ພາຍຫຼັງ 51 ປີນັບແຕ່ວັນປົດປ່ອຍ (30/4/1975-30/4/2026), ນະຄອນໂຮ່ຈີມິນ ໄດ້ຢັ້ງຢືນບົດບາດ “ນຳໜ້າ, ກ້າວໄປກ່ອນເພື່ອເປີດເສັ້ນທາງ” ໃນການພັດທະນາລວມໃນທົ່ວປະເທດ. ຈາກຕົວເມືອງທີ່ຖືກຜົນເສຍຫາຍຢ່າງໜັກໜ່ວງພາຍຫຼັງສົງຄາມ, ນະຄອນໄດ້ກາຍເປັນສູນເສດຖະກິດ, ການເງິນ, ວັດທະນະທຳ ແລະ ວິທະຍາສາດ - ເຕັກໂນໂລຢີແຖວໜ້າ ຫວຽດນາມ. ໃນສະພາບການໃໝ່, ດ້ວຍບັນດາຜົນສຳເລັດທີ່ບັນລຸໄດ້, ທາງນະຄອນຈະສືບຕໍ່ຢັ້ງຢືນບົດບາດນຳໜ້າ, ປ່ຽນແປງໃໝ່ຢ່າງແຮງເພື່ອນຳພາການພັດທະນາໃນສັງກາດໃໝ່ຂອງປະເທດຊາດ.
ໃນຕະຫຼອດໄລຍະພັດທະນາ, ນະຄອນໂຮ່ຈີມິນ ຍາມໃດກໍ່ຮັກສາບົດບາດນຳໜ້າເສດຖະກິດ. ປັດຈຸບັນ, ນະຄອນໂຮ່ຈີມິນ ປະກອບສ່ວນປະມານ 23% GDP ແລະ ເກືອບ 30% ຍອດລາຍຮັບງົບປະມານແຫ່ງຊາດ, ພ້ອມທັງແມ່ນສູນການເງິນ, ວິທະຍາສາດ - ເຕັກໂນໂລຢີ, ສະຖານທີ່ພົບປະແລກປ່ຽນ ແລະ ເຊື່ອມໂຍງເຂົ້າກັບສາກົນ, ຮັກສາບົດບາດເປັນຂົ້ວເຕີບໂຕທີ່ມີກຳລັງແຜ່ກະຈາຍຢ່າງແຮງ.
ເຖິງຢ່າງໃດກໍຕາມ, ວິວັດການ 51 ປີແຫ່ງການພັດທະນາກໍ່ໄດ້ວາງອອກສິ່ງທ້າທາຍບໍ່ແມ່ນໜ້ອຍ, ຮຽກຮ້ອງໃຫ້ທາງນະຄອນຕ້ອງສືບຕໍ່ມີການປ່ຽນແປງຈິນຕະນາການໃນການບໍລິຫານ, ພັດທະນາແບບຍືນຍົງ. ໃນສະພາບການນັ້ນ, ເພື່ອສືບຕໍ່ຢັ້ງຢືນບົດບາດ “ກ້າວໄປກ່ອນເພື່ອເປີດເສັ້ນທາງ”, ທາງນະຄອນໂຮ່ຈີມິນ ພວມຜັນຂະຫຍາຍບັນດາກົນໄກ, ນະໂຍບາຍພິເສດເພື່ອແນໃສ່ສ້າງກຳລັງໜູນເຕີບໂຕໃໝ່. ທ່ານ ຫງວຽນວັນເດືອກ ປະທານຄະນະກຳມະການປະຊາຊົນ ນະຄອນໂຮ່ຈີມິນ ເນັ້ນໜັກວ່າ:
“ການພັດທະນາແບບຍືນຍົງ ຈະບັນລຸໄດ້ກໍ່ຕໍ່ເມື່ອພື້ນທີ່ເສດຖະກິດໄດ້ຮັບການຈັດຕັ້ງຢ່າງສົມເຫດສົມຜົນ ແລະ ລະບົບມູນຄ່າໄດ້ຮັບການຈັດແບ່ງຢ່າງມີປະສິດທິຜົນ, ບົດບາດຂອງແຕ່ລະທ້ອງຖິ່ນ ໄດ້ກຳນົດຢ່າງຈະແຈ້ງໃນສະພາບການສັງລວມ. ໃນໂຄງປະກອບນັ້ນ, ນະຄອນໂຮ່ຈີມິນ ຄວນ ແລະ ຈະສວມບົດບາດແມ່ນຫົວໜ້ານັກສະຖາປະນິກໃຫຍ່, ແມ່ນສູນປະສານງານ ແລະ ນຳໜ້າການເຊື່ອມຕໍ່ເຂດ, ສະຖານທີ່ເຕົ້າໂຮມການເງິນ, ເຕັກໂນໂລຢີ ແລະ ການບໍລິການລະດັບສູງ, ເປັນສະຖານທີ່ບັນດາການເຄື່ອນໄຫວຜະລິດ, logistic ແລະ ກະສິກຳໝູນໃຊ້ເຕັກໂນໂລຢີສູງໄດ້ເຊື່ອມຕໍ່ ແລະ ແຜ່ກະຈາຍ, ຈັດແບ່ງຢ່າງກົມກຽວ ແລະ ພ້ອມກັນພັດທະນາ”.
