີບໂຕໂດຍໄວ ແລະ ຍືນຍົງ.
ມາຮອດປັດຈຸບັນ, ຫວຽດນາມ ມີໂຄງການ FDI ກວ່າ 46.500 ໂຄງການຍັງມີຜົນບັງຄັບໃຊ້, ດ້ວຍຍອດທຶນຈົດທະບຽນກວ່າ 543 ຕື້ USD, ທຶນປະຕິບັດສະສົມບັນລຸປະມານ 357,6 ຕື້ USD. ປັດຈຸບັນ, FDI ປະກອບກວ່າ 20% GDP, ປະມານ 70% ວົງເງິນນສົ່ງອອກ ແລະ ສ້າງວຽກເຮັດງານທຳໃຫ້ແກ່ຜູ້ອອກແຮງງານນັບລ້ານຄົນ. ຫວຽດນາມ ສືບຕໍ່ຮັກສາທີ່ຕັ້ງໃນກຸ່ມບັນດາປະເທດດຶງດູດ FDI ແຖວໜ້າໃນພາກພື້ນ. ຕາມທ່ານ ຫງວຽນວັນທັ້ງ ຮອງນາຍົກລັດຖະມົນຕີ ຫວຽດນາມ ແລ້ວ, ໃນສະພາບກະແສທຶນ FDI ທົ່ວໂລກຫຼຸດລົງຢູ່ຫຼາຍພາກພື້ນ, ແຕ່ ຫວຽດນາມ ສືບຕໍ່ຮັກສາທີ່ຕັ້ງໃນກຸ່ມບັນດາປະເທດດຶງດູດທຶນ FDI ແຖວໜ້າໃນພາກພື້ນ ອາຊີຕາເວັນອອກສ່ຽງໃຕ້.
ສິ່ງນີ້ສ່ອງແສງໃຫ້ເຫັນເຖິງຄວາມເຊື່ອໝັ້ນຂອງປະຊາຄົມວິສາຫະກິດສາກົນ ຕໍ່ແງ່ຫວັງພັດທະນາ, ສະຖຽນລະພາບດ້ານການເມືອງ - ສັງຄົມ ແລະ ສະພາບແວດລ້ອມແຫ່ງການລົງທຶນດຳເນີນທຸລະກິດຂອງ ຫວຽດນາມ. ພິເສດ, ໃນຊຸມປີມໍ່ໆມານີ້, ຫວຽດນາມ ແມ່ນສະຖານທີ່ທີ່ມີ ຫຼາຍກຸ່ມບໍລິສັດໃຫຍ່ໃນຂົງເຂດເອເລັກໂຕນິກ, ເຄິ່ງຊັກນຳໄຟຟ້າ, ເຕັກໂນໂລຢີສູງ, ພະລັງງານ, logistics, ການເງິນ, ນະວັດຕະກຳ ແລະ ການບໍລິການທັນສະໄໝເຂົ້າມາ ແລະ ເປີດກວ້າງການລົງທຶນ. ຜ່ານນັ້ນ, ປະກອບສ່ວນສ້າງລະບົບນິເວດແຫ່ງການຜະລິດ ແລະ ລະບົບຕ່ອງໂສ້ການສະໜອງໃໝ່ຢູ່ ຫວຽດນາມ.
ເຖິງຢ່າງໃດກໍຕາມ, ເພື່ອໝູນໃຊ້ໝາກຜົນຂອງກະແສທຶນ FDI ໃນການເຕີບໂຕເສດຖະກິດໂດຍໄວ ແລະ ຍືນຍົງນັ້ນ ແມ່ນ ຕ້ອງສ້າງການເຊື່ອມຕໍ່ລະຫວ່າງວິສາຫະກິດ FDI ແລະ ວິສາຫະກິດພາຍໃນປະເທດ. ປັດຈຸບັນ, ຄຸນນະພາບ ແລະ ປະສິດທິຜົນການເຊື່ອມຕໍ່ລະຫວ່າງທຶນ FDI ກັບພາກສ່ວນເສດຖະກິດພາຍໃນປະເທດ ຍັງບໍ່ທັນບັນລຸໄດ້ໝາກຜົນຄືດັ່ງໄດ້ຄາດຫວັງເທື່ອ. ມີຫຼາຍວິສາຫະກິດ ຫວຽດນາມ ຍັງເຂົ້າຮ່ວມໃນລະດັບມູນຄ່າເພີ່ມຕ່ຳ, ອັດຕາການຫັນເປັນພາຍໃນປະເທດໃນຂະແໜງເຕັກໂນໂລຢີຈຳນວນໜຶ່ງຍັງຈຳກັດຢູ່; ລະດັບແຜ່ກະຈາຍກ່ຽວກັບເຕັກໂນໂລຢີ, ການຄຸ້ມຄອງ ແລະ ສະມັດຕະພາບຍັງບໍ່ທັນສູງ,ບໍ່ທັນຕອງສະໜອງໄດ້ຕາມຄວາມຮຽກຮ້ອງຕ້ອງການຂອງບັນດາລະບົບຕ່ອງໂສ້ການສະໜອງທົ່ວໂລກເທື່ອ. ຄວາມຮຽກຮ້ອງທີ່ວາງອອກໃນໄລຍະໃໝ່ແມ່ນຕ້ອງຍົກສູງຄຸນນະພາບການຮ່ວມມື, ລະດັບແຜ່ກະຈາຍ ແລະ ຄວາມສາມາດປະສານສົມທົບລະຫວ່າງ FDI ກັບ ພື້ນຖານເສດຖະກິດພາຍໃນປະເທດກວ່າອີກ. ທ່ານ ຫງວຽນວັນທັ້ງ ຮອງນາຍົກລັດຖະມົນຕີ ຕັ້ງຄວາມຫວັງວ່າ:
ໃນໄລຍະພັດທະນາໃໝ່, ຫວຽດນາມ ມີການຫັນປ່ຽນຈິນຕະນາການຢ່າງແຮງຈາກ “ການດຶງດູດ FDI ທົ່ວໄປ” ໄປສູ່ “ການຮ່ວມມືລົງທຶນທີ່ມີການຄັດເລືອກ, ມີຄຸນນະພາບ, ມີປະສິດທິຜົນ ແລະ ຍືນຍົງ”. ພວກຂ້າພະເຈົ້າບໍ່ພຽງແຕ່ຕີລາຄາ ແລະ ເອົາໃຈໃສ່ເຖິງເລື່ອງນັກລົງທຶນລົງທຶນເຂົ້າ ຫວຽດນາມ ເທົ່າໃດເທົ່ານັ້ນ ຫາກສິ່ງສຳຄັນກວ່ານັ້ນແມ່ນ ນຳເຕັກໂນໂລຢີຫຍັງ, ສ້າງມູນຄ່າເພີ່ມຫຍັງ, ບຳລຸງສ້າງຊັບພະຍາກອນມະນຸດຄືແນວໃດ, ເຊື່ອມຕໍ່ກັບວິສາຫະກິດ ຫວຽດນາມ ໄດ້ຈັກແຫ່ງ ເພື່ອເຂົ້າຮ່ວມລະບົບຕ່ອງໂສ້ການສະໜອງ, ປະກອບສ່ວນຄືແນວໃດເຂົ້າໃນການຫັນເປັນສີຂຽວ, ຫັນເປັນດີຈີຕອນ ແລະ ຍົກສູງຄວາມສາມາດພາຍໃນຂອງພື້ນຖານເສດຖະກິດ.
ຕາມບັນດານັກຊ່ຽວຊານແລ້ວ, ຫວຽດນາມ ມີວິສາຫະກິດກວ່າ 1 ລ້ານແຫ່ງແຕ່ມີພຽງ 5.000 ແຫ່ງເຊື່ອມຕໍ່ໂດຍກົງກັບລະບົບຕ່ອງໂສ້ການສະໜອງທົ່ວໂລກ ຫຼືບັນດາກຸ່ມບໍລິສັດນາໆຊາດ. ທ່ານນາງ ໂດທິຖຸຍເຮືອງ, ຮອງປະທານຜູ້ປະຈຳການສະມາຄົມວິສາຫະກິດເອເລັກໂຕນິກ ຫວຽດນາມ ຖືວ່າ:
ໃນໄລຍະຈະມາເຖິງ, ປັດໄຈຕັດສິນກ່ຽວກັບຄວາມສາມາດດ້ານເຕັກໂນໂລຢີ, ການປ່ຽນແປງໃໝ່ການຜະລິດແມ່ນບັນດາປັດໄຈພິເສດເຊິ່ງວິສາຫະກິດ ຫວຽດນາມ ຕ້ອງເອົາໃຈໃສ່ເປັນພິເສດ. ວິສາຫະກິດໃດສຸມໃສ່ເຕັກໂນໂລຢີ, ປັນຍາປະດິດ (AI), ຫັນການຫັນເປັນດີຈີຕອນສີຂຽວເປັນອັດຕະໂນມັດ ຈະແມ່ນບັນດາວິສາຫະກິດຍາດໄດ້ໄຊຊະນະໃນການແຂ່ງຂັນເຊື່ອມຕໍ່ ແລະ ເຂົ້າຮ່ວມລະບົບຕ່ອງໂສ້ການສະໜອງທົ່ວໂລກສຳເລັດຜົນ. ວິສາຫະກິດ ຫວຽດນາມ ກໍ່ຕ້ອງເປັນເຈົ້າການກວ່າອີກໃນການເຂົ້າເຖິງບັນດາວິສາຫະກິດ FDI, ພວກເຮົາຕ້ອງພິສູດໃຫ້ເຫັນຄວາມສາມາດ ແລະ ຊອກຫາເຂົາເຈົ້າ, ເພື່ອພ້ອມກັນຈະເລີນຮຸ່ງເຮືອງ..
