ກອງປະຊຸມສຸດຍອດ ອາຊຽນ ຄັ້ງທີ 48 ມີຫົວຂໍ້ “ການນຳທາງອະນາຄົດຂອງ ອາຊຽນ ຮ່ວມກັນ”. ກອງປະຊຸມໄດ້ສຸມໃສ່ປຶກສາຫາລື 3 ບຸລິມະສິດໃຫຍ່: ພື້ນຖານກ່ຽວກັບສັນຕິພາບ ແລະ ຄວາມໝັ້ນຄົງ; ບັນດາແລວພັດທະນາ; ມອບສິດໃຫ້ແກ່ປະຊາຊົນ.
ອາຊຽນ ຫັນຈາກຈິນຕະນາການ “ປັບຕົວ” ໄປສູ່ຈິນຕະນາການ “ເປັນເຈົ້າການກຳນົດ”
ນີ້ແມ່ນກອງປະຊຸມສຸດຍອດຄັ້ງທຳອິດຂອງ ອາຊຽນ ໃນປີ 2026, ກໍແມ່ນຈຸດເວລາ ອາຊຽນ ກ້າວເຂົ້າສູ່ໄລຍະພັດທະນາໃໝ່ ພາຍຫຼັງເສັ້ນທາງຫັນວິໄສທັດປະຊາຄົມ ອາຊຽນ ຮອດປີ 2025 ໃຫ້ປະກົດຜົນເປັນຈິງ. ບັນດາສິ່ງທ້າທາຍໃນປັດຈຸບັນຂອງ ອາຊຽນ ບໍ່ພຽງແຕ່ຢຸດຢູ່ບັນດາບັນຫາເດີມ ຄື ການຄ້າ ຫຼື ການຮ່ວມສຳພັນພາຍໃນເຂດເທົ່ານັ້ນ, ຫາກຍັງເປີດກວ້າງໄປສູ່ການແກ້ງແຍ້ງຍຸດທະສາດລະຫວ່າງບັນດາປະເທດໃຫຍ່, ລະບົບສະໜອງຖືກຂາດວັກຂາດຕອນ; ການຫັນເປັນສີຂຽວ, ຫັນເປັນດີຈີຕອນ, ຄວາມໝັ້ນຄົງດ້ານພະລັງງານ ແລະ ນັບທັງຄວາມສ່ຽງແບ່ງແຍກເສດຖະກິດທົ່ວໂລກອີກດ້ວຍ. ໃນສະພາບການນັ້ນ, ຫົວຂໍ້ທີ່ ຟີລິບປິນ ຄັດເລືອກໃນປີປະທານ ອາຊຽນ 2026 – “ການນຳທາງອະນາຄົດຂອງ ອາຊຽນ ຮ່ວມກັນ” - ໄດ້ສ່ອງແສງໃຫ້ເຫັນຈິດໃຈຂອງພາກພື້ນ. ນັ້ນແມ່ນ ອາຊຽນ ຢາກສືບຕໍ່ສວມບົດບາດ “ເປັນຜູ້ພາທາງ” ແທນທີ່ຖືກຕົກເຂົ້າສູ່ກະແສແກ້ງແຍ້ງສາກົນ.
ສິ່ງທີ່ໜ້າສົນໃຈຂອງກອງປະຊຸມສຸດຍອດ ອາຊຽນ ຄັ້ງທີ 48 ແມ່ນ ເນື້ອໃນຈຸດສຸມບໍ່ພຽງແຕ່ນອນຢູ່ໃນການຮັກສາຄວາມສາມັກຄີພາຍໃນກຸ່ມເທົ່ານັ້ນ, ຫາກຍັງນອນຢູ່ນຳການສ້າງກຳລັງຄວາມສາມາດສ້າງຄວາມເຂັ້ມແຂງດ້ວຍຕົນເອງຍຸດທະສາດຂອງ ອາຊຽນ ອີກດ້ວຍ. ສິ່ງດັ່ງກ່າວໄດ້ຊີ້ໃຫ້ເຫັນວ່າ ອາຊຽນ ພວມຫັນຈາກຈິນຕະນາການ “ປັບຕົວ” ໄປສູ່ຈິນຕະນາການ “ເປັນເຈົ້າການກຳນົດ”. ໃນສະພາບການໂລກທີ່ນັບມື້ນັບຂາດສະຖຽນລະພາບນັ້ນ, ອາຊຽນ ເຂົ້າໃຈວ່າ ຖ້າບໍ່ມີກຳລັງຄວາມສາມາດຢ່າງພຽງພໍເພື່ອເປັນເຈົ້າຕົນເອງທາງດ້ານເສດຖະກິດ, ເຕັກໂນໂລຢີ ແລະ ລະບົບສະໜອງໄດ້, ພາກພື້ນຈະກາຍເປັນບ່ອນຖືກຜົນກະທົບໂດຍກົງຈາກບັນດາການແກ້ງແຍ້ງສິດອຳນາດທົ່ວໂລກຢ່າງງ່າຍດາຍ. ໃນກອງປະຊຸມ, ທ່ານນາງ Theresa Lazaro ລັດຖະມົນຕີການຕ່າງປະເທດ ຟີລິບປິນ ໄດ້ເນັ້ນໜັກວ່າ:
