ຕອນເຊົ້າວັນທີ 25/12, ຢູ່ຮ່າໂນ້ຍ, ກະຊວງກະສິກຳ ແລະ ພັດທະນາຊົນນະບົດຫວຽດນາມໄດ້ຈັດຕັ້ງກອງປະຊຸມສະຫຼຸບກ່ວາ 1 ປີ ແຫ່ງວັນປະຕິບັດໂຄງການຈຸດໝາຍແຫ່ງຊາດກໍ່ສ້າງຊົນນະບົດໃໝ່ ແລະ ຜັນຂະຫຍາຍແຜນການປີ 2012.ບົດລາຍງານທີ່ກອງປະຊຸມໃຫ້ເຫັນວ່າ, ພາຍຫຼັງກ່ວາ 1 ປີແຫ່ງການຜັນຂະຫຍາຍປະຕິບັດໂຄງການຈຸດໝາຍກໍ່ສ້າງຊົນນະບົດໃໝ່, ໄດ້ສາມາດສ້າງຕັ້ງຄະນະຊີ້ນຳສ້າງຊົນນະບົດໃໝ່ຢ່າງເປັນເອກະພາບກັນຈາກສູນກາງລົງຮອດຂັ້ນຕາແສງ. ລັດຖະບານຫວຽດນາມໄດ້ປະກາດໃຊ້ 5 ດຳລັດ ແລະ 31 ຂໍ້ຕົກລົງເພື່ອຮັບໃຊ້ໃຫ້ແກ່ການສ້າງຊົນນະບົດໃໝ່, ບັນດາກະຊວງ, ຂະແໜງການກໍ່ໄດ້ປະກາດໃຊ້ເອກະສານຜັນຂະຫຍາຍປະຕິບັດໂຄງການນີ້. ມາຮອດປະຈຸບັນ, 63 ແຂວງ, ນະຄອນ ໄດ້ສຳເລັດການຕີລາຄາສະພາບການຕົວຈິງຊົນນະບົດໃໝ່ຕາມ 19 ມາດຖານຂອງໂຄງການໃນເບື້ອງຕົ້ນ. ກ່າວຄຳເຫັນທີ່ກອງປະຊຸມ, ທ່ານຮອງນາຍົກລັດຖະມົນຕີຫວຽດນາມ ຫວູວັນນິນໄດ້ໃຫ້ຄຳຕັກເຕືອນວ່າ: ໃນວິວັດການຜັນຂະຫຍາຍປະຕິບັດໂຄງການ, ທ້ອງຖີ່ນຕ່າງໆຄວນປະຕິບັດຢ່າງຄົບຊຸດ, ເດັດຂາດ, ເປັນເອກະສັນນຳກັນກ່ຽວກັບການຮັບຮູ້ຈາກສູນກາງລົງຮອດທ້ອງຖີ່ນ, ຫຼີກລ້ຽງແນວຄິດຟ້າວຟັ່ງໃນການປະຕິບັດ.