ເພື່ອຫັນເປັນເປັນລະອຽກ, ທາງນະຄອນໄດ້ປະກາດໃຊ້ແຜນການສ້າງຮ່າງກົດໝາຍວ່າດ້ວຍຕົວເມືອງພິເສດ (ຄາດວ່າຈະຍື່ນສະເໜີຕໍ່ສະພາແຫ່ງຊາດໃນປີນີ້), ເພື່ອແນໃສ່ສ້າງຂອບນິຕິກຳທີ່ດີກວ່າ, ແກ້ໄຂຈຸດອຸດຕັນກ່ຽວກັບລະບອບລະບຽບການ, ທີ່ດິນ, ການວາງແຜນກຳນົດ ແລະ ການລົງທຶນເພື່ອພັດທະນາກາຍເປັນມະຫາຕົວເມືອງ. ກົດໝາຍມຸ່ງໄປເຖິງຮູບແບບຄຸ້ມຄອງບໍລິຫານທີ່ທັນສະໄໝ, ມີໄຫວພິບ, ຊ່ວຍໃຫ້ນະຄອນເປັນເຈົ້າການກວ່າໃນການພັດທະນາເສດຖະກິດ ແລະ ຄຸ້ມຄອງຕົວເມືອງ. ທ່ານ ຮສ.ປອ ໂດຝູເຈິ່ນຕິງ, ສັງກັດມະຫາວິທະຍາໄລເສດຖະກິດ - ກົດໝາຍ, ມະຫາວິທະຍາໄລແຫ່ງຊາດນະຄອນ ໂຮ່ຈີມິນ ຖືວ່າ:
“ກົດໝາຍວ່າດ້ວຍຕົວເມືອງພິເສດ ສຸມໃສ່ 3 ບັນຫາແມ່ນມອບສິດເປັນເຈົ້າຕົນເອງຢ່າງແທ້ຈິງ, ກົນໄກ sandbox ແລະ ກອບນິຕິກຳທີ່ມີລັກສະນະແກ້ງແຍ້ງສາກົນເພື່ອສ້າງເງື່ອນໄຂພັດທະນາສູນການເງິນ. ສາມເສົາຄ້ຳນີ້ຈະເປີດສະຖານທີ່ພັດທະນາໃໝ່, ແກ້ໄຂບັນດາຈຸດອຸດຕັນ ແລະ ສຳຄັນທີ່ສຸດແມ່ນດຶງດູດນັກລົງທຶນຍຸດທະສາດ, ມີວິໄສທັດຍາວໄກມາຍັງ ນະຄອນໂຮ່ຈີມິນ”.
ດ້ວຍຫຼັກການມອບສິດເປັນເຈົ້າຕົນເອງຢ່າງຮອບດ້ານໃຫ້ແກ່ອຳນາດການປົກຄອງນະຄອນ, ກົດໝາຍວ່າດ້ວຍຕົວເມືອງພິເສດໄດ້ຮັບຖືວ່າແມ່ນການລົງທຶນລະບອບລະບຽບການໃຫ້ແກ່ການເຕີບໂຕແຫ່ງຊາດ. ທ່ານ ຫງວຽນວັນເດືອກ ປະທານຄະນະກຳມະການປະຊາຊົນ ໂຮ່ຈີມິນ ຢັ້ງຢືນວ່າ:
“ທາງນະຄອນໄດ້ມອບ ແລະ ເປັນເຈົ້າການໃນການປະຕິບັດບັນດາກົນໄກຢ່າງມີໄຫວພິບກວ່າ, ສອດຄ່ອງກັບບົດບາດ, ຂອບຂະໜາດ ແລະ ການປະກອບສ່ວນຂອງນະຄອນ. ຈາກການທົດລອງຕະຫຼອດຮອດຮູບແບບຄຸ້ມຄອງໃໝ່, ຫຼຸດຜ່ອນຂັ້ນຕອນປະຕິບັດລະບຽບການບໍລິຫານ ຕະຫຼອດຮອດການເປີດກວ້າງຂົງເຂດນະໂຍບາຍໃຫ້ແກ່ນະວັດຕະກຳ ແລະ ເສດຖະກິດເອກະຊົນພັດທະນາ. ການປະຕິຮູບລະບອບລະບຽບການ ບໍ່ພຽງແຕ່ຊ່ວຍໃຫ້ນະຄອນມີການເຄື່ອນໄຫວຢ່າງມີປະສິດທິຜົນກວ່າເທົ່ານັ້ນ ຫາກຍັງສ້າງບັນດາຮູບແບບຕົວຈິງທີ່ອາດສາມາດທະວີຄູນໃນທົ່ວປະເທດອີກດ້ວຍ”.
