ເພື່ອມຸ່ງໄປເຖິງພິທີສະເຫຼີມສະຫຼອງ 81 ປີແຫ່ງວັນຊາດ ຫວຽດນາມ ທີ 2 ກັນຍາ, ໃນຊຸມມື້ນີ້, ຮ່າໂນ້ຍ ພວມຈັດຫຼາຍລາຍການສະແດງສິລະປະ, ງານວາງສະແດງ ແລະ ການເຄື່ອນໄຫວຮັບໃຊ້ມະຫາຊົນ. ບໍ່ພຽງແຕ່ສ້າງເປັນບັນຍາກາດຂອງງານບຸນເທົ່ານັ້ນ, ບັນດາການເຄື່ອນໄຫວນີ້ຍັງຊອກຫາວິທີເພື່ອເລົ່າເລື່ອງແບບໃໝ່ກ່ຽວກັບປະຫວັດສາດໃຫ້ເຂົ້າມາໃກ້ກັບຊີວິດໃນປະຈຸບັນ, ເພື່ອບໍ່ພຽງແຕ່ໃຫ້ຄວາມຊົງຈຳກ່ຽວກັບຊຸມເດືອນປີທີ່ຍາດເອົາເອກະລາດໄດ້ຫວນຄືນເທົ່ານັ້ນ ຫາກຍັງສືບຕໍ່ກາຍເປັນເລື່ອງລາວຂອງຄົນລຸ້ນຕ່າງໆອີກດ້ວຍ.
ໃນຊຸມມື້ທ້າຍເດືອນ ສິງຫາ ນີ້, ຮ່າໂນ້ຍ ໄດ້ຮັບການປະດັບປະດາດ້ວຍທຸງຊາດ, ດອກໄມ້ດ້ວຍສີສັນທີ່ສວຍງາມໃນບັນຍາກາດຕ້ອນຮັບວັນຊາດ. ພ້ອມກັບຖະໜົນສາຍຕ່າງໆໄດ້ຮັບການປະດັບປະດາຢ່າງງາມຕານັ້ນ, ມີເຂດອື່ນໆກໍ່ພວມຈັດບັນດາເວທີສະແດງ, ໃນຫໍພິພິຕະພັນ, ເຂດມໍລະດົກ ແລະ ບັນດາສະຖານທີ່ວັດທະນະທຳຂອງນະຄອນຫຼວງ. ບັນດາລາຍການສິລະປະບໍ່ພຽງແຕ່ປະກອບສີສັນໃຫ້ວັນບຸນໃຫຍ່ຕື່ມອີກເທົ່ານັ້ນ, ຫາກຍັງນຳເອົາບັນດາເລື່ອງລາວກ່ຽວກັບປະເທດຊາດ, ມະນຸດ ແລະ ບັນດາຊຸມເດືອນປີທີ່ຜ່ານໄປແລ້ວນັ້ນ ເຂົ້າມາໃກ້ກັບມະຫາຊົນໃນປະຈຸບັນ.
ໜຶ່ງໃນບັນດາເລື່ອງລາວທີ່ໄດ້ເລົ່າຄືນຕາມວິທີທີ່ໃກ້ຊິດນັ້ນແມ່ນ “ຄາວເຍົາໄວທີ່ດຸເດືອດ”, ເຊິ່ງໂຮງລະຄອນ ຕ໋ວຍແຈ໋ (ໄວໜຸ່ມ) ສ້າງເປັນບົດລະຄອນ. ບົດລະຄອນໄດ້ຫວນຄືນສະພາບການຢູ່ ເຫ້ວ ໃນຊຸມປີຕໍ່ສູ້ຕ້ານ ຝລັ່ງ, ໂດຍໄດ້ເລົ່າເລື່ອງກ່ຽວກັບບັນດາເຍົາວະຊົນສັງກັດກອງເຍົາວະຊົນສອດແນມ ກອງພັນໃຫຍ່ ເຈິ່ນກາວເວີນ. ເຖິງວ່າດຳລົງຊີວິດໃນທ່າມກາງຂອງລະເບີດ ແລະ ຄວາມອັນຕະລາຍກໍ່ຕາມ, ແຕ່ບັນດາຜູ້ຄົນນັ້ນຍັງຮັກສາໄດ້ຄວາມໄຮ້ດຽງສາຂອງໄວໜຸ່ມ, ຄວາມຄາດຫວັງມີອິດສະລະພາບ ພ້ອມກັບນ້ຳໃຈຮັກຊາດທີ່ແຮງກ້າ. ຜ່ານການເດີນທາງຂອງບັນດາເດັກຊາຍ, ເດັກຍິງປະຕິບັດໜ້າທີ່ປະຕິວັດ, ບົດລະຄອນໄດ້ພັນລະນາຮູບພາບລຸ້ນໄວໜຸ່ມເຍົາວະຊົນ ຫວຽດນາມ ກຽມພ້ອມທີ່ຈະເສຍສະຫຼະຊີວິດເພື່ອເອກະລາດຂອງຊາດ. ນັກສິລະປິນດີເດັ່ນ ນາງ ແອັງຕວຽດ, ແບ່ງປັນກ່ຽວກັບບົດລະຄອນວ່າ:
