កាលពីមួយឆ្នាំមុន នៅថ្ងៃទី ៤ ខែឧសភា ឆ្នាំ ២០២៥ ការិយាល័យនយោបាយបានចេញសេចក្តីសម្រេចចិត្តលេខ ៦៨ ស្តីពីការអភិវឌ្ឍសេដ្ឋកិច្ចឯកជន។ សេចក្តីសម្រេចចិត្តនេះ បានបង្កើតចំណុចរបត់មួយក្នុងការត្រិះរិះអភិវឌ្ឍន៍ និងលើកកម្ពស់តួនាទីរបស់សេដ្ឋកិច្ចឯកជន តាមនោះ ដោះសោប្រភពធនធាននេះ ឱ្យក្លាយជាកម្លាំងចលករដ៏សំខាន់បំផុតនៃខឿនសេដ្ឋកិច្ច។ បន្ទាប់ពីសេចក្តីសម្រេចចិត្តបានចូលជាធរមាន ស្ថាប័នមានសមត្ថកិច្ចបានចេញឯកសារដើម្បីនាំសេចក្តីសម្រេចចិត្តចូលទៅក្នុងជីវភាពប្រចាំថ្ងៃ។
ទាក់ទងនឹងដីធ្លី មូលដ្ឋាននានាក៏កំពុងអនុវត្តគោលនយោបាយគាំទ្រយ៉ាងសកម្ម ស្របតាមសេចក្តីសម្រេចចិត្តលេខ ៦៨។ តាមនោះ មូលនិធីដីធ្លីនៅក្នុងមណ្ឌលឧស្សាហកម្ម តំបន់ឧស្សាហកម្ម និងចម្ការនានា ត្រូវបានផ្តល់អាទិភាពបែងចែកសម្រាប់ក្រុមហ៊ុនចាប់ផ្តើមអាជីពនវានុវត្តន៍ សហគ្រាសបច្ចេកវិទ្យាខ្ពស់ និងសហគ្រាសធុនតូច និងមធ្យម។ ទណ្ទឹមនឹងនោះ មានយន្តការដើម្បីកាត់បន្ថយថ្លៃជួលដីរហូតដល់ ៣០% អាស្រ័យលើតម្រូវការជាក់ស្តែង និងតុល្យភាពថវិការបស់មូលដ្ឋាននីមួយៗ។ នេះគឺជាកត្តាសំខាន់ដែលជួយសហគ្រាសឱ្យស្ថេរភាពផលិតកម្ម ពង្រីកទំហំ និងលើកកម្ពស់ប្រសិទ្ធភាពប្រតិបត្តិការ។ ទាក់ទងនឹងការកែលម្អយន្តការជំរុញការអភិវឌ្ឍសេដ្ឋកិច្ចឯកជន អនុរដ្ឋមន្ត្រីក្រសួងហិរញ្ញវត្ថុ លោក Nguyen Duc Chi បានវាយតម្លៃថា៖
«ចំពោះគោលនយោបាយអមជាមួយសេចក្តីសម្រេចចិត្ត គឺយើងបានធ្វើស្ថាប័នរូបនីយកម្ម ហើយបានចាត់វិធានការនានាដើម្បីឲ្យសហគ្រាសឯកជនអាចទទួលបានអត្ថប្រយោជន៍ និងអភិវឌ្ឍ។ សហគ្រាសឯកជនទទួលបាននិងចូលរួមក្នុងគម្រោងជាតិសំខាន់ៗ។ លើកទឹកចិត្តយ៉ាងខ្លាំងដល់សហគ្រាសឱ្យចូលរួម និងបង្កើតយន្តការសមស្របដើម្បីឱ្យសហគ្រាសឯកជនអាចទទួលបន្ទុក និងអនុវត្តគម្រោងទាំងនេះ រួមចំណែកនិងបង្ហាញពីតួនាទីដ៏សំខាន់បំផុត ស្របតាមស្មារតីនៃសេចក្តីសម្រេចចិត្តលេខ ៦៨»។
រយៈពេលមួយឆ្នាំកន្លងមកនេះ បានមើលឃើញពីភាពប្រសើរឡើងគួរឱ្យកត់សម្គាល់នៅក្នុងបរិយាកាសអាជីវកម្ម។ ក្នុងរយៈពេលបួនខែដើមឆ្នាំ ២០២៦ វៀតណាមមានសហគ្រាសបង្កើតថ្មី និងប្រតិបត្តិការឡើងវិញជាង ១១៩,០០០ ដែលកើនឡើងជិត ៣៣% បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។ តួរលេខទាំងនេះ បានបង្ហាញថា ទំនុកចិត្តរបស់ទីផ្សារត្រូវបានកែលម្អគួរឱ្យកត់សម្គាល់៕
