ວັນທີ 01 ມິຖຸນາ, ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ຫວຽດນາມ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ຫວຽດນາມ ສິ້ນສຸດການຢ້ຽມຢາມທາງລັດຖະກິດຢູ່ ຟີລິບປິນ, ພ້ອມທັງສິ້ນສຸດການປະຕິບັດງານຢູ່ບັນດາປະເທດຄູ່ຮ່ວມມືຫຼັກແຫຼ່ງຂອງ ຫວຽດນາມ ໃນພາກພື້ນ ອາຊີ ຕາເວັນອອກສ່ຽງໃຕ້, ລວມມີ: ຢ້ຽມຢາມ ລາຊະອານາຈັກ ໄທ, ຢ້ຽມຢາມທາງລັດຖະກິດ ຢູ່ ສິງກະໂປ, ກ່າວຄຳເຫັນນຳສະເໜີຢູ່ກອງປະຊຸມ Shangri – la. ຜົນສຳເລັດຂອງການຢ້ຽມຢາມໃນການປະຕິບັດງານຢູ່ຕ່າງປະເທດຄັ້ງນີ້ ໄດ້ເພີ່ມທະວີການພົວພັນລະຫວ່າງ ຫວຽດນາມ ກັບບັນດາປະເທດຢ່າງແຮງ, ພ້ອມທັງຍົກສູງທີ່ຕັ້ງບົດບາດ, ອິດທິພົນຊື່ສຽງຂອງ ຫວຽດນາມ ໃນພາກພື້ນ.
ໝາກຜົນຂອງການປະຕິບັດງານຂອງທ່ານເລຂາທິການໃຫຍ່, ປະທານປະເທດ ໂຕເລິມ ໄດ້ຫັນແງ່ຫວັງໃຫຍ່ໃຫ້ປະກົດຜົນເປັນຈິງ. ດ້ວຍວິໄສທັດຍຸດທະສາດທີ່ຄ້າຍຄືກັນກ່ຽວກັບຄວາມຄາດຫວັງພັດທະນາ ແລະ ການເຊື່ອມຕໍ່ຢ່າງແໜ້ນແຟ້ນ, ຫວຽດນາມ ກັບ ໄທ, ສິງກະໂປ ແລະ ຟີລິນປິນ ຈະສືບຕໍ່ແມ່ນບັນດາຄູ່ຮ່ວມມືສຳຄັນຂອງກັນ, ພ້ອມກັນປະກອບສ່ວນຢ່າງຕັ້ງໜ້າໃຫ້ແກ່ສັນຕິພາບ, ສະຖຽນລະພາບ, ການພັດທະນາຂອງພາກພື້ນ ແລະ ໂລກ.
ສ້າງກຳລັງຝັກດັນໃຫ້ແກ່ການພົວພັນ ຫວຽດນາມ ກັບ ໄທ, ສິງກະໂປ, ຟີລິບປິນ ຕື່ມອີກ
ໂດຍໄດ້ດຳເນີນໃນສະພາບການ ຫວຽດນາມ - ໄທ, ຫວຽດນາມ - ສິງກະໂປ ຫາກໍ່ຍົກລະດັບຂຶ້ນເປັນຄູ່ຮ່ວມມືຍຸດທະສາດຮອບດ້ານ, ຫວຽດນາມ ກໍສະເຫຼີມສະຫຼອງ 50 ປີແຫ່ງການພົວພັນທາງການທູດກັບ ໄທ ແລະ ຟີລິບປິນ ໃນປີນີ້, ການນຳສູງສຸດຂອງ ຫວຽດນາມ ແລະ ການນຳຂັ້ນສູງສາມປະເທດ ໄດ້ແລກປ່ຽນກ່ຽວກັບບັນດາກຳນົດທິດໃຫຍ່ຢ່າງເລິກເຊິ່ງກວ້າງຂວາງ ແນໃສ່ຜັນຂະຫຍາຍຂອບເຂດການຮ່ວມມືຢ່າງມີປະສິດທິຜົນ, ຜ່ານນັ້ນ ສ້າງກຳລັງຝັກດັນໃຫ້ແກ່ການພົວພັນ ຫວຽດນາມ ກັບສາມປະເທດໃນໄລຍະຈະມາເຖິງ.
