(ພາບປະກອບ: TTXVN)
ທີ່ກອງປະຊຸມຄັ້ງທີ IV ຂອງຄະນະບໍລິຫານງານສູນກາງພັກກອມມູນິດ ຫວຽດນາມ ຊຸດທີ 14, ບັນຫາປ່ຽນແປງໃໝ່ວຽກງານພະນັກງານ, ດຶງດູດ ແລະ ນຳໃຊ້ຜູ້ມີຄວາມເກັ່ງກ້າສາມາດສືບຕໍ່ໄດ້ວາງອອກຄືດັ່ງຄວາມຮຽກຮ້ອງຕ້ອງການຍຸດທະສາດ. ສູນກາງໄດ້ຮັບຮອງເອົາມະຕິສະບັບໃໝ່ກ່ຽວກັບພະນັກງານ ແລະ ວຽກງານພະນັກງານ; ພ້ອມກັນນັ້ນ, ກໍ່ຮັບຮອງເອົາ "ຍຸດທະສາດແຫ່ງຊາດກ່ຽວກັບການດຶງດູດ, ນຳໃຊ້ ແລະ ພັດທະນາຜູ້ມີຄວາມເກັ່ງກ້າສາມາດໃນບັນດາຂະແໜງການ, ຂົງເຂດປາຍແຫຼມເພື່ອຮັບໃຊ້ການພັດທະນາປະເທດຊາດຢ່າງວ່ອງໄວ ແລະ ຍືນຍົງ."
ສູນກາງໄດ້ກຳນົດວຽກງານບຸກທະລຸແຫຼ່ງຊັບພະຍາກອນມະນຸດບໍ່ພຽງແຕ່ດຶງດູດຜູ້ມີຄວາມເກັ່ງກ້າສາມາດເທົ່ານັ້ນ, ຫາກຍັງສ້າງກົນໄກໃຫ້ຜູ້ມີຄວາມເກັ່ງກ້າສາມາດພັດທະນາກຳລັງສາມາດ, ຖັນແຖວພະນັກງານປະຕິບັດຢ່າງມີປະສິດທິຜົນ ແລະ ທັງລະບົບເຄື່ອນໄຫວໃຫ້ເປັນຢ່າງດີກວ່າ.
ຈິນຕະນາການບຸກທະລຸໃນການນຳໃຊ້ຜູ້ມີຄວາມເກັ່ງກ້າສາມາດ
ກ່ອນອື່ນໝົດ, ການນຳໃຊ້ຜູ້ມີຄວາມເກັ່ງກ້າສາມາດຕ້ອງເລີ່ມມາຈາກບັນດາໜ້າທີ່ພັດທະນາລະອຽດຂອງປະເທດຊາດ. ໃນບົດກ່າວອັດກອງປະຊຸມຄັ້ງທີ IV ຂອງຄະນະລິຫານງານສູນກາງພັກກອມມູນິດ ຫວຽດນາມ ຊຸດທີ 14 ໃນຕອຍບ່າຍວັນທີ 08 ຕຸລາ, ທ່ານ ໂຕເລີມ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ຫວຽດນາມ ໄດ້ເນັ້ນໜັກວ່າ:
"ຕ້ອງອີງໃສ່ຄວາມຮຽກຮ້ອງຕ້ອງການໜ້າທີ່ເພື່ອສ້າງແຫຼ່ງກຳລັງ, ບຳລຸງສ້າງ, ຈັດແບ່ງ, ອີງໃສ່ການຕີລາຄາເພື່ອຄັດເລືອກ, ຮັບປະກັນຄວາມສືບທອດຜ່ານສະໄໝຕ່າງໆ. ຄຸນນະພາບ, ຄຸນນະທາດ, ຄວາມເກັ່ງກ້າຢ່າງແທ້ຈິງ, ອິດທິພົນຊື່ສຽງຕ້ອງໄດ້ສະແດງໃຫ້ເຫັນຜ່ານຜົນງານວຽງານ; ການຕີລາຄາຕ້ອງຄິດໄລ່ເຖິງຄວາມຫຍຸ້ງຍາກຂອງວຽກງານ, ເງື່ອນໄຂປະຕິບັດ ແລະ ຄຸນຄ່າຍາວນານ."