“ພວກຂ້າພະເຈົ້າກຳນົດວ່າ ນີ້ບໍ່ພຽງແຕ່ແມ່ນບົດລະຄອນສະແດງເພື່ອພັນລະນາຄືນປະຫວັດສາດເທົ່ານັ້ນ, ຫາກຍັງຢາກສ້າງເປັນພື້ນທີ່ເວທີການສະແດງ. ຢູ່ນັ້ນ, ໄດ້ເຮັດໃຫ້ປະຫວັດສາດກັບມາມີຊີວິດໃໝ່ຜ່ານບັນດາຕົວລະຄອນ, ຜ່ານຈິດໃຈ ແລະ ຜ່ານບັນດາການຄັດເລືອກຕົວລະຄອນໜຸ່ມ. ສິ່ງພິເສດແມ່ນ ພວກຂ້າພະເຈົ້າບໍ່ຢາກເລົ່າເລື່ອງສົງຄາມທີ່ມີພຽງແຕ່ການຕໍ່ສູ້ ແລະ ການເສຍສະຫຼະຊີວິດເທົ່ານັ້ນ. ເບື້ອງຫຼັງສົງຄາມແມ່ນບັນດາຜູ້ຄົນແທ້ໆ”.
ກໍ່ໃນບັນຍາກາດມຸ່ງໄປເຖິງພິທີສະເຫຼີມສະຫຼອງ 81 ປີແຫ່ງວັນຊາດ ຫວຽດນາມ, ສະຫະພັນກາຍຍະສິນ ຫວຽດນາມ ໄດ້ເລົ່າເລື່ອງລາວປະຫວັດສາດຜ່ານລາຍການ “ຫວຽດນາມ ສະຫງ່າອົງອາດ”. ລາຍການໄດ້ເປີດໄລຍະປະຫວັດສາດນັບແຕ່ສະໄໝເຈົ້າຊີວິດ ຮຸ່ງ, ຮູບປັ້ນ ລາກລອງກວັນ - ເອົາເກີ, ຕະຫຼອດຮອດນ້ຳໃຈອັນສະຫງ່າອົງອາດ ດົງອາ ສະໄໝເຈົ້າຊີວິດ ເຈິ່ນ ແລະ ພາບພົດຂອງປະເທດຊາດໃນປະຈຸບັນ. ນັກສິລະປິນປະຊາຊົນ ຕົງຕວ່ານທັງ, ຫົວໜ້າສະຫະພັນກາຍຍະສິນ ຫວຽດນາມ, ໃຫ້ຮູ້ວ່າ:
“ສິ່ງພິເສດທີ່ສຸດໃນລາຍການແມ່ນພາກ “ນ້ຳໃຈອັນສະຫງ່າອົງອາດດົງອາ”, ເປັນຄັ້ງທຳອິດທີ່ພວກຂ້າພະເຈົ້ານຳໃຊ້ຊຸດອາພອນຂອງບັນດານາຍພົນລາຊະວົງສະໄໝ ເຈົ້າຊີວິດ ເຈິ່ນ. ເປັນຄັ້ງທຳອິດໃນເວທີສະແດງກາຍຍະສິນພວກເຮົາສາມາດໄດ້ເຫັນບັນດານາຍພົນຂີ່ມ້າ, ນັກຮົບສະໄໝເຈົ້າຊີວິດ ເຈິ່ນ ຝຶກຕີມວຍ ແລະ ສະແດງຄວາມເກັ່ງກ້າສາມາດຂອງຕົນ. ຜ່ານພາສາເລົ່າເລື່ອງຂອງກາຍຍະສິນ, ບັນດານັກສິລະປິນໄດ້ມານະພະຍາຍາມສ້າງອາລົມຈິດ, ຄວາມເອກອ້າງທະນົງໃຈຕໍ່ຊາດ, ຄວາມຮັກປະເທດຊາດໃຫ້ແກ່ຜູ້ຊົມຫຼາຍກວ່າອີກ”.