ຢູ່ ໄທ, ສອງປະເທດບັນລຸໄດ້ຂໍໍ້ຕົກລົງຮ່ວມມືຫຼາຍສະບັບ, ໂດຍສະເພາະ ແມ່ນແຜນການເຄື່ອນໄຫວຜັນຂະຫຍາຍຄູ່ຮ່ວມມືຍຸດທະສາດຮອບດ້ານ ໄລຍະ 2026 – 2031, ວາງເປົ້າໝາຍວົງເງິນການຄ້າສອງຝ່າຍ ບັນລຸ 25 ຕື້ USD. ສິ່ງດັ່ງກ່າວ ໄດ້ສະແດງໃຫ້ເຫັນການພົວພັນສອງຝ່າຍ ພວມນັບມື້ນັບແທດຈິງ ແລະ ມີຄວາມໝາຍສຳຄັນ, ເສີມສ້າງໃຫ້ແກ່ກັນ, ໃນສະພາບການພູມີສາດການເມືອງ ແລະ ເສດຖະກິດທົ່ວໂລກພວມມີການຜັນແປຫຼາຍຢ່າງ.
ໃນຂະນະນັ້ນ, ສານຍູ້ແຮງຍຸດທະສາດ “ສາມເຊື່ອມຕໍ່” (ການຜະລິດ - ພື້ນຖານໂຄງລ່າງ - ການຫັນປ່ຽນ) ແນໃສ່ແກ້ໄຂບັນດາຂົງເຂດການຮ່ວມມືທີ່ຍັງບໍ່ທັນແໜ້ນແຟ້ນນັ້ນ ແມ່ນໄດ້ຮັບການຕອບສະໜອງຢ່າງແຮງຈາກວົງການນັກຮຽນຮູ້ ແລະ ປະຊາຄົມວິສາຫະກິດ. ທ່ານ ສຸວັດໄຊ ຊົງວານິດ - ເລຂາທິການໃຫຍ່ສະມາຄົມມິດຕະພາບ ຫວຽດນາມ - ໄທ ເນັ້ນໜັກວ່າ:
“ກຳນົດທິດ “ສາມເຊື່ອມຕໍ່” ໄດ້ວາງອອກເສັ້ນທາງທີ່ຈະແຈ້ງໃຫ້ແກ່ສອງປະເທດ, ນັບແຕ່ການເຊື່ອມຕໍ່ລະບົບສະໜອງ, ການພັດທະນາວິສາຫະກິດທ້ອງຖິ່ນ ຕະຫຼອດຮອດເປົ້າໝາຍພັດທະນາແບບຍືນຍົງ”.
ການຢ້ຽມຢາມທາງລັດຖະກິດຢູ່ ສິງກະໂປ ກໍແມ່ນຂີດໝາຍປະຫວັດສາດ. ຈຳນວນການເຄື່ອນໄຫວພົບປະແລກປ່ຽນໃນການຢ້ຽມຢາມໄດ້ສະແດງໃຫ້ເຫັນຄວາມຕັດສິນໃຈຂອງການນຳສອງຝ່າຍໃນການຊຸກຍູ້ຜັນຂະຫຍາຍເນື້ອໃນການພົວພັນຄູ່ຮ່ວມມືຍຸດທະສາດຮອບດ້ານຢ່າງມີປະສິດທິຜົນ. ການຢ້ຽມຢາມບັນລຸໄດ້ຫຼາຍໝາກຜົນທີ່ແທດຈິງ. ການນຳສອງຝ່າຍເຫັນດີສືບຕໍ່ເຮັດໃຫ້ການພົວພັນໃນທຸກຂົງເຂດເລິກເຊິ່ງຂຶ້ນຕື່ມ, ພິເສດແມ່ນເສດຖະກິດດີຈີຕອນ, ເຕັກໂນໂລຢີສູງ, ຫັນເປັນສີຂຽວ, ພະລັງງານທົດແທນ ແລະ ການພັດທະນາແຫຼ່ງຊັບພະຍາກອນມະນຸດ. ຄືດັ່ງຄຳປາໄສຂອງທ່ານເລຂາທິການໃຫຍ່, ປະທານປະເທດ ຫວຽດນາມ ໂຕເລິມ ໃນເວທີປາໄສເຊື່ອມຕໍ່ເຕັກໂນໂລຢີ ຫວຽດນາມ - ສິງກະໂປ (ເມື່ອວັນທີ 29 ພຶດສະພາ), ຖືວ່າ ສອງຝ່າຍພວມຢືນຢູ່ຕໍ່ໜ້າໂອກາດທີ່ໃຫຍ່ຫຼວງ ເພື່ອເປີດກວ້າງການຮ່ວມມືໄປສູ່ບັນດາຂົງເຂດທີ່ມີຕ້ອງການລະດັບຄວາມຮູ້ພູມປັນຍາດ ແລະ ເຕັກໂນໂລຢີສູງກວ່າ.
