ໃນແຜນການພັດທະນາໄລຍະ 2026 – 2030, ຫວຽດນາມ ໄດ້ສຸມໃສ່ແຫຼ່ງກຳລັງເພື່ອບຸກທະລຸກາຍເປັນປະເທດອຸດສາຫະກຳທັນສະໄໝ, ລາຍຮັບປານກາງສູງ. ເປົ້າໝາຍເພີ່ມສະມັດຕະພາບແຮງງານສະເລ່ຍກວ່າ 6,5% ຕໍ່ປີນັ້ນ ຮຽກຮ້ອງໃຫ້ມີການປ່ຽນແປງຢ່າງຂ້ຽວຂາດນັບແຕ່ຈິນຕະນາການ ຕະຫຼອດຮອດການກະທຳຂອງແຮງງານແຕ່ລະຄົນ. ດັ່ງນັ້ນ, ເດືອນກຳມະກອນປີ 2026 ໄດ້ກາຍເປັນຈຸດເນັ້ນໜັກຢັ້ງຢືນບົດບາດແກ່ນສານຂອງຊົນຊັ້ນກໍາມະກອນໃນວິວັດທະນາການພັດທະນາໃໝ່.
ນະວັດຕະກຳ: ກຳລັງໜູນໃຫ້ແກ່ການເພີ່ມສະມັດຕະພາບແຮງງານ
ການຜະລິດຕົວຈິງໄດ້ຊີ້ໃຫ້ເຫັນວ່າ ສະມັດຕະພາບແຮງງານບໍ່ຈຳເປັນຕ້ອງເລີ່ມຈາກບັນດາລະບົບເຄື່ອງຈັກນັບລ້ານໂດລາສະຫະລັດ, ແຕ່ມັນອາດຈະມາຈາກບັນດາການດັດປັບອັນເລັກນ້ອຍໃນຂະບວນວິວັດການເຄື່ອນໄຫວ. ໃນໄລຍະພັດທະນາປັດຈຸບັນ, ເມື່ອທ່າໄດ້ປຽບຄ່າແຮງງານຕ່ຳບໍ່ເໝາະສົມແລ້ວ, ນີ້ແມ່ນຈຸດເວລາທີ່ແຮງງານຢັ້ງຢືນຄນຸຄ່າດ້ວຍລະດັບສີມືແຮງງານ ແລະ ຄວາມສາມາດເປັນເຈົ້າຂອງເຕັກໂນໂລຢີ.
ສິ່ງພິສູດອັນຈະແຈ້ງຂອງທ່າອ່ຽງນີ້ແມ່ນນັບມື້ນັບມີຫຼາຍ “ຜູ້ລິເລີ່ມ” ຢູ່ບັນດາວິສາຫະກິດ. ຕົວຢ່າງຄືກຸ່ມບໍລິສັດຕ່ຳແຜ່ນຕັດຫຍິບເລກ 10, ແທນທີ່ຂຶ້ນກັບທັກສະຫັດຖະກຳຢູ່ບັນດາຂັ້ນຕອນຍາກ, ຖັນແຖວນັກເຕັກນິກໄດ້ເປັນເຈົ້າການຫັນເຄື່ອງອຸປະກອນເປັນອັດຕະໂນມັດເພື່ອນຳມາເຊິ່ງປະສິດທິຜົນສູງສຸດໃນຂັ້ນຕອນການຜະລິດ. ເມື່ອແບ່ງປັນກ່ຽວກັບມາດຕະການນີ້, ອ້າຍ ຟ້າມວັນທ່ວນ, ພະແນກກົນຈັກໄຟຟ້າ, ບໍລິສັດໃຫຍ່ຕ່ຳແຜ່ນຕັດຫຍິບເລກ 10, ໃຫ້ຮູ້ວ່າ:
“ດ້ວຍເຄື່ອງອຸປະກອນນີ້, ພວກຂ້າພະເຈົ້າສາມາດສ້າງເປັນລະບົບອັດຕະໂນມັດ, ພ້ອມທັງເລືອກໄດ້ຂໍ້ມູນຕົວເລກທັງໝົດແບບອັດຕະໂນມັດ ແລະ ມີພຽງແຕ່ກົດປຸ່ມເທື່ອດຽວ ກໍສາມາດເຄື່ອນໄຫວແບບອັດຕະໂນມັດຕາມລາຍການທີ່ໄດ້ຕິດຕັ້ງໄວ້ກ່ອນແລ້ວ”.
