ການພິມຈຳໜ່າຍແມ່ນຂົງເຂດເຄື່ອນໄຫວແນວຄິດຂອງພັກ, ລັດ ແລະ ປະຊາຊົນ, ພ້ອມທັງແມ່ນຂົງເຂດປະດິດຄິດສ້າງ, ໂຄສະນາຄຸນຄ່າວັດທະນະທຳ, ຈິດໃຈ, ແມ່ນພື້ນຖານໃນການເສີມສ້າງພູມປັນຍາແຫ່ງຊາດ ແລະ ກໍ່ແມ່ນເຄື່ອງມືສ້າງຄຸນຄ່າສັງຄົມ, ນຳພາ ແລະ ກຳນົດທິດຄວາມປານີດ, ຍົກສູງລະດັບຄວາມຮູ້ຂອງປະຊາຊົນ, ພັດທະນາວັດທະນະທຳ, ປົກປ້ອງກຽດສັກສີຂອງຊາວ ຫວຽດນາມ ຢ່າງຮອບດ້ານ, ທ່ານ ຮອງສາດສະດາຈານ ປອ ຟ້າມມິງຕ໊ວນ ປະທານສະມາຄົມພິມຈຳໜ່າຍ ຫວຽດນາມ, ຮອງຫົວໜ້າບັນນາທິການໃຫຍ່ ວານລະສານຄູມມູນິດ ໃຫ້ຮູ້ວ່າ:
“ຂະແໜງພິມຈຳໜ່າຍມີບົດບາດ ແມ່ນລະບອບແນວຄິດວັດທະນະທຳພິເສດສະເພາະ ບໍ່ພຽງແຕ່ຢືນຢູ່ຕໍ່ໜ້າຄວາມຮຽກຮ້ອງຕ້ອງການປ່ຽນແປງໃໝ່ຢ່າງຮອບດ້ານ ກ່ຽວກັບເຕັກໂນໂລຊີ, ຮູບແບບການເຄື່ອນໄຫວເທົ່ານັ້ນ ຫາກຍັງຕ້ອງຢັ້ງຢືນຫຼາຍກວ່າອີກໃນພາລະກຳພັດທະນາພູມປັນຍາບຳລຸງສ້າງມະນຸດ ແລະ ປັບປຸງພື້ນຖານທາງດ້ານຈິດໃຈຂອງສັງຄົມອີກດ້ວຍ”.
ຂະແໜງພິມຈຳໜ່າຍ ຫວຽດນາມ ພວມຫັນຂໍ້ມູນທີ່ດີທີ່ສຸດ, ເປີດກວ້າງຂົງເຂດປະດິດຄິດສ້າງ ແລະ ຜະລິດອອກບັນດາຜະລິດຕະພັນທີ່ມີມູນຄ່າເພີ່ມສູງໃຫ້ແກ່ພື້ນຖານເສດຖະກິດພູມປັນຍາ. ເພື່ອໃຫ້ຂະແໜງພິມຈຳໜ່າຍຮັກສາບົດບາດເປັນແກ່ນສານໃນລະບົບນິເວດສ້າງພູມປັນຍາແຫ່ງຊາດ ຕິດພັນກັບການພັດທະນາອຸດສາຫະກຳວັດທະນະທຳ ແລະ ເສດຖະກິດດີຈີຕອນ. ທ່ານ ຮອງສາດສະດາຈານ ປອ ລິວວັນກວາງ ຮອງຫົວໜ້າສະຖານບັນສື່ມວນຊົນ ແລະ ໂຄສະນາ ຖືວ່າ:
“ຄວນຍູ້ແຮງການຫັນເປັນດີຈີຕອນ, ພັດທະນາບັນດາຜະລິດຕະພັນພິມຈຳໜ່າຍ ຕາມທິດເປັນຫຼາຍຮູບຫຼາຍແບບ ແລະ ທັນສະໄໝ. ໝູນໃຊ້ປັນຍາປະດິດເທື່ອລະກ້າວ, ນຳໃຊ້ຂໍ້ມູນໃຫຍ່ ແລະ ເຕັກໂນໂລຢີໃໝ່ ເຂົ້າໃນຂັ້ນຕອນການເຄື່ອນໄຫວພິມຈຳໜ່າຍ. ສ້າງລະບົບພິມຈຳໜ່າຍຫຼາຍຮູບຫຼາຍແບບ, ນຳໃຊ້ຫຼາຍພາຫະນະ, ສ້າງລະບົບມູນຄ່າ, ເນື້ອໃນດີຈີຕອນ, ເພີ່ມທະວີປະສິດທິຜົນທາງດ້ານເສດຖະກິດ”.