“ສິ່ງທີ່ພວກເຮົາມຸ່ງໄປເຖິງ ບໍ່ພຽງແຕ່ຖ່າຍທອດເຕັກໂນໂລຢີເທົ່ານັ້ນ, ຫາກຍັງພ້ອມກັນພັດທະນາກຳລັງຄວາມສາມາດດ້ານເຕັກໂນໂລຢີ; ບໍ່ພຽງແຕ່ແມ່ນການຮ່ວມມືໃນໄລຍະສັ້ນເທົ່ານັ້ນ, ຫາກຍັງພ້ອມກັນສ້າງສາບັນດາຄຸນຄ່າໃໝ່ທີ່ມີຄວາມອາດສາມາດເຂົ້າຮ່ວມລະບົບມູນຄ່າພາກພື້ນ ແລະ ທົ່ວໂລກຢ່າງເລິກເຊິ່ງອີກດ້ວຍ. ສິ່ງທີ່ຕ້ອງການມຸ່ງໄປເຖິງແມ່ນສ້າງຕັ້ງເຂດຮ່ວມມືເຕັກໂນໂລຢີ ຫວຽດນາມ - ສິງກະໂປ ເທື່ອລະກ້າວ, ບ່ອນທີ່ພູມປັນຍາ, ຂໍ້ມູນຂ່າວສານ, ເຕັກໂນໂລຢີ ແລະ ແຫຼ່ງຊັບພະຍາກອນມະນຸດທີ່ມີຄຸນນະພາບສູງໄດ້ເຊື່ອມຕໍ່ຢ່າງມີປະສິດທິຜົນ ເພື່ອສ້າງບັນດາຜະລິດຕະພັນ ແລະ ມາດຕະການເຕັກໂນໂລຢີ ມີຄຸນຄ່າລະດັບພາກພື້ນ ແລະ ສາກົນ”.
ການຢ້ຽມຢາມ ຟີລິບປິນ, ປະທານ ອາຊຽນ ປີ 2026 - ແມ່ນປະເທດສຸດທ້າຍໃນການປະຕິບັດງານຢູ່ຕ່າງປະເທດຄັ້ງນີ້ຂອງທ່ານເລຂາທິການໃຫຍ່, ປະທານປະເທດ ຫວຽດນາມ ໂຕເລິມ ໄດ້ຮັບການຕີລາຄາວ່າ ແມ່ນຂີດໝາຍປະຫວັດສາດຂອງການພົວພັນສອງຝ່າຍ. ເຫດການນີ້ ບໍ່ພຽງແຕ່ໄດ້ສະແດງໃຫ້ເຫັນການຖືເປັນສຳຄັນຂອງ ຫວຽດນາມ ກັບຟີລິບປິນ ເທົ່ານັ້ນ, ຫາກຍັງສະແດງໃຫ້ເຫັນຄວາມຕັດສິນໃຈນຳການພົວພັນສອງຝ່າຍ ພັດທະນາຂຶ້ນລະດັບສູງໃໝ່, ມີສະຖຽນລະພາບ, ຍືນຍົງ ແລະ ແທດຈິງກວ່າ; ການສະໜັບສະໜູນຢ່າງແຮງ ແລະ ຮ່ວມເດີນທາງຢ່າງແທ້ຈິງຂອງ ຫວຽດນາມ ກັບບົດບາດປະທານ ອາຊຽນ ປີ 2026. ໝາກຜົນການຢ້ຽມຢາມ ໄດ້ຊ່ວຍກຳນົດສ້າງວິໄສທັດໃຫ້ແກ່ການພົວພັນສອງຝ່າຍ ບໍ່ພຽງແຕ່ໃນໄລຍະສັ້ນເທົ່ານັ້ນ ຫາກຍັງໃນຊຸມປີຂອງທົດສະວັດຕໍ່ໄປ ຫຼື ໄກກວ່າອີກດ້ວຍ.