ເພື່ອຮັບໃຊ້ໃຫ້ແກ່ການເຕີບໂຕແບບຍືນຍົງ, ທາງນະຄອນກໍ່ພວມຍູ້ແຮງຄວາມຄືບໜ້າບັນດາໂຄງການຄົມມະນາຄົມຈຸດສຸມຄື: ລະບົບ metro, ເສັ້ນທາງອ້ອມຮອບຕົວເມືອງ ແລະ ບັນດາເສັ້ນທາງຄວາມໄວສູງລະຫວ່າງເຂດ, ເພີ່ມທະວີການເຊື່ອມຕໍ່ເຂດ. ເປົ້າໝາຍສູ້ຊົນຮອດປີ 2030, ທາງນະຄອນຈະມີລະບົບ Metro ຢ່າງໜ້ອຍສຸດ 187 ກມ, ຮອດປີ 2045 ຂອບຂະໜາດບັນລຸປະມານ 700 – 1000 ກມ. ທ່ານ ຫງວຽນກວັກຫ໋ຽນ, ຮອງຫົວໜ້າຄະນະຄຸ້ມຄອງເສັ້ນທາງລົດໄຟຕົວເມືອງ ນະຄອນ ໂຮ່ຈີມິນ ຢັ້ງຢືນວ່າ:
“Metroແມ່ນເສັ້ນເລືອດໃຫຍ່, ແມ່ນເສົາຄ້ຳສຳຄັນຂອງຕົວເມືອງ ດັ່ງນັ້ນ ພື້ນຖານໂຄງລ່າງນີ້ຕ້ອງກະກຽມໃຫ້ເປັນຢ່າງດີທີ່ສຸດ. Metro ສ້າງປະຖົມປັດໄຈ, ກຳລັງໜູນພັດທະນາຂອງນະຄອນ ດັ່ງນັ້ນຕ້ອງເຊື່ອມຕໍ່ບັນດາ hub ໃຫຍ່, ເຄືອຂ່າຍຄົມມະນາຄົມແຫ່ງຊາດ, ເສັ້ນທາງລົດໄຟແຫ່ງຊາດ, ທ່າກຳປັ່ນ, ເສັ້ນທາງລົດໄຟ ແລະ ບັນດາຕົວເມືອງໃຫຍ່”.
ບໍ່ພຽງແຕ່ຢຸດຢູ່ພື້ນຖານໂຄງລ່າງດ້ານວັດຖຸ, ພື້ນຖານໂຄງລ່າງດ້ານດີຈີຕອນກໍ່ພວມໄດ້ຮັບຄວາມເອົາໃຈໃສ່ລົງທຶນ, ສ້າງເງື່ອນໄຂໃຫ້ແກ່ເສດຖະກິດດີຈີຕອນ ແລະ ສັງຄົມດີຈີຕອນພັດທະນາຢ່າງແຮງ. ນີ້ແມ່ນບາດກ້າວຍຸດທະສາດເພື່ອຍົກສູງຄວາມສາມາດແກ້ງແຍ້ງໃນຍຸກສະໄໝເຕັກໂນໂລຢີ.
ໄລຍະຜ່ານມາ, ກົມການເມືອງໄດ້ປະກາດໃຊ້ຫຼາຍມະຕິທີ່ມີຄຸນຄ່າກຳນົດທິດຍຸດທະສາດ, ສ້າງຄວາມສະດວກເພື່ອໃຫ້ ນະຄອນໂຮ່ຈີມິນ ຂຸດຄົ້ນໄດ້ບັນດາກຳລັງໜູນເຕີບໂຕ. ດ້ວຍມູນເຊື້ອຂະຫຍັນຂັນເຄື່ອນ, ປະດິດຄິດສ້າງ ແລະ ຈິດໃຈນຳໜ້າພ້ອມກັບການກຳນົດທິດຍຸດທະສາດຈາກສູນກາງ, ນະຄອນໂຮ່ຈີມິນ ຈະສືບຕໍ່ຮັກສາທີ່ຕັ້ງນຳພາ, ຮ່ວມເດີນທາງພ້ອມກັບທົ່ວປະເທດບົນເສັ້ນທາງພັດທະນາແບບຍືນຍົງ ແລະ ເຊື່ອມໂຍງເຂົ້າກັບສາກົນ.