ປະເທດໜຶ່ງຢາກກ້າວເດີນໄວ, ກ້າວໄກແມ່ນບໍ່ອາດອີງໃສ່ຜູ້ມີຄວາມເກັ່ງກ້າສາມາດມາຫາເອງ, ຍິ່ງບໍ່ອາດຖືການດຶງດູດຜູ້ມີຄວາມເກັ່ງກ້າສາມາດແມ່ນໄມ້ຫຼ້າວັດແຖກສຸດທ້າຍຂອງນະໂຍບາຍໄດ້. ສິ່ງທີ່ສຳຄັນກວ່ານັ້ນແມ່ນ, ຕ້ອງສ້າງກົນໄກເພື່ອໃຫ້ຜູ້ມີກຳລັງຄວາມສາມາດໄດ້ເຮັດວຽກງານຖືກຂົງເຂດ, ເສີມຂະຫຍາຍຈຸດແຂງຂອງເຂົາເຈົ້າ ແລະ ສ້າງຄຸນຄ່າ. ພິເສດ, ມະຕິສູນກາງໄດ້ເນັ້ນໜັກເຖິງ ຍຸດທະສາດຜູ້ມີຄວາມເກັ່ງກ້າສາມາດໄດ້ດຳລົງຕຳແໜ່ງຫຼັກແຫຼ່ງ, ແຕ່ຜູ້ມີຄວາມເກັ່ງກ້າສາມາດບໍ່ຈຳເປັນຕ້ອງເຮັດວຽກຢູ່ອົງການຂອງລັດເທົ່ານັ້ນ; ຫາກຍັງສາມາດປະກອບສ່ວນຜ່ານການຄົ້ນຄວ້າວິທະຍາສາດ, ການເຄື່ອນໄຫວຂອງວິສາຫະກິດ, ການຮ່ວມມືດ້ານນັກຊ່ຽວຊານ ຫຼື ບັນດາໂຄງການພັດທະນາລະອຽດ. ທ່ານເລຂາທິການໃຫຍ່, ປະທານປະເທດ ໂຕເລີມ ຢືນຢັນວ່າ:
“ເຊື່ອມຕໍ່ຜູ້ມີຄວາມເກັ່ງກ້າສາມາດຢູ່ພາຍໃນປະເທດ, ຊາວ ຫວຽດນາມ ອາໄສຢູ່ຕ່າງປະເທດ, ນັກຊ່ຽວຊານສາກົນ; ເຊື່ອມຕໍ່ທາງໂຮງຮຽນ, ສະຖາບັນຄົ້ນຄວ້າກັບວິສາຫະກິດ. ຖືການຄົ້ນພົບ, ບຳລຸງສ້າງຜູ້ມີຄວາມເກັ່ງກ້າສາມາດຢູ່ພາຍໃນປະເທດ ເປັນພື້ນຖານຍາວນານ. ອົງການນຳໃຊ້ຕ້ອງມອບວຽກງານໃຫ້ສອດຄ່ອງ, ສ້າງເງື່ອນໄຂເປັນເຈົ້າເຕັກໂນໂລຊີ, ສ້າງຖັນແຖວ, ຖ່າຍທອດພູມປັນຍາ; ຮັບຮູ້ ເກື້ອກຸນຢ່າງຍຸດຕິທຳ ລະຫວ່າງຜູ້ໄດ້ດຶງດູດ ແລະ ຜູ້ພວມອຸທິດສ່ວນ.”
ການເຊື່ອມຕໍ່ຖັນແຖວນັກປັນຍາຊົນຢູ່ພາຍໃນປະເທດ ກັບນັກຊ່ຽວຊານ ຫວຽດນາມ ອາໄສຢູ່ຕ່າງປະເທດ ແລະ ນັກວິທະຍາສາດສາກົນ ຈະຊ່ວຍເປີດກວ້າງແຫຼ່ງພູມປັນຍາ, ຍົກສູງການເຂົ້າເຖິງ, ນຳໃຊ້ເຕັກໂນໂລຢີ ແລະ ຄ່ອຍໆເປັນເຈົ້າການເຕັກໂນໂລຢີ.
