ດ້ວຍທີ່ຕັ້ງຍຸດທະສາດໂດຍມີຊາຍແດນຕິດກັບບັນດາປະເທດຄື: ຈີນ, ໄທ, ຫວຽດນາມ, ກຳປູເຈຍ ແລະ ມຽນມາ ນັ້ນ, ລາວ ພວມລົງທຶນຢ່າງແຮງເຂົ້າພື້ນຖານໂຄງລ່າງຄົມມະນາຄົມທາງບົກ, ທາງລົດໄຟ, logistics... ເພື່ອແນໃສ່ກາຍເປັນຂົວເຊື່ອມຕໍ່ກັບພາກພື້ນ. ດ້ວຍເລື່ອງລັດຖະບານ ລາວ ແລະ ບໍລິສັດທາງລົດໄຟ ລາວ - ຫວຽດນາມ ຈຳກັດ ລົງນາມທາງການ “ສັນຍາສຳປະທານການອອກແບບ, ກໍ່ສ້າງ, ລະດົມທຶນ, ເຄື່ອນໄຫວ ແລະ ບູລະນະຮັກສາ ໂຄງການທາງລົດໄຟ ລາວ - ຫວຽດນາມ” ແຕ່ຕົວເມືອງ ທ່າແຂກ ແຂວງຄຳມ່ວນ ຫາ ມູຢາ ຊາຍແດນ ລາວ ຫວຽດນາມ (ຂຶ້ນກັບແຂວງ ກວ໋າງບິ່ງ), ແມ່ນຈຸດເລີ່ມຕົ້ນທີ່ສຳຄັນເພື່ອມຸ່ງໄປເຖິງການຫັນການກໍ່ສ້າງເສັ້ນທາງລົດໄຟເຊື່ອມຕໍ່ ລາວ - ຫວຽດນາມ ໃຫ້ປະກົດຜົນເປັນຈິງໂດຍໄວ.
ເສັ້ນທາງລົດໄຟ ລາວ - ຫວຽດນາມເລີ່ມຕົ້ນຈາກ ນະຄອນຫຼວງ ວຽງຈັນ ຮອດສິ້ນສຸດຢູ່ທ່າກຳປັ່ນ ຫວູງອາງ ຂອງ ຫວຽດນາມ, ດ້ວຍຄວາມຍາວ 562 ກີໂລແມັດ. ໃນນັ້ນ, ຕອນແຕ່ຕົວເມືອງ ທ່າແຂກ ຂຶ້ນກັບ ແຂວງຄຳມ່ວນ, ພາກກາງລາວ ໄປຫາ ມູຢ່າ (ຂຶ້ນກັບແຂວງ ກວ໋າງບິ່ງ) ຊາຍແດນ ຫວຽດນາມ - ລາວ ມີຄວາມຍາວ 147 ກີໂລແມັດ. ນີ້ແມ່ນໜຶ່ງໃນບັນດາໂຄງການລະດັບຊາດ ຊ່ວຍໃຫ້ ລາວ ຜັນຂະຫຍາຍມະຕິເລກທີ 04 ຂອງສູນກາງພັກປະຊາຊົນປະຕິວັດລາວ ວ່າດ້ວຍການສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງ ໃຫ້ປະກົດຜົນເປັນຈິງ, ພິເສດແມ່ນເປົ້າໝາຍເຊື່ອມໂຍງ, ເຊື່ອມຈອດ ລາວ ກັບພາກພື້ນ ແລະ ໂລກ, ສ້າງເງື່ອນໄຂສະດວກໃຫ້ແກ່ການຜະລິດ, ການບໍລິການ, ການຄ້າ ແລະ ການລົງທຶນ. ໂຄງການເສັ້ນທາງລົດໄຟຟ້າ ລາວ - ຫວຽດນາມ ຈະຊ່ວຍໃຫ້ ລາວ ຈາກປະເທດບໍ່ມີຊາຍແດນຕິດກັບທະເລ ກາຍເປັນປະເທດເຊື່ອມໂຍງ - ເຊື່ອມຈອດ, ດ້ວຍປະຕູມຸ່ງຫາທະເລແມ່ນທ່າກຳປັ່ນ ຫວູງອາງ (ຫວຽດນາມ). ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ, ຫົວໜ້າຄະນະຊີ້ນຳແຫ່ງຊາດ ໂຄງການກໍ່ສ້າງເສັ້ນທາງລົດໄຟ ລາວ - ຫວຽດນາມ ໃຫ້ຮູ້ວ່າ:
ເສັ້ນທາງລົດໄຟໄດ້ຮັບການລົງທຶນຕາມມາດຕະຖານແມ່ນ 1.435 ແມັດ ຕອບສະໜອງມາດຕະຖານສາກົນ, ຜ່ານນັ້ນ ສ້າງເງື່ອນໄຂເຊື່ອມຈອດໃນພາກພື້ນ. ຄາດວ່າ ລົດໄຟໂດຍສານມີຄວາມໄວສູງສຸດ 150 ກີໂລແມັດ/ຊົ່ວໂມງ, ໃນຂະນະທີ່ລົດໄຟຂົນສົ່ງສິນຄ້າແມ່ນປະມານ 80 ກີໂລແມັດ/ຊົ່ວໂມງ, ຕອບສະໜອງຄວາມຕ້ອງການໃນການຂົນສົ່ງຜູ້ໂດຍສານ ແລະ ສິນຄ້າ. ດ້ວຍຍອດເງິນລົງທຶນປະມານ 6,6 ຕື້ USD, ຄາດວ່າ ໂຄງການຈະເລີ່ມລົງມືກໍ່ສ້າງໃນປີ 2026 ແລະ ນຳເຂົ້າໃຊ້ການໃນປີ 2030. ເສັ້ນທາງລົດໄຟ ວຽງຈັນ - ຫວູງອາງ ໄດ້ຮັບຄວາມຄາດຫວັງຈະປະກອບສ່ວນຫຼຸດຜ່ອນຄ່າຂົນສົ່ງຫຼາຍພໍສົມຄວນ, ຊຸກຍູ້ການແລກປ່ຽນການຄ້າ ແລະ ເພີ່ມທະວີການເຊື່ອມໂຍງຂອງ ລາວ ເຂົ້າຕະຫຼາດໃນພາກພື້ນ ແລະ ທົ່ວໂລກ.
ກ່ອນໜ້ານັ້ນ, ຢູ່ກອງປະຊຸມຄັ້ງປະຖົມມະລຶກ ສະພາແຫ່ງຊາດລາວ ຊຸດທີ X ກໍ່ໄດ້ຮັບຮອງເອົາຫຼັກການລົງທຶນກໍ່ສ້າງເສັ້ນທາງລົດໄຟ ລາວ - ຫວຽດນາມ. ກ່າວຄຳເຫັນທີ່ກອງປະຊຸມຄັ້ງນີ້, ທ່ານ ວີໄລວົງ ບຸດດາຄຳ, ຮອງປະທານສະພາແຫ່ງຊາດລາວ ເນັ້ນໜັກວ່າ:
ໂຄງການເສັ້ນທາງລົດໄຟເຊື່ອມຈອດ ຫວຽດ - ລາວ ຈາກ ຫວູງອາງ - ມູຢາ - ທ່າແຂກ - ວຽງຈັນ ໄດ້ກຳນົດແມ່ນໜຶ່ງໃນບັນດາກິດຈະກຳພື້ນຖານໂຄງລ່າງຫຼັກແຫຼ່ງໃນການຮ່ວມມື ຫວຽດນາມ - ລາວ, ປະກອບສ່ວນສ້າງແລວຂົນສົ່ງທີ່ມີປະສິດທິຜົນ, ເຊື່ອດຈອດ ລາວ ກັບທະເລຕາເວັນອອກ ໂດຍກົງ ຜ່ານລະບົບທ່າກຳປັ່ນທະເລພາກກາງ ຫວຽດນາມ. ນີ້ກໍ່ແມ່ນໝາກຜົນຂອງການພົວພັນຮ່ວມມືຢ່າງເລິກເຊິ່ງ ແມ່ນສັນຍາລັກສະແດງໃຫ້ເຫັນການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ຫວຽດນາມ - ລາວ, ລາວ - ຫວຽດນາມ ທີ່ນັບມື້ນັບສະໜິດຕິດພັນ ແລະ ພັດທະນາເຂົ້າສູ່ລວງເລິກໃນທຸກຂົງເຂດ.