ປະສິດທິຜົນຈາກບັນດາການດັດປັບຢ່າງລະອຽດຄືຢູ່ບໍລິສັດໃຫຍ່ຕໍ່າແຜ່ນຕັດຫຍິບເລກ 10 ໄດ້ຊີ້ໃຫ້ເຫັນວ່າ ເມື່ອນາຍຊ່າງເປັນເຈົ້າການໃນການເປັນເຈົ້າຂອງເຕັກໂນໂລຢີ, ສະມັດຕະພາບແຮງງານຈະສ້າງບັນດາບາດກ້າວກະໂດດຂັ້ນ. ນີ້ບໍ່ແມ່ນບັນດາຄວາມມານະພະຍາຍາມແບບກະແຈກກະຈາຍອີກແລ້ວ ຫາກຍັງໄດ້ກາຍເປັນເຂັມຊີ້ທິດໃຫ້ແກ່ຂະບວນການແຂ່ງຂັນຂອງກຳມະກອນ, ຜູ້ອອກແຮງງານ, ພິເສດແມ່ນຢູ່ເສດຖະກິດນຳໜ້າຄືນະຄອນຫຼວງ ຮ່າໂນ້ຍ. ທ່ານ ເລດິ່ງຮຸ່ງ, ຮອງປະທານຜູ້ປະຈຳການສະຫະພັນແຮງງານນະຄອນ ຮ່າໂນ້ຍ, ຖືວ່າ:
“ຂະບວນການລິເລີ່ມ, ປະດິດຄິດສ້າງໃນກຳມະກອນ, ລັດຖະກອນຢູ່ນະຄອນຫຼວງ ໄດ້ຮັບການຮັກສາມາເປັນເວລາຫຼາຍປີຢູ່ໃນທຸກຂົງເຂດ, ນັບທັງກຸ່ມກ້ອນລັດຖະກອນ, ພາລະກອນ ແລະ ກຸ່ມກ້ອນກຳມະກອນ, ໃນນັ້ນ, ພວກຂ້າພະເຈົ້າມີຄວາມສົນໃຈເຖິງກຸ່ມກ້ອນກຳມະກອນຜະລິດຢູ່ບັນດາວິສາຫະກິດ. ຂະບວນການດັ່ງກ່າວກໍ່ໄດ້ປະກອບສ່ວນສົ່ງເສີມຜູ້ອອກແຮງງານໃຫ້ເຂົ້າຮ່ວມໄດ້ເປັນຢ່າງດີກວ່າ, ມີຄວາມຮັບຜິດຊອບກວ່າ ຕໍ່ກັບວຽກງານຂອງຕົນ ແລະ ພິເສດແມ່ນສຳລັບກົມກອງຂອງຕົນເພື່ອເພີ່ມສະມັດຕະພາບແຮງງານໄດ້ເປັນຢ່າງດີກວ່າ”.
ສ້າງຖັນແຖວ “ກຳມະກອນພູມປັນຍາ” ຕອບສະໜອງຄວາມຮຽກຮ້ອງຕ້ອງການໃໝ່
ເມື່ອກ້າວເຂົ້າສູ່ສັງກາດບຸກບືນ, ຫວຽດນາມ ບໍ່ພຽງແຕ່ຊອກຫາການເຕີບໂຕໂດຍອີງໃສ່ຄ່າແຮງງານຕ່ຳອີກແລ້ວ, ຫາກຍັງມີການຫັນປ່ຽນໄປສູ່ຮູບແບບເສດຖະກິດພູມປັນຍາຢ່າງແຮງ. ຕາມບົດລາຍງານດັດຊະນີນະວັດຕະກຳທົ່ວໂລກ (Global Innovation Index - GII) ປີ 2025 ຂອງອົງການຊັບສິນພູມປັນຍາໂລກ (WIPO), ຫວຽດນາມ ແມ່ນໜຶ່ງໃນບັນດາປະເທດທີ່ມີລະດັບການເຕີບໂຕສະມັດຕະພາບແຮງງານໄວທີ່ສຸດໃນທົ່ວໂລກໃນທົດສະວັດທີ່ຜ່ານມາ. ເຖິງຢ່າງໃດກໍຕາມ, ເພື່ອຫັນເປົ້າໝາຍໃຫ້ໄດ້ຈັດເຂົ້າກຸ່ມ 3 ປະເທດນຳໜ້າ ອາຊຽນ ກ່ຽວກັບສະມັດຕະພາບໃນປີ 2030 