ຫວຽດນາມ ພວມຢືນຢູ່ຕໍ່ໜ້າກາລະໂອກາດໃຫຍ່ເພື່ອຮັບເອົາກະແສການລົງທຶນໃໝ່ໃນວິວັດການສ້າງໂຄງປະກອບລະບົບຕ່ອງໂສ້ການສະໜອງທົ່ວໂລກຄືນໃໝ່. ແຕ່ໂອກາດຈະກາຍເປັນກຳລັງຂັບເຄື່ອນການເຕີບໂຕໄດ້ຢ່າງແທ້ຈິງ ຖ້າກະແສທຶນ FDI ບໍ່ພຽງແຕ່ຢຸດຢູ່ຂອບຂະໜາດຈົດທະບຽນເທົ່ານັ້ນ, ຫາກຍັງສ້າງພູມປັນຍາ, ເຕັກໂນໂລຢີ, ຊັບພະຍາກອນມະນຸດທີ່ມີຄຸນນະພາບສູງ ແລະ ບັນດາການເຊື່ອມຕໍ່ເລິກເຊິ່ງພໍສົມຄວນເຂົ້າກັບພື້ນຖານເສດຖະກິດພາຍໃນປະເທດອີກດ້ວຍ. ທ່ານ ຫງວຽນວັນທັ້ງ ຮອງນາຍົກລັດຖະມົນຕີ ໃຫ້ຮູ້ຕື່ມອີກວ່າ:
ພັດທະນາວິສາຫະກິດພາຍໃນປະເທດ ແລະ ອຸດສາຫະກຳສະໜັບສະໜູນຢ່າງແຮງເພື່ອໃຫ້ວິສາຫະກິດ ຫວຽດນາມ ເຂົ້າຮ່ວມລະບົບຕ່ອງໂສ້ມູນຄ່າທົ່ວໂລກຢ່າງເລິກເຊິ່ງກວ່າອີກ. ພວກຂ້າພະເຈົ້າກຳນົດວ່າ ນີ້ແມ່ນໜ້າທີ່ທີ່ມີຄວາມໝາຍຍຸດທະສາດຍາວນານ. ລັດຈະສືບຕໍ່ມີບັນດານະໂຍບາຍໜູນຊ່ວຍວິສາຫະກິດຍົກສູງຄວາມສາມາດໃນການຄຸ້ມຄອງບໍລິຫານ, ມາດຕະຖານຄຸນນະພາບ, ປ່ຽນແປງໃໝ່ເຕັກໂນໂລຢີ, ການຫັນເປັນດີຈີຕອນ, ການເຂົ້າເຖິງສິນເຊື່ອ ແລະ ການເຊື່ອມຕໍ່ກັບບັນດາກຸ່ມບໍລິສັດນາໆຊາດ.
ຕົ້ນເດືອນເມສາ ທີ່ຜ່ານມາ, ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ຫວຽດນາມ ໄດ້ເຊັນປະກາດໃຊ້ແຜນການພັດທະນາເສດຖະກິດ - ສັງຄົມ, ການເງິນແຫ່ງຊາດ, ການກູ້ຢຶມຈ່າຍໜີ້ສາທາລະນະ ແລະ ການລົງທຶນສາທາລະນະໄລຍະກາງ ໃນໄລຍະ 5 ປີ (2026 - 2030), ໃນນັ້ນ ນະໂຍບາຍດຶງດູດ FDI ຕ້ອງເອົາໃຈໃສ່ເປັນພິເສດເຖິງການຖ່າຍທອດເຕັກໂນໂລຢີ ແລະ ການເຊື່ອມຕໍ່ກັບວິສາຫະກິດພາຍໃນປະເທດ. ສິ່ງນີ້ຢັ້ງຢືນຄວາມຄາດຫວັງຂອງ ຫວຽດນາມ ໃນການພັດທະນາພາກສ່ວນເສດຖະກິດທີ່ມີເງິນລົງທຶນຈາກຕ່າງປະເທດ ໃນສາຍສຳພັນເຊື່ອມຈອດກັນ ແລະ ຄວາມສະເໝີພາບກັບບັນດາພາກສ່ວນເສດຖະກິດພາຍໃນປະເທດ. ຈາກນັ້ນ, ກສ້າງກຳລັງຂັບເຄື່ອນໃຫ້ແກ່ໄລຍະ 10 ປີຈະມາເຖິງ, ເມື່ອ ຫວຽດນາມ ກ້າວເຂົ້າສູ່ສັງກາດໃໝ່ - ສັງກາດແຫ່ງການພັດທະນາຮັ່ງມີເຂັ້ມແຂງ ແລະ ວັດທະນາຖາວອນຂອງຊາດ.