“ໃນສະພາບທີ່ເກີດມີບັນດາການຜັນແປຢ່າງຮີບດ່ວນນີ້, ອາຊຽນ ບໍ່ຫຼົງລືມບັນດາບຸລິມະສິດທີ່ກວ້າງໃຫຍ່ ແລະ ຍາວນານຂອງຕົນ. ດ້ວຍຫົວຂໍ້ປະທານໝູນວຽນ ອາຊຽນ ຂອງຟີລິບປິນ ປີ 2026 “ພ້ອມກັນກຳນົດທິດອະນາຄົດ”, ອາຊຽນ ເຂົ້າໃຈວ່າ ເພື່ອຜ່ານຜ່າຄວາມຂາດສະຖຽນລະພາບໃນປັດຈຸບັນ ຮຽກຮ້ອງຕ້ອງມີທັງຄວາມມີໄຫວພິບ ແລະ ຄວາມສາມາດຮັບມືກັບບັນດາສິ່ງທ້າທາຍຮີບດ່ວນໃນຕໍ່ໜ້າ, ກໍຄືໃຫ້ຄຳໝັ້ນສັນຍາຢຶດໝັ້ນປະຕິບັດບັນດາເປົ້າໝາຍໄລຍະຍາວໃນປະຊາຄົມ ອາຊຽນ ປີ 2045.”
ກອງປະຊຸມຄັ້ງນີ້ ໄດ້ສຸມໃສ່ສາມການກຳນົດທິດໃຫຍ່ຂອງ ອາຊຽນ ປີ 2026, ລວມມີ: ປັບປຸງບັນດາປັດໄຈແກ່ນສານສຳລັບສັນຕິພາບ ແລະ ຄວາມໝັ້ນຄົງໃນພາກພື້ນ; ເປີດກວ້າງບັນດາແລວວັດທະນາຖາວອນ ແລະ ການຮ່ວມສຳພັນເສດຖະກິດ; ຊຸກຍູ້ການມອບສິດໃຫ້ແກ່ປະຊາຊົນ ອາຊຽນ.
ຫວຽດນາມ - ຕົວຢ່າງທີ່ເປັນປະໂຫຍດໃຫ້ແກ່ຫຼາຍປະເທດໃນພາກພື້ນ
ໃນສະພາບການ ອາຊຽນ ພວມຊອກຫາກຳລັງໜູນການເຕີບໂຕໃໝ່, ຫວຽດນາມ ໄດ້ພົ້ນເດັ່ນຂຶ້ນຄືເປັນຕາໂສ້ສຳຄັນໃນວິວັດທະນາການປັບປຸງໂຄງສ້າງລະບົບສະໜອງທົ່ວໂລກຄືນໃໝ່. ບັນດາຜົນງານກ່ຽວກັບການດຶງດູດການລົງທຶນ, ພັດທະນາພື້ນຖານໂຄງລ່າງ, ການຫັນເປັນດີຈີຕອນ ແລະ ເສດຖະກິດສີຂຽວ ຊ່ວຍໃຫ້ ຫວຽດນາມ ກາຍເປັນຮູບແບບທາບທາມສຳລັບຫຼາຍປະເທດໃນພາກພື້ນ. ທ່ານ Kao Kim Houn ເລຂາທິການໃຫຍ່ ອາຊຽນ, ຖືວ່າ:
“ພື້ນຖານເສດຖະກິດຂອງ ຫວຽດນາມ ພວມມີການເຕີບໂຕຢ່າງວ່ອງໄວ, ນີ້ແມ່ນສິ່ງທີ່ພວກຂ້າພະເຈົ້າຕີລາຄາສູງບັນດາສິ່ງທີ່ ຫວຽດນາມ ພວມເຮັດ. ດັ່ງນັ້ນ, ພວກຂ້າພະເຈົ້າລໍຄອຍໄດ້ເຫັນປະຈັກຕາບົດບາດ ແລະ ການປະກອບສ່ວນຂອງ ຫວຽດນາມ, ພິເສດແມ່ນໃນບັນດາແງ່ມູມທີ່ແຕກຕ່າງກັນຂອງ ອາຊຽນ. ອາຊຽນ ຫາກໍ່ເລີ່ມປະຕິບັດວິໄສທັດປະຊາຄົມ ອາຊຽນ ປີ 2045 ແລະ 4 ແຜນການຍຸດທະສາດໃຫຍ່, ດັ່ງນັ້ນ ພວກຂ້າພະເຈົ້າພວມມີບັນດາບາດກ້າວເດີນໄວທີ່ສຸດຂອງວິໄສທັດໄລຍະ 20 ປີນີ້. ດ້ວຍການນຳພາຂອງການນຳຊຸດໃໝ່ ແລະ ຄວາມເຂັ້ມແຂງຈາກ ຫວຽດນາມ, ຂ້າພະເຈົ້າຄິດວ່າ ນັ້ນແມ່ນສິ່ງທີ່ສຳຄັນທີ່ສຸດສຳລັບ ອາຊຽນ. ຂ້າພະເຈົ້າເຊື່ອໝັ້ນວ່າ ຫວຽດນາມ ຈະມີບັນດາການປະກອບສ່ວນທີ່ຍິ່ງໃຫຍ່ກວ່າຕາມຫຼາຍແບບວິທີທີ່ແຕກຕ່າງກັນ”.
