ຕອນເຊົ້າວັນທີ 3 ມັງກອນ, ຢູ່ນະຄອນໂຮຈິມິນ, ສານປະຊາຊົນສູງສຸດໄດ້ຈັດກອງປະຊຸມຜັນຂະຫຍາຍວຽກງານປີ 2012. ກ່າວຄຳເຫັນທີ່ກອງປະຊຸມ, ທ່ານ ເຈືອງເຕີ້ນຊາງ ປະທານປະເທດ, ຫົວໜ້າຄະນະຊີ້ນຳການປະຕິຮູບດ້ານຕຸລາການຂັ້ນສູນກາງໄດ້ຊີ້ແຈງເຖິງບັນດາດ້ານຖືກຈຳກັດ ຂອງຂະແໜງສານປະຊາຊົນຄື: ສານຍັງອອກຄຳຕັດສິນຢ່າງບໍ່ຖືກຕ້ອງ ຍ້ອນຄວາມຜິດໂດຍອັດຕະວິໄສຂອງຜູ້ພິພາກສາ, ມີປະກົດການເສື່ອມທາດຂາດຄຸນຂອງພະນັກງານຈຳນວນໜຶ່ງ... ຄວນໄດ້ຮັບການແກ້ໄຂ. ກ່ຽວກັບໜ້າທີ່ສຳຄັນຂອງຂະແໜງໃນໄລຍະທີ່ຈະເຖິງ, ທ່ານ ເຈືອງເຕີ້ນຊາງ ເນັ້ນໜັກວ່າ :
“ຂະແໜງສານປະຊາຊົນຄວນເລັ່ງໃສ່ຍົກສູງຄຸນນະພາບວຽກງານການພິພາກສາ, ສູ້ຊົນບໍ່ປະໃຫ້ເກີດການພິພາກສາຢ່າງບໍ່ຖືກຕ້ອງຕາມລະບຽບກົດໝາຍ. ສານປະຊາຊົນຂັ້ນຕ່າງໆຄວນປ່ຽນໃໝ່ການຈັດປະຊຸມສານ, ກຳນົດຢ່າງຖືກຕ້ອງກ່ຽວກັບທີ່ຕັ້ງບົດບາດ, ສິດອຳນາດ, ໜ້າທີ່ຮັບຜິດຊອບຂອງຜູ້ປະຕິບັດການດຳເນີນຄະດີ ແລະເຂົ້າຮ່ວມການດຳເນີນຄະດີ, ຮັບປະກັນລັກສະນະເປີດເຜີຍ, ປະຊາທິປະໄຕ, ເຂັ້ມງວດ, ຍົກສູງຄຸນນະພາບການໂຕ້ແຍ້ງທີ່ປະຊຸມສານບົນພື້ນຖານບັນດາມາດຕາຂອງກົດໝາຍວ່າດ້ວຍການດຳເນີນຄະດີ ແລະ ເນື້ອໃນຈິດໃຈການປະຕິຮູບດ້ານຕຸລາການ, ເອົາໃຈໃສ່ປະຕິບັດວຽກງານການໄກ່ເກ່ຍໃນການແກ້ໄຂບັນດາຄະດີແພ່ງ, ເພີ່ມທະວີການກວດກາ, ຕິດຕາມກວດກາວຽກງານຈັດການປະຊຸມສານຢູ່ສານຂັ້ນຕ່າງໆ ”
ທ່ານປະທານປະເທດ ເຈືອງເຕີ້ນຊາງ ຍັງສະເໜີຂະແໜງສານປະຊາຊົນຈົ່ງຈັດຕັ້ງປະຕິບັດບັ້ນຂົນຂວາຍຮ່ຳຮຽນ ແລະ ປະຕິບັດຕາມແບບຢ່າງຄຸນສົມບັດປະທານ ໂຮຈິມິດ, ຂະບວນການແຂ່ງຂັນ “ຮັບໃຊ້ລັດ, ປະຕິບັດຕາມລະບຽບກົດໝາຍ, ມີຈິດໃຈທ່ຽງທຳ” ເປັນຢ່າງດີ, ພ້ອມກັນນັ້ນ ກໍ່ປັບໃໝລົງໂທດຕໍ່ທຸກໆການກະທຳລະເມີດກົດໝາຍ, ສໍ້ລາດບັງຫຼວງຂອງພະນັກງານລັດຖະກອນຢູ່ພາຍໃນຂະແໜງ.