(ພາບ: BVHTT&DL)
ເນື່ອງໃນໂອກາດນີ້, ຫໍພິພິຕະພັນແມ່ຍິງ ຫວຽດນາມ ກໍ່ໄດ້ຈັດງານວາງສະແດງຫົວເລື່ອງສະເພາະ “ຄວາມໄວໜຸ່ມຈາກເສັ້ນທາງ ເຈື່ອງເຊີນ ໄປຮອດເສັ້ນທາງເລກ 1C ແຫ່ງເທບນິຍາຍ”, ໄດ້ພາມະຫາຊົນກັບຄືນຊຸມເດືອນປີສົງຄາມຕ້ານ ອາເມລິກາ ຜ່ານເລື່ອງລາວກ່ຽວກັບລຸ້ນຕ່າງໆທີ່ໄດ້ເສຍສະຫຼະຊີວິດໃນຄາວຍັງໜຸ່ມແໜ້ນໃຫ້ແກ່ເອກະລາດ, ສັນຕິພາບ ແລະ ທ້ອນໂຮມປະເທດຊາດເປັນເອກະພາບ. ທ່ານນາງ ຫງວຽນທິຕວຽດ, ຫົວໜ້າຫໍພິພິຕະພັນແມ່ຍິງ ຫວຽດນາມ, ແບ່ງປັນວ່າ:
“ພວກຂ້າພະເຈົ້າຈັດງານວາງສະແດງດ້ວຍຄວາມປາດຖະໜາຢາກແຜ່ກະຈາຍເຖິງລຸ້ນໜຸ່ມປະຈຸບັນທີ່ພວມດຳລົງຊີວິດ ແລະ ສືບທອດໃນມື້ນີ້ ກ່ຽວກັບສານທີ່ວ່າ ເຖິງວ່າສົງຄາມໄດ້ຜ່ານພົ້ນໄປດົນແລ້ວກໍ່ຕາມ ແຕ່ບັນດາຄວາມຊົງຈຳນີ້ແມ່ນພວກເຮົາຕ້ອງຈື່ຈຳ ແລະ ເຊີດຊູ. ບອກເຕືອນໃຫ້ພວກເຮົາວ່າ ລຸ້ນປະຈຸບັນຕ້ອງສືບທອດຄືແນວໃດ, ຕ້ອງມີຄວາມເຂັ້ມແຂງໃນສັງກາດພັດທະນາໃໝ່, ສ້າງສາປະເທດຊາດໃຫ້ນັບມື້ນັບພັດທະນາ, ວັດທະນະຖາວອນກວ່າ”.
ພ້ອມກັບບັນດາລາຍການສະແດງສິລະປະຮັບໃຊ້ປະຊາຊົນ ແລະ ແຂກທ່ອງທ່ຽວ, ຕອນຄ່ຳວັນທີ 02 ກັນຍາ, ນະຄອນ ຮ່າໂນ້ຍ ຈະຈັດການຍິງບັ້ງໄຟດອກຢູ່ 5 ຈຸດ, ປະກອບສ່ວນສ້າງບັນຍາກາດຟົດຟື້ນໃນຊຸມມື້ວັນຊາດ. ໃນຊຸມມື້ນີ້, ແສງໄຟຈາກບັນດາເວທີສະແດງສິລະປະ, ບັນດາເຂດວາງສະແດງ ແລະ ການເຄື່ອນໄຫວວັດທະນະທຳຕ່າງໆ ບໍ່ພຽງແຕ່ສ້າງເປັນງານບຸນທີ່ມີສີສັນຫຼາກຫຼາຍເທົ່ານັ້ນ, ຫາກຍັງປະກອບສ່ວນເພື່ອໃຫ້ແຕ່ລະຄົນ, ໂດຍສະເພາະແມ່ນລຸ້ນໜຸ່ມມີຄວາມເຂົ້າໃຈກ່ຽວກັບສິ່ງທີ່ຄົນລຸ້ນກ່ອນໆໄດ້ຜ່ານຜ່າ ແລະ ຍິ່ງເຄົາລົບຄຸນຄ່າຂອງເອກະລາດ, ສັນຕິພາບໃນມື້ນີ້ຫຼາຍກວ່າອີກ./.
.jpg)