ຂີດໝາຍທີ່ພົ້ນເດັ່ນໃນກອງປະຊຸມ Shangri-la
ຈຸດເນັ້ນໜັກທີ່ສຳຄັນຂອງການປະຕິບັດງານຄັ້ງນີ້ແມ່ນ ທ່ານເລຂາທິການໃຫຍ່, ປະທານປະເທດ ໂຕເລິມ ມີບົດກ່າວປາໄສໃນກອງປະຊຸມ Shangri-la 2026 ຢູ່ ສິງກະໂປ. ທ່ານຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ອົດສະຕາລີ, Richard Marles, ຕີລາຄາວ່າ:
“ຂ້າພະເຈົ້າ ຊົມເຊີຍເປັນພິເສດຕໍ່ເນື້ອໃນບົດກ່າວປາໄສຂອງທ່ານເລຂາທິການໃຫຍ່, ປະທານປະເທດ ກ່ຽວກັບຄວາມສຳຄັນຂອງບັນດາຫຼັກການຕໍ່ກັບປະເທດຂອງຕົນ, ແລະ ສິ່ງນັ້ນ ເໝາະສົມກັບວິທີທີ່ພວກຂ້າພະເຈົ້າຮັບຮູ້ຄວາມສຳຄັນຂອງບັນດາຫຼັກການລວມ. ພວກຂ້າພະເຈົ້າຮູ້ສຶກວ່າ, ພວມມີການຜູກພັນຍຸດທະສາດທີ່ນັບມື້ນັບເພີ່ມຂຶ້ນລະຫວ່າງ ອົດສະຕາລີ ແລະ ຫວຽດນາມ. ຂ້າພະເຈົ້າ ໄດ້ພົບປະສອງຝ່າຍກັບທ່ານເລຂາທິການໃຫຍ່, ປະທານປະເທດ ໂຕເລິມ ແລະ ທັງທ່ານພົນເອກ ຟານວັນຢາງ - ຄູ່ຮ່ວມຕຳແໜ່ງ ທີ່ ຂ້າພະເຈົ້າ ໄດ້ມີການພົບປະ ແລະ ເຮັດວຽກເປັນຫຼາຍຄັ້ງແລ້ວ. ຂ້າພະເຈົ້າຄິດວ່າ ມີອີກຈຸດໜຶ່ງທີ່ຂ້າພະເຈົ້າຢາກເວົ້າເຖິງ ນັ້ນແມ່ນເລື່ອງທ່ານເລຂາທິການໃຫຍ່, ປະທານປະເທດ ໂຕເລິມ ເນັ້ນໜັກເຖິງຄວາມສຳຄັນຂອງການພັດທະນາມະນຸດ ໃນແງ່ມູມຄວາມໝັ້ນຄົງ. ແລະ ສິ່ງນັ້ນແມ່ນຖືກຕ້ອງທີ່ສຸດ”.
ຈາກກອງປະຊຸມ Shangri-la 2026, ສານຂໍ້ຄວາມທີ່ ຫວຽດນາມ ສົ່ງໄປ ແມ່ນສານຂອງການສົນທະນາ, ຄວາມຮັບຜິດຊອບ ແລະ ສ້າງຄວາມໄວ້ເນື້ອເຊື່ອໃຈ. ສິ່ງນີ້ ໄດ້ສະແດງໃຫ້ເຫັນວ່າ ຫວຽດນາມ ບໍ່ພຽງແຕ່ແມ່ນປະເທດເຂົ້າຮ່ວມເທົ່ານັ້ນ ຫາກຍັງເປັນເຈົ້າການປະກອບສ່ວນ ດ້ວຍເລື່ອງກຳນົດແບບວິທີສຳຜັດການຮ່ວມມືເພື່ອສັນຕິພາບ, ສະຖຽນລະພາບ ແລະ ການພັດທະນາແບບຍືນຍົງຢູ່ພາກພື້ນ./.
