ວັນບຸນວິສາຂະບູຊາ ພສ.2570 (ປີ 2026) ບໍ່ພຽງແຕ່ແມ່ນໂອກາດລະນຶກເຖິງວັນປະສູດຂອງພະພຸດທະເຈົ້າເທົ່ານັ້ນ, ຫາກຍັງຝາກຝັງສານຂໍ້ຄວາມທີ່ໃຫຍ່ຫຼວງກ່ຽວກັບນ້ຳໃຈເມດຕາປານີ, ພູມປັນຍາ, ຄວາມສາມັກຄີຊົນຊາດ ແລະ ຄວາມຮັບຜິດຊອບສັງຄົມ.
ສັບປະດາວິສາຂະບູຊາປີ 2026 ຈັດຂຶ້ນແຕ່ວັນທີ 24 – 31 ພຶດສະພາ. ສານຂໍ້ຄວາມທີ່ພົ້ນເດັ່ນແມ່ນປຸກລຸກນ້ຳໃຈການດຳລົງຊີວິດຢ່າງສຸດຈະຫຼິດ, ມຸ່ງໄປເຖິງຄວາມຕື່ນຕົວ, ຄວາມຮັກ ແລະ ມີຄວາມຮັບຜິດຊອບຕໍ່ປະຊາຄົມ.
ທີ່ວັນບຸນວິສາຂະບູຊາ ໂດຍຄະນະບໍລິຫານງານສະມາຄົມພຸດທະສາສະໜາ ຫວຽດນາມ ນະຄອນ ໂຮ່ຈິມິນ ຈັດຂຶ້ນແຕ່ວັນທີ 24 ພຶດສະພາ, ຢູ່ ຫວຽດນາມ ກວັກຕຶ (ສຳນັກງານຄະນະບໍລິຫານງານສະມາຄົມພຸດທະສາສະໜາ ນະຄອນ ໂຮ່ຈິມິນ), ມີຫຼາຍສານຂໍ້ຄວາມກ່ຽວກັບກຸ່ມກ້ອນມະຫາສາມັກຄີແຫ່ງຊາດ ແລະ ການຮ່ວມເດີນທາງລະຫວ່າງຫຼັກຄຳສອນກັບຊີວິດສັງຄົມທີ່ໄດ້ເນັ້ນໜັກເຖິງ. ທ່ານ ຫງວຽນແມ້ງເກື່ອງ, ຮອງປະທານຄະນະກຳມະການປະຊາຊົນນະຄອນ ໂຮ່ຈີມິນ, ໃຫ້ຮູ້ວ່າ:
“ຍາມໃດພວກຂ້າພະເຈົ້າກໍ່ກຳນົດວ່າ ການສ້າງ ແລະ ເສີມຂະຫຍາຍກຸ່ມກ້ອນມະຫາສາມັກຄີທົ່ວປວງຊົນທັງຊາດ, ໃນນັ້ນຄວາມສະໜິດຕິດພັນ, ສະໜິດແໜ້ນກັບບັນດາອົງການສາສະໜາ ເວົ້າລວມ ແລະ ພຸດທະສາສະໜາ ຫວຽດນາມ ເວົ້າສະເພາະ ແມ່ນປັດໄຈສຳຄັນເພື່ອປົກປັກຮັກສາ, ມີຄວາມສະຖຽນລະພາບ, ການພັດທະນາແບບຍືນຍົງ ແລະ ຍົກສູງຄຸນນະພາບການດຳລົງຊີວິດທາງດ້ານວັດຖຸ, ຈິດໃຈຂອງປະຊາຊົນ. ທາງນະຄອນຈະສືບຕໍ່ຮ່ວມເດີນທາງ, ສ້າງເງື່ອນໄຂສະດວກໃຫ້ແກ່ການເຄື່ອນໄຫວດ້ານສາສະໜາ, ສ້າງສະພາບແວດລ້ອມແຫ່ງການເຫຼື້ອມໃສເຊື່ອຖືໃຫ້ມີຄວາມສີວິໄລ, ປອດໃສ, ປະກອບສ່ວນປັບປຸງຄວາມໄວ້ເນື້ອເຊື່ອໃຈ ແລະ ເສີມຂະຫຍາຍຈິດໃຈ “ຢູ່ໃນສິນ, ກິນໃນທຳ”.
