ໃນຂອບເຂດໂຄງການຮ່ວມມືຜະລິດ ເນື່ອງໃນໂອກາດສະເຫຼີມສະຫຼອງ 50 ປີ ແຫ່ງວັນສ້າງຕັ້ງສາຍພົວພັນທາງການທູດ ຫວຽດນາມ – ໄທ, ນັກ​ຂ່າວ ກິມເງິນ ຂອງພະແນກບັນ​ນາ​ທິ​ການ​ຂ່າວພາ​ສາຕ່າງປະເທດ – ວິທະຍຸກະຈາຍສຽງ ຫວຽດນາມ ໄດ້ມີ​ໂອ​ກາດພ້ອມກັບຄະນະນັກຂ່າວ ຄະນະກຳມະການປະ​ຊາ​ສຳ​ພັນ ໄທ ສຳພາດ ທ່ານ ນິວັດ ອາທິວັດນານົນ – ຮອງປະທານ SCG ຫວຽດນາມ, ທັງເປັນຜູ້ອຳນວຍການໃຫຍ່ ບໍລິສັດ ຫຸ້ນສ່ວນ ຢາງ ບິ່ງມິງ ກ່ຽວກັບວິ​ວັດການ​ເຄື່ອນ​ໄຫວດຳເນີນທຸລະກິດຂອງບໍລິສັດຢູ່ ຫວຽດນາມ, ຂໍເຊີນບັນດາທ່ານຮັບຟັງເນື້ອໃນຕົ້ນ​ຕໍຂອງການສຳພາດນີ້ ຜ່ານບົດຂຽນ: “34 ປີ SCG ຮ່ວມເດີນທາງພ້ອມກັບ ຫວຽດນາມ”

ພາຍຫຼັງ 34 ປີທີ່ເຄື່ອນ​ໄຫວຢູ່ ຫວຽດນາມ, SCG ນັບມື້ນັບສະ​ໜິດ​ຕິດ​ພັນກັບ ຕະຫຼາດ ແລະ ຊຸມຊົນທ້ອງຖິ່ນ. ຕາມທ່ານ ນິວັດ ອາທິວັດນານົນ ແລ້ວ, ຫວຽດນາມ ແມ່ນຕະຫຼາດສຳຄັນໃນຍຸດທະສາດການພັດທະນາຂອງ SCG ຢູ່ ASEAN. ວິສາຫະກິດກຳນົດວ່າ ການດຳເນີນທຸລະກິດຕ້ອງມຸ່ງໄປເຖິງຄວາມຍືນຍົງ ແລະ ສະ​ໜິດ​ຕິດພັນຍາວນານກັບທ້ອງຖິ່ນ.

ຈາກທິດທາງການພັດທະນາແບບຍືນຍົງ ແລະ ເປົ້າ​ໝາຍການເຕີບໂຕສີຂຽວ, SCG ກຳລັງຍູ້​ແຮງບັນດາມາດ​ຕະ​ການເພື່ອແນໃສ່ຫຼຸດຜ່ອນຜົນກະທົບຕໍ່ສິ່ງ​ແວດ​ລ້ອມໃນການເຄື່ອນ​ໄຫວຜະລິດ, ດຳເນີນທຸລະກິດ. ວິສາຫະກິດຖືວ່າ, ເປົ້າ​ໝາຍ Net Zero ຂອງ ຫວຽດນາມ ແມ່ນເໝາະສົມກັບທິດທາງການພັດທະນາຂອງ SCG. ບົນພື້ນຖານບັນດາບົດຮຽນທີ່ໄດ້ຜັນຂະຫຍາຍຢູ່ ໄທ, SCG ກຳລັງນຳເອົາບັນດາຂໍ້ລິເລີ່ມສີຂຽວເຂົ້າ​ມານຳໃຊ້ຢູ່ ຫວຽດນາມ ເທື່ອລະກ້າວ. ສິ່ງ​ເປັນ​ໜ້າ​ສົນ​ໃຈ​ນັ້ນແມ່ນ ໂຄງການ Green Choice ພ້ອມ​ກັບບັນດາມາ​ດ​ຕະ​ການນຳໃຊ້ວັດຖຸດິບທີ່ສະອາດກວ່າ ແລະ ພັດທະນາຜະລິດຕະພັນກາກບອນຕໍ່າ. ທ່ານ ນິວັດ ໃຫ້ຮູ້ວ່າ ນີ້ກໍແມ່ນໜຶ່ງໃນບັນດາທິດ​ທາງທີ່ SCG ຖືເປັນສຳຄັນໃນວິວັດການພັດທະນາຢູ່ຕະຫຼາດ ຫວຽດນາມ.