ຍົກສູງປະສິດທິຜົນຂອງການຄຸ້ມຄອງແຫ່ງຊາດ
ເຖິງຢ່າງໃດກໍ່ຕາມ, ພຽງແຕ່ມີຜູ້ມີຄວາມເກັ່ງກ້າສາມາດນັ້ນແມ່ນຍັງບໍ່ພຽງພໍ. ນະໂຍບາຍຖືກຕ້ອງພຽງແຕ່ສ້າງຜົນປະໂຫຍດເມື່ອໄດ້ຮັບການປະຕິບັດໃຫ້ມີປະສິດທິຜົນ. ສະນັ້ນ, ການນຳໃຊ້ແຫຼ່ງຊັບພະຍາກອນຢ່າງມີປະສິດທິຜົນຮຽກຮ້ອງ ຕ້ອງມີການປະສານສົມທົບຢ່າງແໜ້ນແຟ້ນໃນການຈັດຕັ້ງປະຕິບັດ, ຕັ້ງໃນປະສິດທິຜົນລວມຂອງການຄຸ້ມຄອງຄອງແຫ່ງຊາດ. ຍົກສູງຄຸນນະພາບຂອງຖັນແຖວແຫຼ່ງກຳລັງແຮງງານຕ້ອງໄປຄຽງຄູ່ກັບການປ່ຽນແປງໃໝ່ວິທີການຕີລາຄາ, ຕ້ອງຕິດພັນສິດອຳນາດກັບຄວາມຮັບຜິດຊອບ, ຖືປະສິດທິຜົນຂອງການປະຕິບັດວຽກງານເປັນໄມ້ຫຼ້າວັດແຖກສຳຄັນ.
ຕິດຕາມກອງປະຊຸມສຸນກາງຄັ້ງທີ IV, ທ່ານພົນຈັດຕະວາ, ຮອງສາດສະດາຈານ, ປະລິນຍາເອກ ຫງວຽນວັນເຊົ໊າ, ຮອງຫົວໜ້າວິທະຍາຄານຍຸດທະສາດ ແລະ ປະຫວັດສາດປ້ອງກັນຊາດ ຫວຽດນາມ, ກະຊວງປ້ອງກັນປະເທດ, ໄດ້ສະແດງຄວາມເຫັນດີຕໍ່ມະຕິກ່ຽວກັບວຽກງານພະນັກງານທີ່ໄດ້ຮັບຮອງເອົາ:
“ພາຍຫຼັງຕິດຕາມບົດກ່າວຄຳເຫັນຂອງທ່ານເລຂາທິການໃຫຍ່, ປະທານປະເທດ ໂຕເລີມ, ຂ້າພະເຈົ້າມີຄວາມຄາດຫວັງເປັນຢ່າງສູງຕໍ່ວຽກງານພະນັກງານຈະມີການຫັນປ່ຽນຢ່າງແຮງ ຈາກການຄຸ້ມຄອງມະນຸດ, ໄປສູ່ການພັດທະນາ ແລະ ການນຳໃຊ້ມະນຸດ. ຈາກການກະກຽມພະນັກງານຕາມແຕ່ລະໄລຍະ ພວກເຮົາໄດ້ຫັນໄປສູ່ການກະກຽມແຫຼ່ງຊັບພະຍາກອນມະນຸດການນຳໃຫ້ແກ່ບັນດາວຽກງານຍຸດທະສາດໃນໄລຍະຍາວຂອງປະເທດຊາດ. ແລະສິ່ງສຳຄັນທີ່ສຸດແມ່ນ ພວກເຮົາຕ້ອງສ້າງກົນໄກເພື່ອໃຫ້ຜູ້ມີກຳລັງຄວາມສາມາດໄດ້ມອບໝາຍໜ້າທີ່ໃຫຍ່, ຜູ້ເຮັດວຽກຈະໄດ້ຮັບສິດຫຼາຍກວ່າ. ພ້ອມກັນນັ້ນ, ຜູ້ທີ່ບໍ່ສາມາດຕອບສະໜອງຄວາມຮຽກຮ້ອງຕ້ອງການ ແມ່ນຕ້ອງໄດ້ທົດແທນຢ່າງທັນການ.”
ການລົງທຶນໃສ່ມະນຸດ, ນຳໃຊ້ຜູ້ມີຄວາມເກັ່ງກ້າສາມາ ແລະ ການຍົກສູງກຳລັງຄວາມສາມາດໃນການປະຕິບັດແມ່ນການລົງທຶນໃຫ້ແກ່ການພັດທະນາໄລຍະຍາວຂອງປະເທດ, ສ້າງພື້ນຖານເພື່ອໃຫ້ ຫວຽດນາມ ເສີມຂະຫຍາຍກຳລັງແຮງພາຍໃນ, ຍົກສູງກຳລັງແກ່ງແຍ້ງ ແລະ ປະຕິບັດຄວາມມຸ່ງຫວັງພັດທະນາຢ່າງວ່ອງໄວ ແລະ ຍືນຍົງໃນຍຸກໃໝ່ໃຫ້ປະກົດຜົນເປັນຈິງ.
