ກອງປະຊຸມວິສາມັນຄັ້ງປະຖົມມະເລິກ, ສະພາແຫ່ງຊາດ ຫວຽດນາມ ຊຸດທີ 16 ໄດ້ໄຂຂຶ້ນໃນວັນທີ 03 ສິງຫາ, ຢູ່ ຮ່າໂນ້ຍ. ວາລະໄຂກອງປະຊຸມໄດ້ຖ່າຍທອດສົດທາງໂທລະພາບ, ວິທະຍຸກະຈາຍສຽງເພື່ອໃຫ້ປະຊາຊົນ, ຜູ້ມີສິດເລືອກຕັ້ງທົ່ວປະເທດຕິດຕາມ.
ທີ່ກອງປະຊຸມຄັ້ງນີ້, ສະພາແຫ່ງຊາດຈະພິຈາລະນາ, ຕົກລົງ 33 ເນື້ອໃນ: ໃນນັ້ນ, ພິຈາລະນາຮັບຮອງເອົາຮ່າງກົດໝາຍ 15 ສະບັບ, ຮ່າງມະຕິຂໍ້ກຳນົດດ້ານກົດໝາຍ 4 ສະບັບ; ປະກອບຄຳເຫັນຄັ້ງທຳອິດໃສ່ຮ່າງກົດໝາຍ 7 ສະບັບ; ພິຈາລະນາ, ຕົກລົງ 7 ເນື້ອໃນກ່ຽວກັບບັນດາບັນຫາສຳຄັນຂອງປະເທດຊາດ. ທ່ານ ເຈິ່ນແທັງເໝີ້ນ, ປະທານສະພາແຫ່ງຊາດ ຫວຽດນາມ ເນັ້ນໜັກວ່າ:
“ຂ້າພະເຈົ້າສະເໜີໃຫ້ບັນດາສະມາຊິກສະພາແຫ່ງຊາດຄົ້ນຄວ້າເອກະສານຢ່າງລະອຽດ, ຕັ້ງໜ້າປຶກສາຫາລື, ໂຕ້ວາທີ, ປະກອບຫຼາຍຄຳເຫັນທີ່ມີຄຸນນະພາບ, ໂດຍສະເພາະແມ່ນບັນດາບັນຫາທີ່ຍັງມີຄວາມເຫັນແຕກຕ່າງກັນ, ບັນດາເນື້ອໃນສົ່ງຜົນສະທ້ອນໂດຍກົງເຖິງປະຊາຊົນ, ວິສາຫະກິດ. ບັນດາອົງການຂອງສະພາແຫ່ງຊາດ, ສະມາຊິກສະພາແຫ່ງຊາດແຕ່ລະຄົນ ສືບຕໍ່ປ່ຽນແປງໃໝ່ຈິນຕະນາການຢ່າງແຮງໃນການສ້າງກົດໝາຍ, ນະໂຍບາຍກົດໝາຍທີ່ປະກາດໃຊ້ໃຫ້ຕິດແທດກັບສະພາບການຕົວຈິງ. ຮ່າງກົດໝາຍ, ມະຕິແຕ່ລະສະບັບຕ້ອງໄດ້ກະກຽມຢ່າງເຂັ້ມງວດ, ລະອຽດລະອໍນັບແຕ່ຂອດຮຽບຮຽງ, ຕີລາຄາ ແລະ ບັນດາເປົ້າໝາຍທີ່ຖືກຜົນສະທ້ອນ”.
ກອງປະຊຸມໄດ້ຈັດຂຶ້ນຕາມຮູບແບບໂຮມປະຊຸມຢູ່ຫໍສະພາແຫ່ງຊາດ, ນະຄອນຫຼວງ ຮ່າໂນ້ຍ ແລະ ແບ່ງເປັນ 2 ຄັ້ງ (ຄັ້ງທີ 1: ແຕ່ວັນທີ 03 ສິງຫາ ຮອດຕອນເຊົ້າວັນທີ 13 ສິງຫາ. ຄັ້ງທີ 2: ແຕ່ວັນທີ 19 – 24 ສິງຫາ).
