ບ້ານບຸງ, ຕາແສງຟອງກວາງ, ແຂວງທາຍງວຽນ ມີກ່ວາ 40 ຄອບຄົວຊາວເຜົ່າຢ້າວ. ກ່ອນນັ້ນ, ຊີວິດຂອງ ປຊຊ ປະສົບກັບຄວາມຫຍຸ້ງຍາກຫຼາຍຢ່າງ. ນັບແຕ່ທ້າຍເດືອນພຶດສະພາ ປີ 2025, ສາຂາສະຫະພັນແມ່ຍິງທ້ອງຖິ່ນ ໄດ້ຜັນຂະຫຍາຍຮູບແບບ “ເຂດບ້ານນາປອດໄພ” ລະດົມການເຂົ້າຮ່ວມຂອງປະຊາຄົມໃນການສ້າງສະພາບແວດລ້ອມແຫ່ງການດຳລົງຊີວິດທີ່ປອດໄພ. ປຊຊ ໄດ້ພ້ອມກັນອະນາໄມທຳຄວາມສະອາດ, ປູກຕົ້ນໄມ້ສີຂຽວ, ສ້າງສິ່ງແວດລ້ອມສະອາດ, ສວຍງາມ. ພ້ອມກັນນັ້ນ ກໍ່ໄດ້ຮັກສາບັນດາເສັ້ນທາງທີ່ຄຸ້ມຄອງເອງ, ຕິດຕັ້ງລະບົບໄຟເຍືອງທາງຢູ່ເຂດຊຸມຊົນ, ປະກອບສ່ວນຮັບປະກັນຄວາມເປັນລະບຽບຮຽບຮ້ອຍ, ຄວາມໝັ້ນຄົງ.
ປ້າ ດັ້ງທິເຕືອຍ, ເລຂາໜ່ວຍພັກບ້ານບຸງ ໃຫ້ຮູ້ວ່າ:
ພວກຂ້າພະເຈົ້າໄດ້ຖາງມ້ຽນຫຍ້າຢູ່ອ້ອມແອ້ມເຮືອນວັດທະນະທຳ, ກວາດອະນາໄມເສັ້ນທາງເຂົ້າບ້ານໃຫ້ສະອາດເປັນປະຈຳ. ໄປຄຽງຄູ່ກັນນັ້ນ ພວກຂ້າພະເຈົ້າຍັງໂຄສະນາເພື່ອໃຫ້ບັນດາຄອບຄົວດຳລົງຊີວິດດ້ວຍຄວາມຮັກແພງກັນ, ສາມັກຄີກັນ, ຫຼີກລ້ຽງການໃຊ້ຄວາມຮຸນແຮງໃນຄອບຄົວ.
ໃນສະພາບການຫັນເປັນດີຈີຕອນ, ບັນດາສະມາຊິກໃນຄະນະບໍລິຫານຮູບແບບ ກໍ່ຖືວຽກງານໂຄສະນານຳໃຊ້ສື່ສັງຄົມອອນລາຍຢ່າງປອດໄພເປັນສຳຄັນ. ນ້ອງ ຫຼີທູເຮືື່ອງ, ບ້ານບຸງ, ຕາແສງຟອງກວາງ, ແຂວງທາຍງວຽນ ແບ່ງປັນວ່າ:
ພໍ່ແມ່ໄດ້ສອນຫຼານວ່າ ຕ້ອງຄັດເລືອກ, ຊອກຮູ້ໂດຍລະອຽດກ່ຽວກັບການຮ່ຳຮຽນໃນເຄືອຄ່າຍອິນເຕີເນັດ. ຫຼານກໍ່ຈຳກັດການເຂົ້າເບິ່ງໃນສື່ສັງຄົມອອນລາຍ, ບໍ່ເຂົ້າເບິ່ງບັນດາຂໍ້ມູນຂ່າວບໍ່ດີ.