ຂະແໜງພິມຈຳໜ່າຍ ຫວຽດນາມ ພວມວາງເປົ້າໝາຍເຖິງປີ 2030 ມີສຳນັກພິມຈຳໜ່າຍເອເລັກໂຕນິກ 100%. ໝາຍຄວາມວ່າ ສຳນັກພິມຈຳໜ່າຍທັງໝົດຈະໝູນໃຊ້ການຫັນເປັນດີຈີຕອນຮອບດ້ານ ຫັນປ່ຽນສູ່ພື້ນຖານການພິມຈຳໜ່າຍຫຼາຍພາຫະນະ, ນຳໃຊ້ປັນຍາປະດິດ ແລະ ຂໍ້ມູນໃຫຍ່. ທ່ານນາງ ຫງວຽນທິໝີລິງ ຮອງຫົວໜ້າກົມສື່ມວນຊົນ, ການພິມຈຳໜ່າຍ, ຄະນະໂຄສະນາສຶກສາ ແລະ ຂົນຂວາຍປະຊາຊົນສູນກາງ ໃຫ້ຮູ້ວ່າ:
“ໃນສະເພາະໜ້າ, ພິຈາລະນາສ້າງບາງກຸ່ມບໍລິສັດພິມຈຳໜ່າຍ, ໂຄສະນາສືສານທີ່ເປັນແກ່ນສານ. ບັນດາກຸ່ມບໍລິສັດນີ້ຈັດຕັ້ງຕາມທິດຮວບຮວມບັນດາຫົວໜ່ວຍສະມາຊິກເຂົ້າຮ່ວມການຜະລິດ ດ້ວຍຫຼາຍຮູບແບບ, ຫຼາຍຜະລິດຕະພັນ, ຈາກນັ້ນນຳເນື້ອໃນອອກສູ່ຫຼາຍແຟຣດຟອມທີ່ແຕກຕ່າງກັນ, ສ້າງລະບົບນິເວດທາງດ້ານເນື້ອໃນ ແລະ ມີລັກສະນະເຊື່ອມຕໍ່ແຜ່ກະຈາຍສູງ. ເຖິງປີ 2030 ຍູ້ແຮງການພົວພັນແລກປ່ຽນຮ່ວມມືສາກົນ ໃນຂົງເຂດພິມຈຳໜ່າຍກັບບັນດາປະເທດ ແລະ ບັນດາອົງການວັດທະນະທຳທີ່ມີອິດທິພົນຊື່ສຽງໃນໂລກ”.
ທ່ານນາງ ຫງວຽນທິໝີລິງ ຮອງຫົວໜ້າກົມສື່ມວນຊົນ, ພິມຈຳໜ່າຍ, ຄະນະໂຄສະນາສຶກສາ ແລະ ຂົນຂວາຍປະຊາຊົນສູນກາງ ເນັ້ນໜັກວ່າ: “ຕ້ອງຖືການພິມຈຳໜ່າຍແມ່ນຂະແໜງອຸດສາຫະກຳເນື້ອໃນ, ມີຄວາມສາມາດຜະລິດອອກບັນດາມູນຄ່າເພີ່ມສູງ. ແຕ່ລະຜະລິດຕະພັນພິມຈຳໜ່າຍ ບໍ່ພຽງແຕ່ນຳຄຸນຄ່າວັດທະນະທຳເທົ່ານັ້ນ ຫາກຍັງສາມາດກາຍເປັນຊັບສິນເສດຖະກິດ ຫຼື ຊັບສິນທາງປັນຍາ, ເຂົ້າຮ່ວມໃນລະບົບມູນຄ່າຈາກການປະດິດຄິດສ້າງດ້ານເນື້ອໃນຕະຫຼອດຮອດໜ້າທີ່ວັດທະນະທຳ ແລະ ປະກອບສ່ວນໂດຍກົງເຂົ້າໃນການເຕີບໂຕ GDP ຂອງປະເທດຊາດ”.
ຫວຽດນາມ ພວມມຸ່ງໄປສູ່ການສ້າງພື້ນຖານການພິມຈຳໜ່າຍທັນສະໄໝ, ວັດທະນະທຳມະນຸດ, ເປັນມືອາຊີບ. ການພິມຈຳໜ່າຍໄດ້ຮັບກຳນົດ ແມ່ນຊ່ອງທາງທີ່ສຳຄັນ ເພື່ອນຳປະເທດຊາດເຊື່ອມໂຍງເຂົ້າກັບພື້ນຖານພູມປັນຍາຢ່າງເລິກເຊິ່ງ ພ້ອມທັງສ້າງພາບພົດຂອງປະເທດຊາດ ໃນຂົງເຂດວັດທະນະທຳທົ່ວໂລກ.
