(vovworld) - ກ່ອນທີ່ດຳເນີນກອງປະຊຸມຂັ້ນສູງ ອາຊຽນ ຄັ້ງທີ 30, ສະຖາບັນຄົ້ນຄວ້າຍຸດທະສາດສາກົນ Stratbase ADR (ADRI) ຂອງ ຟີລິບປິນ ຈັດຕັ້ງການໂອ້ລົມສົນທະນາກ່ຽວກັບບັນຫາທະເລຕາເວັນອອກດ້ວຍຫົວຂໍ້ວ່າ “ທະເລຕາເວັນອອກ: ຟີລິບປິນ, ອາຊຽນ ແລະ ບັນດາຄູ່ຮ່ວມມືສາກົນ” ໃນວັນທີ 25/04 ຢູ່ Manila, ຟີລິບປິນ. ການໂອ້ລົມສົນທະນາໄດ້ເຕື້ອງເຖິງບາງການຜັນແປຢູ່ທະເລຕາເວັນອອກໃນໄລຍະຜ່ານມາ, ໃນນັ້ນມີບັນດາບາດກ້າວໃນການຮ່ວມມືສາກົນກ່ຽວກັບເລື່ອງແກ້ໄຂການຂັດແຍ້ງກັນຢູ່ທະເລຕາເວັນອອກ, ກາລະໂອກາດ ແລະ ສິ່ງທ້າທາຍໃນການປະຕິບັດເນື້ອໃນຄຳຕັດສິນຂອງສານອະນຸຍາໂຕຕຸລາການ (PCA) ຈາກນັ້ນ ຍົກອອກບາງມາດຕະການ ເພື່ອແນໃສ່ແກ້ໄຂການຂັດແຍ້ງກັນຢູ່ທະເລຕາເວັນອອກດ້ວຍສັນຕິວິທີ, ຕາມກົດໝາຍສາກົນ. ການໂອ້ລົມສົນທະນາກໍ່ເຕື້ອງເຖິງບັນດາເນື້ອໃນຮ້ອນເຮັ່ງທີ່ສຸດໃນນະໂຍບາຍພົວພັນຕ່າງປະເທດຂອງ ຟີລິບປິນ ຄື: ບັນຫາທີ່ກ່ຽວຂ້ອງເຖິງພູມສາດການເມືອງ, ການທະຫານ, ວິທະຍາສາດທະເລ, ກົດໝາຍສາກົນ ແລະ ນະໂຍບາຍພົວພັນຕ່າງປະເທດຂອງ ຟີລິບປິນກັບ ອາຊຽນ, ຈີນ ແລະ ບັນດາປະເທດ ອື່ນໆ.