ບັນດາຮູບແບບ “ເຂດບ້ານນາປອດໄພ”, “ເຂດຊຸມຊົນປອດໄພ” ກໍ່ໄດ້ສ້າງຂຶ້ນຢູ່ຫຼາຍບ້ານໃນແຂວງທາຍງວຽນ. ເອື້ອຍ ຮວ່າງທິທຸ້ຍ, ຫົວໜ້າຄະນະບໍລິຫານ ຮູບແບບ “ເຂດບ້ານນາປອດໄພ” ຢູ່ບ້ານບານໂຝ, ຕາແສງເຕິນກີ່ ຕີລາຄາວ່າ:
ພາຍນຫຼັງຮູບແບບ “ເຂດບ້ານນາປອດໄພ” ໄດ້ຜັນຂະຫຍາຍຢູ່ບ້ານ, ຂ້າພະເຈົ້າເຫັນວ່າ ມີການຫັນປ່ຽນຢ່າງຈະແຈ້ງ, ຕັ້ງໜ້າ. ແມ່ຍິງໄດ້ຍົກສູງຄວາມຮັບຮູ້ກ່ຽວກັບດ້ານກົດໝາຍ, ສິດສະເໝີພາບ ແລະ ບັນດາທັກສາປົກປ້ອງຕົວເອງ. ເດັກນ້ອຍໄດ້ປົກປ້ອງອອກຈາກໄພຖືກລ່ວງລະເມີດ, ການໃຊ້ຄວາມຮຸນແຮງ. ສະພາບແວດລ້ອມດຳລົງຊີວິດປອດໄພ, ໂປ່ງໃສ, ບັນດາໄພສັງຄົມໄດ້ຫລຸດລົງຫຼາຍພໍສົມຄວນ.
ບັນດາການເຄື່ອນໄຫວໂຄສະນາ, ຖະແຫຼງຂ່າວ, ຝຶກອົບຮົມໃຫ້ແກ່ແມ່ຍິງ ໄດ້ຈັດຂຶ້ນຢ່າງເປັນປະຈຳດ້ວຍບັນດາຮູບການທີ່ມີຫຼາຍຮູບຫຼາຍແບບ. ເນື້ອໃນໄດ້ສຸມໃສ່ບັນດາຄວາມຮູ້ດ້ານກົດໝາຍ, ທັກສະການປົກປ້ອງຕົວເອງ, ສົ່ງເສີມສຸຂະພາບຈະເລີນພັນ, ການລ້ຽງສອນລູກ, ຄວາມສະເໝີພາບລະຫວ່າງຍິງ-ຊາຍ… ທ່ານນາງ ຫງວຽນທິລວານ, ຫົວໜ້າຄະນະຄຸ້ມຄອງ ຮູບແບບ “ເຂດຊຸມຊົນປອດໄພ” ໜ່ວຍ 3, ຕາແສງດຶກຊວັນ ໃຫ້ຮູ້ວ່າ:
ເຂດຊຸມຊົນໄດ້ສ້າງຕັ້ງຄະນະບໍລິຫານ, ໂຄສະນາ, ຝຶກອົບຮົມໃຫ້ ປຊຊ ທຸກຄົນໃນໜ່ວຍບ້ານ ແລະ ປຊຊ ກໍ່ເຫັນໄດ້ຜົນຜະໂຫຍດຂອງເຂດຊຸມຊົນທີ່ປອດໄພສຳລັບແມ່ຍິງ ແລະ ເດັກນ້ອຍ ກໍ່ຄື ປຊຊ ທຸກຄົນ. ເດັກນ້ອຍກໍ່ໄດ້ຮັບຄວາມເອົາໃຈໃສ່, ຜູ້ໃດກໍ່ໄດ້ໄປໂຮງຮຽນ.
ຮູບແບບ “ເຂດບ້ານນາປອດໄພ”, “ເຂດຊຸມຊົນປອດໄພ” ຢູ່ແຂວງທາຍງວຽນ ພວມຄ່ອຍໆໃຫ້ເຫັນປະສິດທິຜົນ. ປຊຊ ເປັນເຈົ້າການກວ່າໃນການສະກັດກັ້ນການໃຊ້ຄວາມຮຸນແຮງໃນຄອບຄົວ. ແມ່ຍິງກໍ່ມີຄວາມກ້າຫານ, ມີຄວາມໝັ້ນໃຈຕົນເອງກວ່າ ເມື່ອເຂົ້າຮ່ວມບັນດາການເຄື່ອນໄຫວລວມ. ຈາກນັ້ນ, ກໍ່ໄດ້ເພີ່ມຄວາມສະໜິດຕິດພັນລະຫວ່າງບັນດາຄອບຄົວ, ການດຳເນີນຊີວິດວົງຄະນາຍາດໄດ້ມີແບບມີແຜນ, ປະກອບສ່ວນອັນຕັ້ງໜ້າໃຫ້ແກ່ການສ້າງຊີວິດວັດທະນະທຳຢູ່ເຂດຊຸມຊົນ./.