ຢູ່ນະຄອນ ເຫ້ວ, ມີພະສົງສຳມະເນນ, ພຸດທະສາສະນິກະຊົນ ແລະ ປະຊາຊົນນັບພັນຄົນໄດ້ເຂົ້າຮ່ວມພິທີແຫ່ພະພຸດທະຮູບ, ພິທີໄຕ້ໄຟດອກບົວ 7 ດອກຢູ່ແມ່ນ້ຳ ເຮືອງ, ພາວະນາໃຫ້ປະເທດຊາດມີຄວາມສະຫງົບສຸກ, ປະຊາຊົນຢູ່ເຢັນເປັນສຸກ ແລະ ໂລກມີສັນຕິພາບ. ພະມະຫາອາຈານ ທິກເຂເຈີນ, ຫົວໜ້າຄະນະບໍລິຫານງານສະມາຄົມພຸດທະສາສະໜາ ຫວຽດນາມ ນະຄອນ ເຫວ້, ໃຫ້ຮູ້ວ່າ:
“ພິທີແຫ່ພະພຸດທະຮູບແມ່ນພິທີທີ່ເປັນມູນເຊື້ອມີມາແຕ່ປີ 1936. ນັບແຕ່ນັ້ນມາຮອດປະຈຸບັນ, ດ້ວຍຈິດໃຈສືບຕໍ່ມູນເຊື້ອອັນດີງາມນັ້ນ, ແຕ່ລະປີ, ພະສົງສຳມະເນນ, ພຸດທະສາສະນິກະຊົນ ຢູ່ ເຫວ້ ລ້ວນແຕ່ກັບມາຈັດພິທີ ມົກຢຸກ (ເຊິ່ງແມ່ນພິທີສົງພະ) ແລະ ພິທີຕ້ອນຮັບ ກິມເທິນດຶກເຟີດ (ພະພຸດທະຮູບທອງຄຳ) ຈາກວັດ ຢ້ຽວເດ ມາຮອດເວທີທຳພິທີກຳຕື່ດ່າມ, ເພື່ອພາວະພາຂໍໃຫ້ປະເທດຊາດມີຄວາມສະຫງົບ, ປະຊາຊົນຢູ່ເຢັນເປັນສຸກ, ໂລກມີສັນຕິພາບ, ຫຼັກຄຳສອນຂອງພະພຸດທະເຈົ້າຍືນຍົງຄົງຕົວ ແລະ ສິ່ງມີຊີວິດທັງມວນຈົ່ງມີຄວາມສັນຕິສຸກ”.
ໂດຍເຂົ້າຮ່ວມບັນດາການເຄື່ອນໄຫວຂອງງານບຸນວິສາຂະບູຊາ, ທ່ານນາງ ເລທິມີ້ເຍີນ, ພຸດທະສາສະນິກກະຊົນນະຄອນ ເຫວ້, ແບ່ງປັນວ່າ:
“ພຸດທະສາສະນິກກະຊົນທັງຫຼາຍມີຄວາມປິຕິຊົມຊື່ນທີ່ໄດ້ຕ້ອນຮັບວັນປະສູດຂອງພະພຸດທະເຈົ້າ. ທຸກຄົນພ້ອມກັນປະດັບປະດາເວທີບູຊາ, ສູດມົນພາວະນາຂໍ້ຄວາມສະຫງົບສຸກ. ພຸດທະສາສະນິກກະຊົນເດີນຕາມຄວາມປະສົງຫວັງຂອງພະພຸດທະເຈົ້າ, ດຳລົງຊີວິດດ້ວຍຄວາມເມດຕາປານີ, ເຮັດແຕ່ສິ່ງດີ, ຫຼີກລ້ຽງການກະທຳຊົ່ວຮ້າຍ”.