ເລື່ອງທ່ານນາຍົກລັດຖະມົນຕີ ເລມິງຮຶງ ເຂົ້າຮ່ວມກອງປະຊຸມ ກໍມີຄວາມໝາຍພິເສດ ໃນຂະນະທີ່ນີ້ແມ່ນໜຶ່ງໃນບັນດາການເຄື່ອນໄຫວການທູດຫຼາຍຝ່າຍຄັ້ງທຳອິດຂອງການນຳລັດຖະບານ ຫວຽດນາມ ຊຸດໃໝ່. ສິ່ງດັ່ງກ່າວ ໄດ້ສົ່ງສານອັນຈະແຈ້ງວ່າ ອາຊຽນ ສືບຕໍ່ແມ່ນບຸລິມະສິດຍຸດທະສາດແຖວໜ້າໃນນະໂຍບາຍການຕ່າງປະເທດຂອງ ຫວຽດນາມ. ທ່ານນາງ ໂຕນທິງອກເຮືອງ ເອກອັກຄະລັດຖະທູດ, ຫົວໜ້າຄະນະຜູ້ຕາງໜ້າ ຫວຽດນາມ ປະຈຳ ອາຊຽນ ຢັ້ງຢືນວ່າ:
“ຫວຽດນາມ ສືບຕໍ່ເຂົ້າຮ່ວມການປະກອບສ່ວນຢ່າງຕັ້ງໜ້າພ້ອມກັບບັນດາປະເທດ ອາຊຽນ, ກ່ອນອື່ນໝົດແມ່ນຍົກສູງກຳລັງຄວາມສາມາດຮັບມື ແລະ ປະສານງານລວມຂອງ ອາຊຽນ ຕໍ່ບັນດາການຜັນແປທີ່ສັບສົນຂອງສະພາບການສາກົນ ແລະ ພາກພື້ນ. ຫວຽດນາມ ສືບຕໍ່ສົມທົບກັນປະກອບສ່ວນພ້ອມກັບບັນດາປະເທດສະມາຊິກ ອາຊຽນ ຜັນຂະຫຍາຍບັນດາແຜນການຍຸດທະສາດຢ່າງມີປະສິດທິຜົນ ເພື່ອປະຕິບັດວິໄສທັດປະຊາຄົມ ອາຊຽນ ປີ 2045, ນຳທຸກເປົ້າໝາຍ, ແຜນການລວມຂອງ ອາຊຽນ ກາຍເປັນບັນດາເປົ້າໝາຍ, ແຜນການພັດທະນາຂອງແຕ່ລະປະເທດ, ພ້ອມທັງຂຸດຄົ້ນທ່າໄດ້ປຽບຂອງການຮ່ວມມື ແລະ ການຮ່ວມສຳພັນ ອາຊຽນ ສາມາດທີ່ນຳມາໃຫ້ປະຊາຊົນ ແລະ ວິສາຫະກິດຢູ່ພາຍໃນປະເທດ ໃຫ້ໄດ້ຫຼາຍທີ່ສຸດ”.
ດ້ວຍນະໂຍບາຍການຕ່າງປະເທດເອກະລາດ, ເປັນເຈົ້າຕົນເອງ ແລະ ດຸ່ນດ່ຽງ, ຫວຽດນາມ ໄດ້ຮັບຂໍ້ສັງເກດຄືດັ່ງເປັນປັດໄຈປະກອບສ່ວນຮັກສາຄວາມເຫັນດີເຫັນພ້ອມພາຍໃນກຸ່ມ ກໍຄືປັບປຸງບົດບາດເປັນໃຈກາງຂອງ ອາຊຽນ ໃນໂຄງສ້າງພາກພື້ນ. ການເຂົ້າຮ່ວມກອງປະຊຸມຂອງທ່ານນາຍົກລັດຖະມົນຕີ ເລມິງຮຶງ ຢັ້ງຢືນວ່າ ຫວຽດນາມ ບໍ່ພຽງແຕ່ແມ່ນສະມາຊິກທີ່ຕັ້ງໜ້າເທົ່ານັ້ນ, ຫາກຍັງພວມກາຍເປັນໜຶ່ງໃນບັນດາປະເທດທີ່ມີຄວາມສາມາດປະກອບສ່ວນກຳນົດທິດໃຫ້ແກ່ອະນາຄົດຂອງພາກພື້ນອີກດ້ວຍ./.