ໃຫ້ປະກົດຜົນເປັນຈິງ, ຜູ້ອອກແຮງງານຕ້ອງປະເຊີນໜ້າກັບຄວາມຮຽກຮ້ອງບຳລຸງທັກສະຄືນໃໝ່ (reskilling) ແລະ ຍົກລະດັບທັກສະດີຈີຕອນເພື່ອປັບຕົວໃຫ້ເຂົ້າກັບບັນດາ “ໂຮງງານອັດສະລິຍະ”. ທ່ານ ເທີນດຶກຫວຽດ, ຜູ້ອຳນວຍການໃຫຍ່ບໍລິສັດໃຫຍ່ຕ່ຳແຜ່ນຕັດຫຍິບເລກ 10 ໃຫ້ຮູ້ວ່າ:
“ກ່ຽວກັບສະມັດຕະພາບແຮງງານ, ພວກຂ້າພະເຈົ້າໄດ້ລົງທຶນເຂົ້າການບຳລຸງສ້າງ, ຍົກສູງຄຸນນະພາບແຫຼ່ງຊັບພະຍາກອນມະນຸດໃຫ້ຖັນແຖວຜູ້ອອກແຮງງານ ຢ່າງຫຼວງຫຼາຍທີ່ສຸດ, ລວມມີບັນດາພາກສ່ວນທາງອ້ອມ, ຄື: ເຕັກນິກ, ເຕັກໂນໂລຢີ ແລະ ຜູ້ອອກແຮງງານທຳການຜະລິດໂດຍກົງ; ລົງທຶນເຂົ້າໃນການຫັນເປັນດີຈີຕອນໃນຕະຫຼອດຊຸມປີຜ່ານມາ”.
ສະມັດຕະພາບແຮງງານເຕີບໂຕ ຈະຊ່ວຍໃຫ້ລາຍຮັບຕົວຈິງໄດ້ຮັບການປົວແປງ. ນະວັດຕະກຳໃນຈຸດເວລານີ້ ບໍ່ພຽງແຕ່ແມ່ນເພື່ອເພີ່ມສະມັດຕະພາບໃຫ້ແກ່ວິສາຫະກິດເທົ່ານັ້ນ, ຫາກຍັງແມ່ນເພື່ອປົກປ້ອງ “ທີ່ຕັ້ງ” ຂອງຜູ້ອອກແຮງງານເອງໃນຕະຫຼາດທີ່ນັບມື້ນັບເຄັ່ງຄັດຂຶ້ນ. ທ່ານ ເງາະຢຸຍຫຽວ, ຮອງປະທານສະຫະພັນໃຫຍ່ແຮງງານ ຫວຽດນາມ, ເນັ້ນໜັກວ່າ:
“ກຳມະກອນສືບຕໍ່ແມ່ນໃຈກາງຂອງຄວາມສາມັກຄີມະຫາຊົນແຮງງານ, ເພື່ອຮັບປະກັນການນຳພາຂອງພັກ ແລະ ການຄຸ້ມຄອງຂອງລັດ. ກຳມະກອນ, ໂດຍສະເພາະແມ່ນກຳມະກອນພູມປັນຍາ, ຈະແມ່ນກຳລັງທີ່ມີຫຼາຍຜະລິດຕະພັນທີ່ມີຫົວຄິດປະດິດສ້າງເພື່ອໃຫ້ພວກເຮົາປະຕິບັດການຫັນເປັນດີຈີຕອນແຫ່ງຊາດ ແລະ ນະວັດຕະກຳ”.
ສະມັດຕະພາບແຮງງານແມ່ນເສັ້ນທາງສັ້ນທີ່ສຸດເພື່ອໃຫ້ ຫວຽດນາມ ຫຼຸດພົ້ນອອກຈາກແຮ້ວລາຍຮັບປານກາງ. ບັນດາຂໍ້ລິເລີ່ມຂອງເຂົາເຈົ້າໃນວັນນີ້ ກໍແມ່ນບັນດາກ້ອນດິນຈີ່ທີ່ໝັ້ນແກ່ນທີ່ສຸດເພື່ອບູລະນະສ້າງສາປະເທດ ຫວຽດນາມ ໃຫ້ວັດທະນາຖາວອນ, ສີວິໄລ. ຍ້ອນແນວນັ້ນ, ເດືອນກຳມະກອນປີ 2026 ໄດ້ຖືພາລະກຳຈຸດປະກາຍທວນໄຟແຫ່ງຄວາມປະດິດຄິດສ້າງໃນຜູ້ອອກແຮງງານແຕ່ລະຄົນ./.