ໄປ​ຄຽງ​ຄູ່​ກັບ​ການປະ​ຕິ​ບັດ​ບັນ​ດາເປົ້າ​ໝາຍກ່ຽວກັບການ​ດຳ​ເນີນທຸລະກິດ ແລະ ການພັດທະນາສີຂຽວແລ້ວ, SCG ຍັງໃຫ້ຄວາມເອົາໃຈໃສ່ເປັນ​ພິ​ເສດ​ເຖິງບັນດາກິດຈະກຳປະກອບສ່ວນໃຫ້ຊຸມຊົນຢູ່ ຫວຽດນາມ. ໃນຊຸມປີຜ່ານມາ, ວິສາຫະກິດໄດ້ຜັນຂະຫຍາຍບັນດາໂຄງການທຶນການສຶກສາ, ການສຶກສາ, ບຳ​ລຸງ​ສ້າງ ແລະ ສະໜັບສະໜູນພື້ນຖານໂຄງລ່າງ​ເພື່ອແນໃສ່ເພີ່ມຄວາມ​ສະ​ໜິດ​ຕິດພັນກັບຊຸມຊົນທ້ອງຖິ່ນ. ນີ້ກໍແມ່ນພາກສ່ວນໜຶ່ງໃນທິດທາງການພັດທະນາຍາວນານ ຂອງວິສາຫະກິດຢູ່ ຫວຽດນາມ, ຄືດັ່ງຄຳຢັ້ງຢືນຂອງທ່ານ ນິວັດ:

ຕີ​ລາ​ຄາກ່ຽວກັບແງ່​ຫວັງຂອງຕະຫຼາດ ຫວຽດນາມ ໃນ 5 ປີຕໍ່ໜ້າ, ທ່ານ ນິວັດ ຖືວ່າ ຫວຽດນາມ ພວມມີຫຼາຍເງື່ອນໄຂສະ​ດວກເພື່ອຮັກສາທ່າເຕີບໂຕ. ເຖິງຢ່າງໃດກໍຕາມ, ຕາມທ່ານແລ້ວ, ໂອກາດຍາມໃດກໍໄປຄຽງຄູ່ກັບບັນດາສິ່ງທ້າທາຍ, ບັນດາວິສາຫະກິດ ໄທ ຕ້ອງຊອກ​ຮູ້ຕະຫຼາດຢ່າງ​ລະ​ອຽດ ແລະ ມີການ​ກະກຽມ​ຢ່າງເໝາະສົມກ່ອນທີ່ຈະ​ເຂົ້າມາລົງທຶນ:

ຫຼັງຈາກ 34 ປີ, SCG ບໍ່ພຽງແຕ່ຮັກສາການເຄື່ອນໄຫວດຳເນີນທຸລະກິດເທົ່ານັ້ນ ແຕ່ຍັງກາຍເປັນພາກສ່ວນໜຶ່ງຂອງ​ປະ​ຊາ​ຄົມວິສາຫະກິດຢູ່ ຫວຽດນາມ ເທື່ອລະກ້າວ. ດ້ວຍກຳນົດທິດທາງການເຕີບໂຕສີຂຽວ, ການພັດທະນາແບບຍືນຍົງ ແລະ ການຮ່ວມເດີນທາງພ້ອມກັບສັງຄົມ, ວິສາຫະກິດ ຫວັງຢ່າງ​ຍິ່ງວ່າຈະສືບຕໍ່ຂະຫຍາຍການຮ່ວມມື ແລະ ສະ​ໜິດ​ຕິດພັນ​ໄລ​ຍະຍາວກັບ ຫວຽດນາມ. ນີ້ກໍແມ່ນພື້ນຖານເພື່ອໃຫ້ SCG ມຸ່ງໄປເຖິງໄລ​ຍະທາງພັດທະນາໃໝ່ຢູ່ຕະຫຼາດ ຫວຽດນາມ../.