ຢູ່ນະຄອນ ດ່ານັ້ງ, ນອກຈາກພິທີແຫ່ພະພຸດທະເຈົ້າ, ງານບຸນວິສາຂະບູຊາຍັງດຳເນີນໄປຢ່າງຟົດຟື້ນ ດ້ວຍການລອຍກະທົງຢູ່ແມ່ນ້ຳ ຮ່ານ ແລະ ຫຼາຍລາຍການໃຈບຸນໃຈກຸສົນໃຫ້ສຳລັບປະຊາຊົນຜູ້ປະສົບກັບຄວາມຫຍຸ້ງຍາກ. ພະມະຫາອາຈານ ທິກຕື່ງຽມ, ຫົວໜ້າຄະນະບໍລິຫານງານສະມາຄົມພຸດທະສາສະໜາ ຫວຽດນາມ ນະຄອນ ດ່ານັ້ງ, ໃຫ້ຮູ້ວ່າ:
“ພິທີແຫ່ພະພຸດທະຮູບໄດ້ເວົ້າເຖິງຄວາມເຊື່ອໝັ້ນຂອງພຸດທະສາສະນິກກະຊົນ, ຜູ້ເຊື່ອຖືສາສະໜາ ກໍຄືຜົນກະທົບຢ່າງເລິກເຊິ່ງ, ກວ້າງຂວາງຂອງພຸດທະສາສະໜາ, ໂດຍສະເພາະແມ່ນພຸດທະສາສະໜາ ຫວຽດນາມ ພວກເຮົາ. ກວ່າ 2.000 ປີຜ່ານມາ, ສາສະໜາພຸດແມ່ນຢູ່ໃນໃຈຂອງຊາດ. ທຸກການດຳລົງຊີວິດຂອງຊາວ ຫວຽດນາມ ລ້ວນແຕ່ມີຜົນສະທ້ອນຈາກຫຼັກຄຳສອນພຸດທະສາສະໜາ, ເຊິ່ງສົ່ງຜົນສະທ້ອນຢ່າງເລິກເຊິ່ງ, ກວ້າງຂວາງທີ່ສຸດ. ການຈັດພິທີແຫ່ພະພຸດທທະຮູບແມ່ນເພື່ອເຊີດຊູວັນປະສູດຂອງພະພຸດທະເຈົ້າ”.
ຈິດໃຈ “ຫຼັກຄຳສອນຮ່ວມເດີນທາງພ້ອມກັບປະເທດຊາດ” ກໍ່ຈະສືບຕໍ່ໄດ້ແຜ່ກະຈາຍຢ່າງແຮງຢູ່ເຂດ ໄຕງວຽນ ແລະ ເຂດພໍ່ແມ່ປະຊາຊົນຊາວເຜົ່າສ່ວນໜ້ອຍ. ໃນ 9 ວັນ (ແຕ່ວັນທີ 23 – 31 ພຶດສະພາ), ຢູ່ເຂດຈຳນວນໜຶ່ງໃຈກາງ ດ່າລາດ, ຢາເງັ້ຍ ແລະ ຟານທຽດ (ແຂວງ ເລິມດົ່ງ) ກໍ່ໄດ້ຈັດຫຼາຍການເຄື່ອນໄຫວທີ່ເຂັ້ມຂຸດໄປດ້ວຍສີສັນວັດທະນະທຳທາງດ້ານພຸດທະສາສະໜາ…
ງານບຸນວິສາຂະບູຊາ ບໍ່ພຽງແຕ່ແມ່ນວັນບຸນພຸດທະສາສະໜາເທົ່ານັ້ນ, ຫາກຍັງແມ່ນໂອກາດເພື່ອຫຼໍ່ລ້ຽງນ້ຳໃຈມະຫາສາມັກຄີທົ່ວປວງຊົນທັງຊາດ, ຮັກສາສີສັນວັດທະນະທຳ ຫວຽດນາມ ແລະ ປຸກລຸກຄວາມຮັບຜິດຊອບຂອງແຕ່ລະຄົນຕໍ່ກັບຄອບຄົວ, ປະຊາຄົມ ແລະ ປະເທດຊາດອີກດ້ວຍ.
.jpg)
.jpg)
.jpg)
